ថៃ ជួបគ្រោះរញ្ជួយដីកាន់តែញឹកញាប់ដោយរញ្ជួយដីមួយទៀតវាយប្រហារ ខេត្ត Phayao

តាមការចេញផ្សាយរបស់ The Nation រញ្ជួយដីកម្រិតស្រាល ១.៦ រ៉ិចទ័របានវាយប្រហារខេត្ត Phayao ភាគខាងជើងប្រទេសថៃទាំងកណ្ដាលអាធ្រាត្រ ខណៈរយៈពេលត្រឹមមួយសប្ដាហ៍ថៃជួបគ្រោះរញ្ជួយដីប្រមាណ៤ដងនៅក្នុងខេត្តផ្សេងគ្នា។

យោងតាមនាយកដ្ឋានអង្កេតការរញ្ជួយដីថៃ គ្រោះរញ្ជួយដីនេះបានកើតនៅវេលាម៉ោង ១២ និង០៩នាទីកណ្ដាលអាធ្រាត្រថ្ងៃអង្គារមានកម្រិត ១.៦ រ៉ិចទ័រ និងជម្រៅ ១ គីឡូម៉ែត្រ។ ចំណុចកណ្តាលនៃការរញ្ជួយដីមានទីតាំងនៅក្នុងស្រុក Dok Kham Tai ខេត្ត Phayao។

មកដល់ពេលនេះមិនមានរបាយការណ៍អំពីការខូចខាត ឬរបួសក្នុងរញ្ជួយដីនេះទេ ដោយអាជ្ញាធរ​ថៃកំពុង​តាម​ដាន​ស្ថានការណ៍​ និង​បាន​ណែនាំ​ដល់​ប្រជាពលរដ្ឋ​នៅ​តំបន់​នោះ​ឱ្យ​មាន​ការ​ប្រុង​ប្រយ័ត្ន និង​ត្រៀម​ខ្លួន​សម្រាប់​ការ​វិវឌ្ឍ​បន្ថែម​ទៀត។

គួរបញ្ជាក់ថាចាប់តាំងពីថ្ងៃទី៩ ដល់ថ្ងៃទី១៦ខែកញ្ញា ប្រទេសថៃបានជួបគ្រោះរញ្ជួយដីប្រមាណ៤ដង នៅក្នុងខេត្តផ្សេងៗគ្នា ដូចជានៅក្នុងខេត្ត Ubon Ratchathani, ឈៀងម៉ៃ, Satun និង Phayao ជាដើម។ គ្រោះរញ្ជួយដីទាំងនេះបង្ហាញថា ប្រទេសថៃកាន់តែមានហានិភ័យខ្ពស់ពីគ្រោះរញ្ជួយដី បង្កឲ្យមានការព្រួយបារម្ភក្នុងចំណោមប្រជាជនថៃ និងទាមទារឲ្យមានការប្រុងប្រយ័ត្នខ្ពស់៕

អត្ថបទ៖ ប៊ុន សុភាព