ខែវស្សាសោះ ថៃ​ បែរជាត្រូវវាយប្រហារដោយរលកកម្តៅ ខុសធម្មតា

រដូវវស្សានៅប្រទេសថៃ បានចាប់ផ្តើមជាង២ខែមកហើយ ប៉ុន្តែឆ្នាំនេះមិនដូចឆ្នាំមុនឡើយ ដោយរដូវវស្សាឆ្នាំនេះ បែរជាត្រូវរលកកម្តៅវាយប្រហារទីក្រុងបាងកកនិងខេត្តមួយចំនួន ខុសពីធម្មតាទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយកដ្ឋានឧតុនិយមថៃ, សីតុណ្ហភាពនៅទីក្រុងបាងកក នាពេលថ្ងៃត្រង់ថ្ងៃអង្គារទី៥ខែសីហា បានហក់ឡើងដល់ ៣៧អង្សាសេ ដែលមានអារម្មណ៍ថាក្តៅដូច៤៤អង្សាសេ ខណៈគេហទំព័រអាកាសធាតុ Accu Weather ព្រមានថា នេះជាកម្រិតគ្រោះថ្នាក់ខ្លាំងពណ៌ក្រហម។

ក្រៅពីបាងកក, ខេត្តភាគខាងជើងដូចជា Mae Hong Son, Chiang Mai, Chiang Rai, Phayao, Nan និង Tak ក៏រលកកម្តៅវាយប្រហារផងដែរ ដោយសីតុណ្ហភាពពេលថ្ងៃត្រង់ គឺចន្លោះពី ៣២ដល់៣៦អង្សាសេ។

ចំណែកនៅភាគឦសានឯណោះ ខេត្ត Nong Khai, Bueng Kan, Sakon Nakhon និង Nakhon Phanom ក៏ធ្ងន់ធ្ងរព្រោះរលកកម្តៅដែរ ដោយសីតុណ្ហភាពពេលថ្ងៃត្រង់ គឺចន្លោះពី ៣៤ដល់៣៧អង្សាសេ។

ងាកទៅតំបន់កណ្តាលវិញ ខេត្ត Kanchanaburi, Ratchaburi, Nakhon Pathom, Samut Songkhram និង Samut Sakhon រឹតតែធ្ងន់ធ្ងរដោយរលកកម្តៅ ពោលគឺសីតុណ្ហភាពពេលថ្ងៃត្រង់ មានចន្លោះពី ៣៦ដល់៣៨អង្សាសេឯណោះ។

វាជារឿងដែលពលរដ្ឋថៃមួយចំនួនកំពុងងឿងឆ្ងល់ថាតើហេតុអ្វីឆ្នាំនេះ ខែវស្សាប្រែជាក្តៅខ្លាំង។ យ៉ាងណា អ្នកជំនាញបានចង្អុលចំៗទៅបម្រែបម្រួលអាកាសធាតុជាសកល ហើយព្រមានឲ្យពលរដ្ឋត្រៀមខ្លួនរស់នៅក្នុងការផ្លាស់ប្តូរថ្មីៗជាបន្តទៀត៕

អត្ថបទ៖ សុខ សុវណ្ណ

ចុចអាន៖ មួយថ្ងៃ ថៃ រញ្ជួយដី ៤លើក