វៀតណាមកំពុងរងគ្រោះធ្ងន់ធ្ងរដោយសារព្យុះវីពផា

ព្យុះទីហ្វុងវីពផា(Wipha) ដែលនៅក្នុងប្រទេសវៀតណាមហៅថាជាព្យុះទីហ្វុងលេខ ៣ បានវាយប្រហារយ៉ាងធ្ងន់ធ្ងរនៅភាគខាងជើង និងភាគភាគកណ្តាលប្រទេសវៀតណាម ដោយបានបំផ្លាញផ្ទះជាង ៤២០ ខ្នង និងជន់លិចដីស្រែជាង ១១៩,០០០ ហិកតា។ នេះបើយោងតាមការចេញផ្សាយរបស់ Viet Nam News នៅថ្ងៃទី២៤ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខេត្តដែលរងគ្រោះខ្លាំងជាងគេរួមមានខេត្ត Thanh Hoa, Nghe An និង Ninh Binh។ ព្យុះក៏បានបណ្តាលឱ្យមានការស្លាប់ ឬបាត់បង់សត្វពាហនៈជិត ៣,៣០០ ក្បាល និងបានបង្កឱ្យមានការខូចខាតទំនប់ចំនួន ៦ រួមទាំងមានការប្រេះស្រាំធ្ងន់ធ្ងរនៅតាមច្រាំងទន្លេក្នុងទីក្រុងហាណូយ និង Thanh Hoa។

ជាមួយគ្នានេះទំនប់វារីអគ្គិសនី Ban Ve បានកត់ត្រាកម្រិតលំហូរចូលខ្ពស់ដ៏គ្រោះថ្នាក់ ដែលជំរុញឱ្យមានការបញ្ចេញទឹកជាបន្ទាន់។ ទំនប់ទឹកជាង ៤,០០០ នៅទូទាំងប្រទេសកំពុងផ្ទុកទឹកជិតលើសសមត្ថភាព ហើយទំនប់ទឹក ៩១ កំពុងត្រូវបានជួសជុលនៅ ក្នុងងខេត្ត Nghe An ។

ភ្លៀងធ្លាក់ខ្លាំងត្រូវបានគេព្យាករណ៍ថានឹងបន្តរហូតដល់ថ្ងៃទី ២៥ ខែកក្កដា ដោយតំបន់ខ្លះរំពឹងថានឹងមានកម្រិតទឹកភ្លៀងលើសពី ២០០ មីលីម៉ែត្រ ដែលបង្កើនការភ័យខ្លាចនៃទឹកជំនន់ និងបំណាក់ដីបន្ថែមទៀត។ អាជ្ញាធរ​វៀតណាមក៏បន្តជូនដំណឹងដល់ប្រជាជនឲ្យមាន​ការ​ប្រុង​ប្រយ័ត្ន​ខ្ពស់ ខណៈ​ការ​វាយ​តម្លៃ​ការ​ខូច​ខាត និង​កិច្ច​ប្រឹង​ប្រែង​ជួយ​សង្គ្រោះ​កំពុងបន្ត៕

អត្ថបទ៖ ប៊ុន សុភាព