វត្តល្បីស័ក្តិសិទ្ធិនៅភូកេត ត្រូវដាក់ជាតំបន់គ្រាអាសន្នគ្រោះមហន្តរាយ ព្រោះបំណាក់ដីធ្ងន់ធ្ងរពេក

ប្រទេសថៃ បានសម្រេចដាក់វត្ត Koh Siray និងទីតាំងជុំវិញនោះ ជាតំបន់គ្រាអាសន្នគ្រោះមហន្តរាយ បន្ទាប់ពីការបាក់ដីដ៏សាហាវ កាលពីចុងសប្តាហ៍។ នេះបើតាមការផ្សាយរបស់ Bangkok Post នៅថ្ងៃអង្គារទី២ខែកញ្ញាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Koh Siray គឺជាវត្តដែលល្បីថាស័ក្តិសិទ្ធិ និងជាកន្លែងពេញនិយមសម្រាប់អ្នកធ្វើសមាធិក្នុងខេត្ត ភូកេត ហើយវត្តនេះក៏ល្បីឈ្មោះផងដែរ សម្រាប់ព្រះពុទ្ធរូបបដិមាដ៏ធំ ទាក់ទាញអ្នកកាន់ពុទ្ធសាសនាទៅគោរពបូជា។

ទោះបីជាយ៉ាងណាក៏ដោយ ឥទ្ធិពលនៃព្យុះ ណយហ្វា បានបង្កឲ្យមានភ្លៀងធ្លាក់ខ្លាំងចាប់តាំងពីចុងសប្តាហ៍មក បណ្តាលឲ្យបាក់ដីវាយប្រហារវត្ត ឈានដល់ការប្រកាសដាក់ក្នុងគ្រាអាសន្នតែម្តង។

ភ្លាមៗ អាជ្ញាធរមិនទាន់ចេញរបាយការណ៍អំពីជនរងគ្រោះឬការខូចខាតនៅឡើយទេ ប៉ុន្តែទីតាំងនោះ ត្រូវបានបិទ លែងឲ្យមនុស្សចេញចូលទៀតហើយ។

ជុំវិញឥទ្ធិពលនៃព្យុះណងហ្វានេះដែរ ថៃបានចេញការព្រមានរួចហើយអំពីគ្រោះធម្មជាតិដ៏កាចសាហាវ ដែលនឹងវាយប្រហារខេត្តសឹងមួយប្រទេស ​ចាប់ពីថ្ងៃអង្គារទី២ខែកញ្ញាទៅ។

នាយកដ្ឋានឧតុនិយមថៃ បានចេញសេចក្តីប្រកាសថា ខេត្តចំនួន៥១ បូករួមទាំងទីក្រុងបាងកកផងដែរ នឹងកើតមានភ្លៀងធ្លាក់ជញ្ជ្រំខ្លាំងបំផុត ទឹកជំនន់ធ្ងន់ធ្ងរ រន្ទះបាញ់និងបំណាក់ដីភ្នំដ៏កាចសាហាវ ចាប់ពី២៤ម៉ោងក្រោយទៅ។

កន្លែងដែលរងការវាយប្រហារខ្លាំងជាងគេនៅតែជាតំបន់ភាគខាងជើង ដែលមានដូចជាខេត្ត Hong Son, Chiang Mai, Lamphun, Lampang, Phrae, Uttaradit, Sukhothai, Tak, Kamphaeng Phet, Phitsanulok, Phichit និង Phetchabun។ ក្រៅពីនេះ តំបន់ដែលរងការវាយប្រហារធ្ងន់ធ្ងរផ្សេងទៀតមាននៅភាគកណ្តាលចំនួន១០ខេត្ត, ប៉ែកអាគ្នេយ៍៨ខេត្ត, ប៉ែកនិរតី៥ខេត្ត, ប៉ែកឦសាន១៨ខេត្ត និងប៉ែកខាងកើត៨ខេត្ត៕

អត្ថបទ៖ សុខ សុវណ្ណ

ចុចអាន៖ សឹងមួយប្រទេសថៃ បន្តជួបគ្រោះធម្មជាតិដ៏កាចសាហាវ រួមទាំងបាក់ដីភ្នំនិងរន្ទះបាញ់