និស្សិត​ឥណ្ឌូណេស៊ី កាន់តែផ្ទុះកំហឹង​ក្រោយមានជន​ស៊ីវិល​ស្លាប់​ក្នុងបាតុកម្ម

យោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៩ខែសីហា និស្សិតឥណ្ឌូណេស៊ីគ្រោងនឹងប្រមូលផ្តុំគ្នានៅទីស្នាក់ការប៉ូលិសនៃទីក្រុងហ្សាកាតា បន្ទាប់ពីអ្នករត់ម៉ូតូឌុបម្នាក់បានស្លាប់ដោយសាររថយន្តប៉ូលិសបុកក្នុងអំឡុងពេលប៉ះទង្គិចគ្នាដោយហិង្សានៅខាងក្រៅសភា។

អ្នកបើកបរម៉ូតូនោះមិនមែនជាក្រុមនៃអ្នកតវ៉ានោះទេ បានស្លាប់នៅពេលដែលរថយន្តប៉ូលិសបានបើកបុក ក្នុងពេលព្យាយាមបំបែកហ្វូងបាតុករ ដោយការឧស្ម័នបង្ហូរទឹកភ្នែក និងកាណុងបាញ់ទឹក។

គួរបញ្ជាក់ថាការ​តវ៉ា​ដែល​ដឹកនាំ​ដោយ​និស្សិត​បាន​ផ្តោត​លើ​ប្រាក់​ខែ​សមាជិក​សភា មូលនិធិ​អប់រំ និង​កម្មវិធី​អាហារ​សាលា​របស់​រដ្ឋាភិបាល ដែលបាតុករចាត់ទុក្ខថាជាការផ្ដល់ឲ្យហួសហេតុពេក មិនស្មើភាពចំពោះប្រជាពលរដ្ឋក្រីក្រ។ បន្ទាប់ពីការស្លាប់របស់បុរសនោះ ក្រុមបាតុករ និងក្រុមអ្នករត់ម៉ូតូឌុបកាន់តែមានកំហឹងនឹងបានទៅតវ៉ានៅខាងក្រៅទីស្នាក់ការប៉ូលិស ដែលធ្វើឲ្យមានការបង្ក្រាបពីប៉ូលិស បង្កភាពចលាចលបន្ថែមទៀត។

ទាក់ទងនឹងបញ្ហានេះមេប៉ូលិសនៃទីក្រុងហ្សាកាតាបានសុំទោសជាសាធារណៈ ហើយសមាជិកប្រាំពីរនាក់ដែលនៅលើរថយន្តប៉ូលិសនោះត្រូវចាប់ខ្លួន ខណៈដែលការស៊ើបអង្កេតនៅតែបន្ត។ ទន្ទឹមនឹងនោះ មន្ត្រីច្បាប់ទីក្រុងហ្សាកាតា បានអំពាវនាវឱ្យមានការដោះលែងមនុស្សជាង ៦០០ នាក់ដែលត្រូវបានឃុំខ្លួនក្នុងអំឡុងពេលធ្វើបាតុកម្មប៉ុន្មានកន្លងមក៕

អត្ថបទ៖ ប៊ុន សុភាព