ថៃ កំពុងកុហកទាំង UN និងអាស៊ាន ទាំងដែលខ្លួន ឈ្លានពាននិងបាញ់កម្ពុជាមុនសោះ

ប្រទេសថៃកំពុងដើរតួកំសត់ ដោយកុហកទាំងអង្គការសហប្រជាជាតិ (UN) និងអាស៊ានថា កម្ពុជាជាអ្នកផ្តើមជម្លោះហើយខ្លួនឯងជាជនរងគ្រោះ ប្រយុទ្ធតតាំងដើម្បីការពារដែនអធិបតេយ្យ ទាំងខ្លួនឯងជាអ្នកឈ្លានពាននិងបាញ់កម្ពុជាមុនសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការភូតកុហករបស់ថៃ ថៃបានផ្ញើលិខិតទៅ UN ដោយនិយាយបំភ្លៃថា នៅថ្ងៃទី២៤ខែកក្កដាឆ្នាំ២០២៥ វេលាម៉ោង ០៨:២០នាទីព្រឹក ទាហាន​កម្ពុជា​បាន​បើក​ការ​បាញ់​ប្រហារ​ទៅ​លើ​មូលដ្ឋាន​យោធា​ថៃ​នៅប្រាសាទ​តាមាន់​ធំ បណ្ដាល​ឲ្យ​ទាហាន​ថៃ​ពីរ​នាក់​រង​របួស​ភ្លាមៗ។

ថៃបន្តកុហកថា កងទ័ពកម្ពុជាបានបើកការវាយប្រហារដោយមិនរើសមុខលើទឹកដីថៃ ឆ្លងខេត្តចំនួន៤គឺ Buriram, Surin, Si Saket និង Ubon Ratchathani លើជនស៊ីវិលថៃ បង្កគ្រោះថ្នាក់យ៉ាងធ្ងន់ធ្ងរ និងនាំឲ្យបាត់បង់ជីវិតជនស៊ីវិលស្លូតត្រង់ រួមទាំងស្ត្រី និងកុមារផងដែរ។

ថៃខំប្រតិដ្ឋថា ខ្លួនត្រូវបង្ខំចិត្តអនុវត្តសិទ្ធិការពារខ្លួន ស្របតាមធម្មនុញ្ញអង្គការសហប្រជាជាតិ ប៉ុន្តែនៅតែប្តេជ្ញាចិត្តយ៉ាងម៉ឺងម៉ាត់ចំពោះការដោះស្រាយជម្លោះដោយសន្តិវិធី និងបដិសេធដាច់ខាតនូវការប្រើប្រាស់កម្លាំងជាមធ្យោបាយដោះស្រាយជម្លោះអន្តរជាតិ។

ថៃក៏បន្តទៅភូតអាស៊ានទៀត ដោយអះអាងថា ខ្លួនចាំបាច់ត្រូវការពារដែនអធិបតេយ្យនិងពលរដ្ឋខ្លួន ទាំងតាមពិតគឺជាថៃសោះដែលឈ្លានពាននិងរំលោភអធិបតេយ្យរបស់កម្ពុជា។

សូមជម្រាបថា ភាគីកម្ពុជាមិនបានបើកការបាញ់ប្រហារទៅលើភាគីថៃមុននោះទេ ហើយក្រសួងការពារជាតិកម្ពុជា ប្រកាសថ្កោលទោសយ៉ាងដាច់អហង្ការចំពោះទង្វើឈ្លានពានយោធាយ៉ាងកម្រោល សាហាវ ឃោរឃៅ របស់ថៃ មកលើអធិបតេយ្យ និងបូរណភាពទឹកដីកម្ពុជា។

កម្ពុជាអំពាវនាវឲ្យសមាជិកសហគមន៍អន្តរជាតិ ថ្កោលទោសដោយមិនស្ទាក់ស្ទើរ និងយ៉ាងម៉ឺងម៉ាត់ ចំពោះសកម្មភាពខុសច្បាប់របស់ថៃ ហើយត្រូវឲ្យភាគីថៃទទួលខុសត្រូវទាំងស្រុងចំពោះការរំលោភបំពានដ៏កម្រោលនេះ។ កម្ពុជាអំពាវនាវឲ្យថៃបញ្ឈប់រាល់អរិភាពជាបន្ទាន់ ដកកម្លាំងទៅខាងព្រំដែនរបស់ខ្លួន និងចៀសវាងសកម្មភាពឈ្លានពានដែលអាចធ្វើឱ្យស្ថានការណ៍កាន់តែតានតឹង៕

អត្ថបទ៖ សុខ សុវណ្ណ

ចុចអាន៖ ថៃ ភូត UN ថា ប្រតិបត្តិការយោធារបស់ពួកគេ មិនប៉ះពាល់ប្រាសាទព្រះវិហារទេ ព្រោះឆ្ងាយពីនោះ ២គីឡូម៉ែត្រ