ព័ត៌មានអន្ដរជាតិ

បុរស តៃវ៉ាន់ មួយរូប ខ្សោយតម្រងនោមដោយសារតែនិយមផឹកតែក្រហម

បានផុស

១២ ខែ មុន

នៅ

ថ្ងៃសៅរ៍ ១៩ កក្កដា ២០២៥

ដោយ

ចំពោះអ្នកដែលស្រឡាញ់សុខភាពគួរតែស្តាប់ និងទុកជាមេរៀនសម្រាប់ជីវិត ជាពិសេសអ្នកដែលចូលចិត្តទទួលទានភេសជ្ជៈផ្អែមៗ។ រឿងរ៉ាវនេះបានកើតឡើងលើបុរសតៃវ៉ាន់ម្នាក់ អាយុ ៣៦ ឆ្នាំ ដែលនិយមផឹកតែក្រហមជំនួសទឹកធម្មតា ដោយសារតែគិតថាវាល្អសម្រាប់សុខភាព ប៉ុន្តែគាត់ភ្ញាក់ផ្អើលពេលទៅពិនិត្យសុខភាពស្រាប់តែដឹងថា ខ្លួនបែរជាមានជំងឺខ្សោយតម្រងនោម និងទឹកនោមផ្អែមប្រភេទ២ទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត Guo Xingmei មកពីមន្ទីរពេទ្យតៃវ៉ាន់ Changhua បានបង្ហាញពីករណីអ្នកជំងឺម្នាក់ឈ្មោះ Teng Ling ដែលមកជួបគ្រូពេទ្យ ព្រោះមានអាការនោមញឹកនៅពេលយប់ ធ្វើឲ្យគេងមិនលក់ និងអស់កម្លាំងជាខ្លាំង។ គាត់មានរោគសញ្ញានេះជិតមួយឆ្នាំ ទើបដាច់ចិត្តមកពិនិត្យសុខភាព។

បន្ទាប់ពីការធ្វើតេស្តឈាមបានបង្ហាញថា HbA1c របស់គាត់ (កម្រិតជាតិស្ករក្នុងឈាម) ខ្ពស់រហូតដល់ ១៣% លើសពីធម្មតា។ វេជ្ជបណ្ឌិតបានធ្វើរោគវិនិច្ឆ័យថា គាត់មានជំងឺទឹកនោមផ្អែមប្រភេទទី ២ ។ លើសពីនេះ លទ្ធផលតេស្តប្រូតេអ៊ីន microalbumin ទឹកនោមរបស់គាត់ក៏មិនធម្មតាដែរ ដែលបង្ហាញពីជំងឺក្រលៀន ហើយនៅពេលពិនិត្យស៊ីជម្រៅ បានរកឃើញថា គាត់មានជំងឺខ្សោយតម្រងនោម ដោយសារផលវិបាកនៃជំងឺទឹកនោមផ្អែមប្រភេទទី ២។

បន្ទាប់ពីទទួលបានប្រវត្តិវេជ្ជសាស្ត្រ លោកវេជ្ជបណ្ឌិត Guo Xingmei បានរកឃើញថា លោក Teng Ling មានទម្លាប់ផឹកតែមិនល្អច្រើនហួសប្រមាណ។ ខ្លួនផ្ទាល់បាននិយាយថា «ខ្ញុំពិតជាចូលចិត្តផឹកតែក្រហមមិនគិតថ្លៃបន្ថមជាមួយស្ករ ដែលផ្សារទំនើបក្បែរផ្ទះខ្ញុំឲ្យជាញឹកញាប់ ជារឿយៗខ្ញុំយកកែវទឹកធំមួយ ហើយចាក់វាមកផឹកជំនួសទឹកធម្មតាវិញ»។

ដោយសារពួកគេគិតថាតែក្រហមល្អសម្រាប់សុខភាព លោកវេជ្ជបណ្ឌិត Guo បានពន្យល់ថា ទោះបីជាតែក្រហមមានអត្ថប្រយោជន៍ចំពោះសុខភាពក៏ដោយ ប៉ុន្តែប្រសិនបើអ្នកបន្ថែមស្ករ និងផឹកវាច្រើន ជាពិសេសផឹកវាជំនួសទឹកធម្មតាដូចលោក Teng Ling នោះវានឹងធ្វើឲ្យកម្រិតជាតិស្ករក្នុងឈាមរបស់អ្នកកើនឡើងកាន់តែលឿន។ នៅពេលដែលរាងកាយទទួលបានជាតិស្ករច្រើនពេក វានឹងធ្វើឲ្យមានជាតិខ្លាញ់ច្រើនកកកុញនៅក្នុងពោះ និងនាំឲ្យមានភាពធន់ទ្រាំនឹងអាំងស៊ុយលីន ដែលប្រសិនបើមិនបានព្យាបាលក្នុងរយៈពេលយូរអាចក្លាយជាជំងឺទឹកនោមផ្អែមប្រភេទទី២ ។

លើសពីនេះទៅទៀត ការបន្តធ្វើឲ្យកម្រិតជាតិស្ករក្នុងឈាមឡើងខ្ពស់ ទាំងមកពីការទទួលទានភេសជ្ជៈផ្អែមជាញឹកញាប់ ឬកើតពីជំងឺទឹកនោមផ្អែមក៏ធ្វើឲ្យក្រលៀនត្រូវធ្វើការធ្ងន់ធ្ងរផងដែរ ។ ដើម្បីច្រោះកាកសំណល់ពីឈាម ហើយនៅទីបំផុត ជាលិកាតម្រងនោមនឹងកាន់តែទ្រុឌទ្រោម ប្រមូលផ្តុំជាលិកាស្លាកស្នាម និងនាំឱ្ឲ្យខ្សោយតម្រងនោមជាយថាហេតុ។

យ៉ាងណា បន្ទាប់ពីនោះ វេជ្ជបណ្ឌិតបានណែនាំអ្នកឲ្យអ្នកជំងឺផ្លាស់ប្តូរទម្លាប់នៃការញ៉ាំយ៉ាងតឹងរ៉ឹង ហើយត្រូវផឹកថ្នាំគ្រប់គ្រងជាតិស្ករក្នុងឈាម និងថែទាំជំងឺតម្រងនោម និងបានជំរុញឲ្យគាត់មកពិនិត្យសុខភាពជាប្រចាំ ដើម្បីកែសម្រួលថ្នាំឲ្យសមស្របតាមស្ថានភាពរាងកាយ ។

លោកវេជ្ជបណ្ឌិត Guo Xingmei បាននិយាយថា ពីការពិនិត្យរាងកាយចុងក្រោយនេះ សុខភាពរបស់អ្នកមានភាពប្រសើរឡើងគួរឲ្យកត់សម្គាល់ ទាំងជំងឺទឹកនោមផ្អែម និងខ្សោយតម្រងនោមអាចគ្រប់គ្រងបានល្អ ហើយគ្មានសញ្ញាណាដែលថាជំងឺនេះនឹងកាន់តែធ្ងន់ធ្ងរទៅមុខទៀតនោះទេ៕

អត្ថបទ៖ សាង ស្រីល័ក្ខ

ចុចអាន៖ដើម្បីពង្រឹងភាពស៊ាំ និងចៀសឆ្ងាយពីជំងឺ ចូរធ្វើរឿង៣នេះឲ្យបានទៀងទាត់