តុលាការថៃ ពន្យល់មូលហេតុដែលលោក ថាក់ស៊ីន រួចផុតពីទោស ប្រមាថព្រះមហាក្សត្រ

ទីបំផុត តុលាការថៃ បានចេញសាលក្រមថា លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ មិនមានទោសពីបទប្រមាថព្រះមហាក្សត្រទេ ហើយថែមទាំងពន្យល់ច្បាស់ៗអំពីហេតុផលនៅពីក្រោយសេចក្តីសម្រេចនេះទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Nation នៅថ្ងៃសុក្រទី២២ខែសីហាឆ្នាំ២០២៥, ហេតុផលដែលតុលាការមិនចោទប្រកាន់លោកថាក់ស៊ីន ព្រោះថា តុលាការមិនបានរកឃើញថា បទសម្ភាសន៍ដែលអតីតនាយករដ្ឋមន្ត្រីថៃរូបនេះផ្តល់ឲ្យប្រព័ន្ធផ្សព្វផ្សាយកូរ៉េខាងត្បូង កាលពីឆ្នាំ២០១៥ គឺជាការសំដៅទៅព្រះមហាក្សត្រ Bhumibol Adulyadej (រាមាទី៩) ដោយចំៗឬប្រើប្រាស់ពាក្យរាជានិយមណាមួយនោះទេ ប៉ុន្តែផ្ទុយទៅវិញ បទសម្ភាសនោះគឺសំដៅទៅលើបុរសទីបីដូចជាគាត់, ទីប្រឹក្សា, ទាហាន និងមនុស្សនៅក្នុងរង្វង់ព្រះបរមរាជវាំងជាដើម។

ម្យ៉ាងក្នុងអំឡុងពេលពិនិត្យមើលសេចក្តីថ្លែងការណ៍ តុលាការរកឃើញថា វីដេអូឃ្លីបនេះមិនបានបង្ហាញថា លោក ថាក់ស៊ីន វាយប្រហារឬរិះគន់ព្រះមហាក្សត្រឡើយ ហើយមតិមហាជនទូទៅក៏មិនបានបកស្រាយបែបនោះដែរ។

លើសពីនេះទៅទៀត ក្នុងពេលពិនិត្យមើលទំព័រ Facebook និង YouTube ដែលបានចែករំលែកបទសម្ភាសវីដេអូនោះ តុលាការរកឃើញថា អ្នកដែលចែករំលែកវីដេអូដំបូងគេ គឺយល់ថា វាគ្រាន់តែជាការវាយប្រហារទៅលើរដ្ឋប្រហារនិងការដណ្តើមអំណាចដោយយោធាប៉ុណ្ណោះ និយាយរួមគឺមិនពាក់ព័ន្ធព្រះមហាក្សត្រឡើយ។

ក្រៅ​​រួច​ពី​ទោស​ប្រមាថ​ព្រះមហាក្សត្រ លោក ថាក់ស៊ីន ក៏​​ត្រូវ​តុលាការ​លុបចោល​ការ​ចោទ​ប្រកាន់​ស្ដី​ពីឧក្រិដ្ឋកម្មកុំព្យូទ័រសម្រាប់កិច្ចសម្ភាសរបស់គាត់ជាមួយប្រព័ន្ធផ្សព្វផ្សាយកូរ៉េ​ផង​ដែរ។

សូម​បញ្ជាក់​ថា ក្រោយ​រត់​គេច​ខ្លួន​ចេញ​ទៅ​ក្រៅ​ប្រទេស​អស់​មួយ​រយៈ​ធំ លោក​ ថាក់ស៊ីន បានវិល​ចូល​​មាតុ​ប្រទេស​វិញ​កាល​​ខែ​សីហា​ឆ្នាំ​២០២៣ គឺ​នៅ​មុន​ថ្ងៃ​ដែល​សភា​ថៃ​បោះឆ្នោត​​ជ្រើស​រើស​​​​បេក្ខជន​នាយករដ្ឋមន្ត្រី​​​ចេញ​ពីគណបក្ស​ភឿថៃ ហើយ​ត្រូវ​វបាន​តុលាការ​កំពូលកាត់ទោស​​​ឲ្យ​ជាប់​ពន្ធធនាគារ ១ឆ្នាំ។

​បន្ទាប់មក លោកក៏​ត្រូវចូលសម្រាកព្យាបាលនៅមន្ទីរពេទ្យប៉ូលិស​ក្រុង​បាងកក ដែល​ជា​​ពេទ្យ​របស់ពន្ធធាគារដោយសាររូបលោកជាពិរុទ្ធជនដែលត្រូវអនុវត្តទោសរយៈពេល១២០ថ្ងៃក្នុងពន្ធនាគារ៕

អត្ថបទ៖ សុខ សុវណ្ណ

ចុចអាន៖ លោក ថាក់ស៊ីន រួច​ផុត​ពី​ទោស​ប្រមាថ​ព្រះ​មហាក្សត្រ