យោធា មីយ៉ាន់ម៉ា ថា អត់ធ្មត់អស់ហើយ បើប្រើអាវុធបាញ់មែននឹងមានអ្នកស្លាប់ ៥០០ នាក់ឯណោះក្នុងមួយម៉ោង

យោធាមីយ៉ាន់ម៉ាទទូចថា ខ្លួនបានអនុវត្តការអត់ធ្មត់ដោយខ្លួនឯងក្នុងការប្រើប្រាស់កម្លាំងរបស់ខ្លួនទប់ទល់នឹងក្រុមបាតុករប្រឆាំងរដ្ឋប្រហារ បើទោះបីជាមានការលើកឡើងថា ចំនួនអ្នកស្លាប់នៅតែអាចមានច្រើនឡើងៗក៏ដោយ ។

ក្រុមសិទ្ធិមនុស្សក្នុងតំបន់និយាយថា មនុស្ស ៦១៨ នាក់ហើយត្រូវបានសម្លាប់ដោយកម្លាំងសន្តិសុខនៅក្នុងការតវ៉ាទូទាំងប្រទេសដែលបានចាប់ផ្តើម បន្ទាប់ពីរដ្ឋប្រហារថ្ងៃទី ១ ខែកុម្ភៈ ។

អ្នកនាំពាក្យយោធាម្នាក់បាននិយាយកាលពីថ្ងៃសុក្រថាអាចមានអ្នកស្លាប់ ៥០០ នាក់ឯណោះក្នុងមួយម៉ោង ប្រសិនបើអាជ្ញាធរពិតជាបានប្រើអាវុធស្វ័យប្រវត្តិបាញ់ទៅលើក្រុមបាតុករមែននោះ ។

នៅថ្ងៃដដែលប្រព័ន្ធផ្សព្វផ្សាយក្នុងស្រុកបាននិយាយថា យ៉ាងហោចណាស់មានមនុស្ស ១០ នាក់បានស្លាប់នៅកណ្តាលក្រុង Bago នៅពេលដែលអាជ្ញាធរបានបាញ់ទៅលើជនស៊ីវិល ។

ទន្ទឹមនោះលោកស្រី Christine Schraner Burgener ប្រេសិតពិសេសរបស់អគ្គលេខាធិការអង្គការសហប្រជាជាតិប្រចាំនៅប្រទេសមីយ៉ាន់ម៉ាក៏បានទៅដល់ប្រទេសថៃផងដែរដែលនៅជិតខាងកាលពីថ្ងៃសុក្រ ។

លោកស្រីគ្រោងនឹងជួបជាមួយរដ្ឋមន្រ្តីក្រសួងការបរទេសថៃលោក Don Pramudwinai ហើយរំពឹងថានឹងអំពាវនាវដល់សមាគមប្រជាជាតិអាស៊ីអាគ្នេយ៍ឲ្យជួយបញ្ឈប់ការបង្ក្រាបនៅប្រទេសមីយ៉ាន់ម៉ា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ស្លាប់កើនលើស ៦០០ នាក់ហើយ ក្នុងភាពចលាចលនៅ មីយ៉ាន់ម៉ា

ចុចអាន ៖ ដើម្បី​ប្អូន​ជា​ទី​ស្រឡាញ់ បងស្រី Paing Takhon បង្ហោះ​សារ​រៀបរាប់​ទាំង​ទឹកភ្នែក សុំ ជំនួយ​ពី​ពិភពលោក ក្រោយ​ត្រូវ​ចាប់​ខ្លួន