សវនាការ ផែថងថាន ចប់, ស្អែក ដល់វេន ថាក់ស៊ីន ឡើងតុលាការម្តង

បន្ទាប់ពីនាយករដ្ឋមន្ត្រីព្យួរតំណែងថៃ ផែថងថាន ស៊ីណាវ៉ាត្រ ចូលខ្លួនបំភ្លឺក្នុងតុលាការធម្មនុញ្ញនៅថ្ងៃព្រហស្បតិ៍ ជុំវិញសំណុំរឿង លោកស្រីរំលោភលើបទដ្ឋានសីលធម៌រដ្ឋធម្មនុញ្ញ និងបង្ហាញពីការខ្វះសុចរិតភាព, ថ្ងៃសុក្រស្អែក ត្រូវដល់វេនលោកថាក់ស៊ីនម្តង ដែលនឹងឡើងតុលាការព្រហ្មទណ្ឌ ជុំវិញការប្រមាថព្រះមហាក្សត្រថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃព្រហស្បតិ៍ លោកស្រីផែថងថាន បានឡើងតុលាការដើម្បីបំភ្លឺពាក់ព័ន្ធការបែកធ្លាយ​ឃ្លីប​សំឡេងជាមួយ​សម្ដេច​តេជោ ហ៊ុន សែន ប្រធាន​ព្រឹទ្ធសភា​កម្ពុជា ហើយសាលក្រមចុងក្រោយ នឹងប្រកាសនៅថ្ងៃទី​២៩​ខែសីហា​ឆ្នាំ​២០២៥។

នៅក្នុងសវនាការបិទទ្វារនោះ តុលាការបានសាកសួរសាក្សីសំខាន់ៗ រួមទាំងនាយករដ្ឋមន្ត្រីផ្ទាល់ និងអគ្គលេខាធិការក្រុមប្រឹក្សាសន្តិសុខជាតិផងដែរ។ ប្រធានចៅក្រម Nakarin Mekratana បំភ្លឺថា សវនាការនេះមិនបើកចំហដើម្បីផ្សព្វផ្សាយ​ជាសាធារណៈទេ ដោយលើកឡើងពីលក្ខណៈរសើប​នៃសំណុំរឿង។

តុលាការ​បាន​បញ្ជាក់​ក្នុង​ដីកា​ផ្លូវការ​ថា​៖ «​ករណី​នេះ​ជា​ការ​សម្ងាត់​ទាក់ទង​នឹង​សន្តិសុខ​របស់​រដ្ឋ។ វាហាមឃាត់អ្នកចូលរួមទាំងអស់ពីការផ្សព្វផ្សាយខ្លឹមសារនៃការសាកសួរ និងពីការបំភ្លៃការពិត ឬចំណុចនៃច្បាប់ ក្នុងលក្ខណៈដែលអាចបំភាន់សាធារណជន»។

នៅម៉ោង១០ព្រឹកថ្ងៃស្អែក ឪពុករបស់ផែថងថាន គឺលោក ថាក់ស៊ីន ក៏នឹងត្រូវឡើងតុលាការដែរ ជុំវិញការចោទប្រកាន់ពីបទប្រមាថព្រះមហាក្សត្រ ក្រោមមាត្រា ១១២ នៃក្រមព្រហ្មទណ្ឌថៃ។

បណ្តឹងនេះគឺទាក់ទងនឹងបទសម្ភាសរបស់លោកនៅប្រទេសកូរ៉េខាងត្បូង កាលពីឆ្នាំ ២០១៥ ដែលត្រូវបានចោទថាមានខ្លឹមសារប្រមាថព្រះមហាក្សត្រ។ លោកត្រូវបានដោះលែងឲ្យនៅក្រៅឃុំជាបណ្តោះអាសន្ន ប៉ុន្តែបញ្ហានេះនៅតែបន្តស្ថិតក្នុងដំណើរការនីតិវិធីតុលាការ ហើយមានលទ្ធភាពដែលលោកនឹងត្រូវជាប់ពន្ធនាគារ ប្រសិនបើតុលាការរកឃើញថាមានទោស។

តុលាការថៃបញ្ជាក់យ៉ាងច្បាស់ថា សវនាការស្អែកនេះ ក៏មិនអនុញ្ញាតឲ្យអ្នកក្រៅដែលមិនពាក់ព័ន្ធចូលក្នុងដែរ៕

អត្ថបទ៖ សុខ សុវណ្ណ

ចុចអាន៖ តុលាការធម្មនុញ្ញថៃ ហាម​​មិន​ឲ្យ​ចុះផ្សាយ​ព័ត៌មាន​លម្អិត​ពី​សវនាការ​របស់​ ផែនថនថាន ខ្លាច​ប៉ះពាល់​សន្តិសុខជាតិ