ព័ត៌មានអន្ដរជាតិ

Medvedev បដិសេធការអះអាងរបស់ ត្រាំ អំពីការដាក់ពង្រាយនាវាមុជទឹកនុយក្លេអ៊ែរក្បែរឆ្នេររុស្ស៊ី

បានផុស

១០ ខែ មុន

នៅ

ថ្ងៃព្រហស្បតិ៍ ២ តុលា ២០២៥

ដោយ

Chheang

អតីតប្រធានាធិបតីរុស្ស៊ី លោក Dmitry Medvedev កាលពីថ្ងៃពុធទី១តុលា បានច្រានចោលការអះអាងរបស់ប្រធានាធិបតីអាមេរិក លោក ដូណាល់ ត្រាំ ដែលថា នាវាមុជទឹកនុយក្លេអ៊ែររបស់អាមេរិក ត្រូវបានដាក់ពង្រាយនៅក្បែរឆ្នេរសមុទ្រប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ កាលពីថ្ងៃអង្គារបានពណ៌នា Medvedev ថាជា«មនុស្សល្ងង់ខ្លៅ» ហើយបាននិយាយថា លោកបានបញ្ជាឲ្យ«នាវាមុជទឹកមួយឬពីរគ្រឿង»ទៅជិតប្រទេសរុស្ស៊ី។ លោកធ្លាប់បានថ្លែងកាលពីខែសីហាផងដែរថា ចំណាត់ការបែបនេះត្រូវបានធ្វើឡើងដើម្បីឆ្លើយតបនឹងការគំរាមកំហែងពីលោក Medvedev។

លោក Medvedev បានចំអកការកត់សម្គាល់របស់លោក ត្រាំ នៅលើបណ្ដាញសង្គម X ដោយសរសេរជាភាសាអង់គ្លេសថា «ត្រាំ ជាថ្មីម្តងទៀតបាននាំយកនាវាមុជទឹក ដែលគាត់បាននិយាយដោយឥតព័ស្តុតាងថាបានបញ្ជូនទៅកាន់ច្រាំងសមុទ្ររុស្ស៊ី ដោយទទូចថា ពួកវាត្រូវបានលាក់ទុកយ៉ាងល្អ»។

លោកបានបន្ថែមថា៖ «ដូចពាក្យនិយាយអញ្ចឹង វាពិបាកក្នុងការរកឆ្មាខ្មៅក្នុងបន្ទប់ងងឹតណាស់ ជាពិសេសប្រសិនបើវាមិននៅទីនោះ»។

មេដឹកនាំអាមេរិក បានហៅនាវាមុជទឹកនុយក្លេអ៊ែរដែលខ្លួនអះអាងថាត្រូវបានបញ្ជូនទៅជិតប្រទេសរុស្ស៊ីថាជា«អាវុធដ៍សាហាវបំផុតមិនធ្លាប់មាន»។ លោក ត្រាំ បានប្រាប់ថា «ពួកយើងត្រូវបានគំរាមកំហែងបន្តិចបន្តួចដោយរុស្ស៊ីនាពេលថ្មីៗនេះ ហើយខ្ញុំបានបញ្ជូននាវាមុជទឹក ដែលជានាវាមុជទឹកនុយក្លេអ៊ែរ លេខមួយ អ្នកមិនអាចរកឃើញវាទេ។ យើងដើរ ២៥ឆ្នាំលឿនជាង រុស្ស៊ី និងចិន នៅក្នុងនាវាមុជទឹក»។ បន្ថែមពីនេះ លោក ត្រាំ បានសង្កត់ធ្ងន់ថា ឃ្លាំងអាវុធនុយក្លេអ៊ែររបស់អាមេរិកគឺធំជាង និងទំនើបជាងគូប្រជែងរបស់ខ្លួន។ លោកបានបញ្ជាក់ថា៖ «និយាយដោយត្រង់ទៅ បើវាពិតជាត្រូវប្រើមែន យើងមានច្រើនជាងអ្នកណាទាំងអស់។ ប៉ុន្តែ នុយក្លេអ៊ែរ មិនមែនជាពាក្យដែលគួរនិយាយញឹកញាប់ពេកទេ»៕

ដោយ៖ ឈាង