ព័ត៌មានអន្ដរជាតិ

ធ្លាក់យន្តហោះចម្បាំង F-35 តម្លៃ១០០លានដុល្លាររបស់អាមេរិកម្ដងទៀតហើយនៅកាលីហ្វ័រញ៉ា

បានផុស

១១ ខែ មុន

នៅ

ថ្ងៃព្រហស្បតិ៍ ៣១ កក្កដា ២០២៥

ដោយ

Chheang

យន្តហោះចម្បាំង F-35C Lightning II របស់កងទ័ពជើងទឹកអាមេរិក បានធ្លាក់នៅជិតស្ថានីយអាកាស Naval Air Station Lemoore កាលពីល្ងាចថ្ងៃទី៣០ខែកក្កដានៅរដ្ឋកាលីហ្វ័រញ៉ា ខណៈអ្នកបើកយន្តហោះបានទម្លាក់ខ្លួនចេញដោយជោគជ័យ និងមានសុវត្ថិភាព ហើយមិនមានបុគ្គលិកផ្សេងទៀតត្រូវបានរាយការណ៍ថារងរបួសនោះទេ។

ការធ្លាក់ F-35C នៅកាលីហ្វ័រញ៉ា (រូបថត៖ X)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូពីកន្លែងកើតហេតុ បានបង្ហាញថា យន្តហោះបានហុយផ្សែងខ្មៅយ៉ាងក្រាស់ និងអណ្តាតភ្លើងពេញដីចំការមួយកន្លែងចម្ងាយប្រហែលជាង៦០គីឡូម៉ែត្រពីភាគនិរតីនៃក្រុង Fresno។ មូលហេតុនៃការធ្លាក់ កំពុងស្ថិតនៅក្រោមការស៊ើបអង្កេត។

F-35C មានតម្លៃប៉ាន់ស្មានប្រហែល ១០០លានដុល្លារក្នុងមួយគ្រឿង ហើយនេះគឺជាការធ្លាក់ F-35 លើកទី២ហើយនៅក្នុងឆ្នាំ២០២៥។ កាលពីខែមករា យន្តហោះចម្បាំង F-35A របស់កងទ័ពអាកាសអាមេរិក បានធ្លាក់នៅរដ្ឋអាឡាស្កា ហើយអ្នកបើកយន្តហោះបានលោតចេញដោយសុវត្ថិភាពដូចគ្នាទៅនឹងករណីលើកនេះដែរ។

កម្មវិធីផលិត F-35 ដែលបង្កើតឡើងដោយក្រុមហ៊ុន Lockheed Martin គឺជាគំនិតផ្តួចផ្តើមយន្តហោះយោធាដ៏មានមហិច្ឆតា និងមានតម្លៃថ្លៃបំផុតមួយនៅក្នុងពិភពលោក។ យន្តហោះនេះ ត្រូវបានគេសរសើរចំពោះសមត្ថភាពបំបាំងកាយ ការបំពាក់បច្ចេកវិទ្យាទំនើប និងសមត្ថភាពដ៏អស្ចារ្យលើសមរភូមិ។ ច្រើនជាង១៧ប្រទេសលើសកលលោក បានចូលរួមនៅក្នុងគំនិតផ្ដួតផ្ដើមនៃផលិតកម្ម F-35។

ត្បិតមានសមត្ថភាពដ៏អស្ចារ្យ ក៏ F-35 បានរងការរិះគន់មិនតិចនោះដែរ ពាក់ព័ន្ធនឹងគ្រោះថ្នាក់ដែលបានកើតឡើងនាពេលថ្មីៗនេះ ហើយការស៊ើបអង្កេតកំពុងដំណើរការ ដើម្បីកំណត់ពីមូលហេតុជាក់លាក់ ដែលបណ្តាលឲ្យកើតមានឧបទ្ទវហេតុទាំងនោះ៕