ថៃ ភូត UN ថា ប្រតិបត្តិការយោធារបស់ពួកគេ មិនប៉ះពាល់ប្រាសាទព្រះវិហារទេ ព្រោះឆ្ងាយពីនោះ ២គីឡូម៉ែត្រ 

កិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ (UNSC) បានបញ្ចប់ទៅហើយ នៅថ្ងៃទី ២៦ខែកក្កដាឆ្នាំ២០២៥ ដោយមេ UN បានត្រឹមតែអំពាវនាវឲ្យកម្ពុជា-ថៃ អត់ធ្មត់ឲ្យបានខ្ពស់ លើជម្លោះដែលថៃបាញ់ទាំងកម្រោលមុនតែប៉ុណ្ណោះ។ យ៉ាងណា ក្នុងកិច្ចប្រជុំនោះ ថៃបានខំភូតកុហក UN ថា ពួកគេធ្វើប្រតិបត្តិការយោធានៅឆ្ងាយពីប្រាសាទព្រះវិហារ២គីឡូម៉ែត្រ ពោលគឺមិនប៉ះពាល់ប្រាសាទទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពួកគេនៅតែបដិសេធរាល់ការចោទប្រកាន់របស់កម្ពុជាដែលថា កងទ័ពថៃបានប្រើប្រាស់កាំភ្លើងធំឬគ្រាប់បែកចង្កោមទៅលើប្រាសាទព្រះវិហារ ហើយអះអាងថា កងទ័ពរបស់ខ្លួនធ្វើប្រតិបត្តិការយោធាតែលើគោលដៅយោធាកម្ពុជាប៉ុណ្ណោះ ហើយមិនបានកំណត់គោលដៅលើតំបន់ស៊ីវិល ឬទីតាំងដែលមិនពាក់ព័ន្ធនឹងប្រតិបត្តិការយោធាឡើយ។

មិនត្រឹមប៉ុណ្ណឹង អ្នកនាំពាក្យកងទ័ពថៃ ក៏អះអាងដែរថា ប្រាសាទព្រះវិហារមិនស្ថិតនៅក្នុងគន្លង ឬទិសដៅនៃការបាញ់របស់កាំភ្លើងធំរបស់ថៃនោះទេ។

សម្តីរបស់ថៃ គឺជាការនិយាយមិនពិតនិងបំភ្លៃដោយមិនចេះខ្មាសមាត់ ទាំងដែលមានរូបថតនិងព័ស្តុតាងច្បាស់ៗថា ពួកគេបង្កការខូចខាតដល់ប្រាសាទព្រះវិហារនិងទម្លាក់គ្រាប់បែកចង្កោម។

កាលពីថ្ងៃទី២៤ខែកក្កដាឆ្នាំ២០២៥ យោធាថៃបានប្រើប្រាស់ អាវុធគ្រប់ប្រភេទ ដោយរាប់ទាំងគ្រាប់ផ្លោងនិងការទម្លាក់គ្រាប់បែកពីយន្តហោះ ធ្វើឲ្យប៉ះពាល់ដល់ប្រាសាទព្រះវិហារ ដែលរួមមាន ពយតាឌី កូបុរៈទី១ ទី២ ទី៣ ទី៥ ជណ្តើរខាងជើង និងតំបន់ក្បែរប្រាសាទព្រះវិហារ។

នេះជាឧក្រិដ្ឋកម្មដ៏ធ្ងន់ធ្ងរប្រឆាំងនឹងបេតិកភណ្ឌពិភពលោក និងជាការរំលោភបំពានលើច្បាប់អន្តរជាតិ ដូចនេះថៃនឹងទទួលខុសត្រូវធ្ងន់ធ្ងរទាំងផ្នែកច្បាប់ អន្តរជាតិ និងការទូត។

ទង្វើរបស់ថៃ គឺបានរំលោភយ៉ាងធ្ងន់ធ្ងរលើអនុសញ្ញាទីក្រុងឡាអេឆ្នាំ១៩៥៤ ស្តីពីកិច្ចការពារសម្បត្តិវប្បធម៌ក្នុងអំឡុងពេលជម្លោះប្រដាប់អាវុធ។ ប្រទេសដែលរំលោភអនុសញ្ញានេះ អាចប្រឈមមុខនឹងការចោទប្រកាន់ពី ឧក្រិដ្ឋកម្មសង្គ្រាម។

ម្យ៉ាង តុលាការយុត្តិធម៌អន្តរជាតិ (ICJ) បានសម្រេចរួចហើយថា ប្រាសាទព្រះវិហារជាកម្មសិទ្ធិរបស់កម្ពុជា។ ដូច្នេះការវាយប្រហារលើប្រាសាទនេះ មិនត្រឹមតែជាការវាយប្រហារលើអធិបតេយ្យភាពកម្ពុជាប៉ុណ្ណោះទេ ប៉ុន្តែវាក៏ជាការបំពានយ៉ាងច្បាស់ សេចក្តីសម្រេចរបស់តុលាការកំពូលរបស់ពិភពលោកផងដែរ។

លើសពីនេះ ការបំផ្លាញសម្បត្តិវប្បធម៌ដ៏សំខាន់ ត្រូវបានចាត់ទុកជាបទឧក្រិដ្ឋធ្ងន់ធ្ងរនៅក្នុងច្បាប់មនុស្សធម៌អន្តរជាតិ៕

អត្ថបទ៖ សុខ សុវណ្ណ

ចុចអាន៖ ថៃ ទទួលស្គាល់ថា ខ្លួនពិតជាទម្លាក់គ្រាប់បែកចង្កោមលើកម្ពុជាមែន