ព័ត៌មានអន្ដរជាតិ

ចំនួនអ្នកស្លាប់ក្នុងបាតុកម្មនៅនេប៉ាល់កើនដល់ ៧២នាក់

បានផុស

១០ ខែ មុន

នៅ

ថ្ងៃចន្ទ ១៥ កញ្ញា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន Reuters ក្រសួងសុខាភិបាលនេប៉ាល់បានប្រកាសកាលពីថ្ងៃអាទិត្យថា ចំនួនអ្នកស្លាប់ដោយសារការតវ៉ាប្រឆាំងអំពើពុករលួយរបស់ប្រទេសនេប៉ាល់បានកើនឡើងដល់ ៧២ នាក់ និងជាង ២១០០ នាក់រងរបួស ខណៈសាកសពនៅតែបន្តត្រូវបានរកឃើញពីការិយាល័យរដ្ឋាភិបាល ផ្ទះ និងតាមកន្លែងធ្វើអាជីវកម្មដែលត្រូវភ្លើងឆេះអំឡុងពេលមានភាពចលាចល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការតវ៉ានេះផ្ទុះឡើងដំបូងដោយសារការបិទខ្ទប់ប្រព័ន្ធផ្សព្វផ្សាយសង្គមដ៏សំខាន់នៅក្នុងប្រទេស ហើយបានក្លាយជាអំពើហិង្សានយោបាយដ៏សាហាវបំផុតរបស់ប្រទេសនេះក្នុងរយៈពេលជាច្រើនទសវត្សរ៍មិនធ្លាប់មាន។ បាតុករដែលភាគច្រើនជាយុវជននេប៉ាល់ បានវាយប្រហារ និងដុតបំផ្លាញស្ថាប័នរដ្ឋ រួមទាំងតុលាការកំពូល សភា ប៉ុស្តិ៍ប៉ូលិស និងផ្ទះរបស់អ្នកនយោបាយ។ កងកម្លាំងសន្តិសុខបានឆ្លើយតបដោយប្រើឧស្ម័នបង្ហូរទឹកភ្នែក និងគ្រាប់កាំភ្លើងជ័រ។

វិបត្តិនេះបានបង្ខំឱ្យនាយករដ្ឋមន្ត្រីលោក K.P. Sharma Oli ប្រកាសលាលែងពីតំណែងដែលប្រព្រឹត្តទៅនៅថ្ងៃទី១០ខែកញ្ញានេះ ហើយអតីតប្រធានចៅក្រមលោកស្រី Sushila Karki នឹងស្បថចូលកាន់តំណែងជានាយករដ្ឋមន្ត្រីបណ្តោះអាសន្ន ដោយក្លាយជាមេដឹកនាំស្ត្រីដំបូងគេរបស់នេប៉ាល់។ លោកស្រីបានសន្យាផ្តល់សំណងចំនួន ១ លានរូពី (៧,១០០ដុល្លារ) ដល់គ្រួសារនៃអ្នកស្លាប់ក្នុងបាតុកម្មនិងការថែទាំសុខភាពដោយឥតគិតថ្លៃសម្រាប់អ្នករងរបួស។

លោកស្រីKarki នឹងចាប់ផ្តើមធ្វើការពីការិយាល័យបណ្ដោះអាសន្នព្រោះអគារនាយករដ្ឋមន្ត្រីត្រូវបានភ្លើងឆេះ។ លោកស្រីបានសន្យាថានឹងកសាងអ្វីដែលត្រូវបានបំផ្លាញឡើងវិញ ហើយនឹងដឹកនាំប្រទេសទៅកាន់ការបោះឆ្នោតថ្មីនៅថ្ងៃទី ៥ ខែមីនា៕