ថៃ ផ្ទុះបាតុកម្ម ទាមទារឲ្យ ផែថងថាន ចុះចេញពីតំណែង មិនបាច់ចាំដល់តុលាការធម្មនុញ្ញ ចេញសាលក្រមទេ

នៅថ្ងៃសៅរ៍ទី២ខែសីហាឆ្នាំ២០២៥ ប្រជាជនថៃជាង១ម៉ឺននាក់ បានប្រមូលផ្តុំគ្នាធ្វើបាតុកម្មនៅវិមានជ័យជម្នះ ក្នុងទីក្រុងបាងកក ដើម្បីទាមទារឲ្យនាយករដ្ឋមន្ត្រី លោកស្រី ផែថងថាន ស៊ីណាវ៉ាត្រ ចុះចេញពីតំណែង ដោយមិនចាំបាច់រង់ចាំដល់តុលាការធម្មនុញ្ញ ចេញសាលក្រមនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ពីប្រទេសថៃ បាតុករក៏ទាមទារឲ្យគណបក្សទាំងឡាយក្នុងរដ្ឋាភិបាលចម្រុះ ត្រូវដកខ្លួនចេញពីរដ្ឋាភិបាលជាបន្ទាន់ផងដែរ។

បាតុកម្មនេះដឹកនាំដោយបុគ្គលចេញមុខចេញមាត់មួយចំនួនដូចជា Jatuporn Prompan, Nitithorn Lamlue និង Pichit Chaimongkol

តាមផែនការ បាតុកម្មចាប់ផ្តើមនៅម៉ោង១២រសៀល ហើយនឹងបញ្ចប់ទៅនៅម៉ោង ៩យប់ ខណៈមន្ត្រីសន្តិសុខប្រមាណ ២ ០០០នាក់ ត្រូវបានដាក់ពង្រាយ ដើម្បីធានាសុវត្ថិភាព។

បាតុកម្មនេះកើតឡើងបន្ទាប់ពីតុលា​ការ​ធម្មនុញ្ញថៃ​ បដិសេធ​​សំណើ​របស់លោកស្រី​ផែថងថាន ដែល​សុំពន្យារពេល​១៥ថ្ងៃទៀត ​ដើម្បី​ដាក់​ការ​ឆ្លើយ​បំភ្លឺ​​ជុំវិញការ​និយាយ​ទូរស័ព្ទ​ជាសម្ងាត់​ជាមួយ​សម្តេច​តេជោ ហ៊ុន សែន​ ប្រធានព្រឹទ្ធសភា​កម្ពុជា​។

នៅក្នុងសេចក្តីថ្លែងការណ៍មួយរបស់​តុលាការ​ធម្មនុញ្ញ,​ ​ក្រុម​ប្រឹក្សា​ចៅក្រម​តុលាការ​ធម្មនុញ្ញចំនួន​​៩រូប ក្នុង​នោះ​​​​​៥​រូប​​ បានយល់ព្រម​​កំណត់ពេលវេលាចុងក្រោយសម្រាប់ លោកស្រី​ ផែថងថាន ដើម្បីឆ្លើយតបនឹងការចោទប្រកាន់នៅថ្ងៃទី៤ខែសីហា ​ដោយ​បដិសេធ​​​សំណើរបស់​លោកស្រី ក្នុងការស្នើ​​ពេល​១៥ថ្ងៃ​បន្តែមទៀត​​ដើម្បីប្រមូលព័ស្តុតាងចាំបាច់ដើម្បីបញ្ចប់ការចោទប្រកាន់។

តុលាការនិយាយថា៖ «នេះជាការពន្យាពេលចុងក្រោយហើយ ប្រសិនបើគ្មានឯកសារបន្ថែមត្រូវបានដាក់ជូនត្រឹមថ្ងៃកំណត់ទេ ខ្លួន​នឹងដំណើរការសំណុំរឿងដោយផ្អែកលើភស្តុតាងដែលមានស្រាប់»​៕

អត្ថបទ៖ សុខ សុវណ្ណ

ចុចអាន៖ តុលា​ការ​ធម្មនុញ្ញថៃ​បដិសេធ​​សំណើ​របស់​ផែថងថាន ​សុំពេល​១៥ថ្ងៃទៀត​ដើម្បី​ដាក់​ការ​ឆ្លើយ​បំភ្លឺ​​