ព័ត៌មានអន្ដរជាតិ

ហាម៉ាសទាមទារឲ្យដោះលែងសមាជិកដែលប្រយុទ្ធថ្ងៃ៧តុលា ជាថ្នូរនឹងចំណាប់ខ្មាំង

បានផុស

៨ ខែ មុន

នៅ

ថ្ងៃអង្គារ ៧ តុលា ២០២៥

ដោយ

Chheang

យោងតាមការចុះផ្សាយរបស់ The Telegraph ក្រុមហាម៉ាសបានទាមទារឲ្យមានការដោះលែងក្រុមសកម្មប្រយុទ្ធដែលពាក់ព័ន្ធនឹងការវាយប្រហារកាលពីថ្ងៃទី៧ខែតុលាលើប្រទេសអ៊ីស្រាអែល។ ការទាមទារនេះ ធ្វើឡើងអំឡុងពេលការចរចាបទឈប់បាញ់ និងដោះលែងចំណាប់ខ្មាំងដោយប្រយោល ជាមួយអ៊ីស្រាអែលនៅក្នុងទីក្រុងគែវ ដែលសម្របសម្រួលដោយសហរដ្ឋអាមេរិក កាតា និងអេហ្ស៊ីប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហាម៉ាស ត្រូវគេរាយការណ៍ថាបានស្នើសុំឲ្យសមាជិកនៃអង្គភាពឥស្សរជន Nukhba របស់ខ្លួនដែលបានដឹកនាំការវាយលុកកាលពីថ្ងៃទី៧ខែតុលាឆ្នាំ២០២៣ត្រូវបានបញ្ចូលទៅក្នុងបញ្ជីនៃជនជាតិប៉ាឡេស្ទីនដែលបានកំណត់សម្រាប់ការដោះលែង ជាថ្នូរនឹងចំណាប់ខ្មាំងអ៊ីស្រាអែលដែលនៅតែត្រូវបានឃុំខ្លួនក្នុងតំបន់ហ្គាហ្សា។

ការទាមទារនេះ បង្កជាបញ្ហាប្រឈមដ៏ធំមួយសម្រាប់អ៊ីស្រាអែល ដែលកន្លងមកបានបដិសេធឥតឈប់ឈរក្នុងការដោះលែងអ្នកដែលត្រូវបានចាប់ខ្លួនក្នុងអំឡុងការវាយប្រហារកាលពីថ្ងៃទី៧ខែតុលា ដោយលើកឡើងពីផលប៉ះពាល់ផ្នែកនយោបាយ និងសន្តិសុខនៃទង្វើបែបនេះ។

សារព័ត៌មាន Channel 12 របស់អ៊ីស្រាអែល បានចុះផ្សាយថា ក្រុមហាម៉ាសក៏ចង់ឲ្យមានការដោះលែងអ្នកទោស ដែលមានឋានៈខ្ពស់ជាច្រើននាក់ ដែលជាប់ពន្ធនាគារអស់មួយជីវិតពីបទរៀបចំការវាយប្រហារក្នុងអំឡុងពេលចលនាប្រឆាំងអ៊ីស្រាអែលកាលពីឆ្នាំ២០០០ដល់ឆ្នាំ២០០៥ផងដែរ។

នៅក្រោមគ្រោងការណ៍បណ្តោះអាសន្ននៃកិច្ចព្រមព្រៀងដែលផ្តល់ដោយអាមេរិក អ៊ីស្រាអែលនឹងដោះលែងជនជាតិប៉ាឡេស្ទីនចំនួន ២៥០នាក់ ក្នុងចំណោមជនជាតិប៉ាឡេស្ទីន ២៨៥នាក់ដែលកំពុងជាប់ពន្ធនាគារអស់មួយជីវិត។ មន្ត្រីអ៊ីស្រាអែលត្រូវបានគេរំពឹងថានឹងវេតូការទាមទាររបស់ហាម៉ាស ក្នុងការដោះលែងសមាជិកជាន់ខ្ពស់នៃក្រុមសកម្មប្រយុទ្ធប៉ាឡេស្ទីន ដោយក្នុងនោះមានទាំងលោក Marwan Bargouti ដែលជាមេដឹកនាំ Fatah ដ៏មានប្រជាប្រិយដែលប្រជាជនប៉ាឡេស្ទីនមួយចំនួនមើលឃើញថាជាប្រធានាធិបតីនាពេលអនាគតដ៏មានសក្តានុពល។

រដ្ឋមន្ត្រីសន្តិសុខជាតិអ៊ីស្រាអែលលោក Itamar Ben-Gvir និងមន្ត្រីសន្តិសុខជាច្រើននាក់ទៀត តាមសេចក្តីរាយការណ៍បានព្រមាននាយករដ្ឋមន្ត្រី បេនចាមីន ណេតាន់យ៉ាហ៊ូ ប្រឆាំងនឹងការដោះលែងអ្នកជាប់ឃុំដែលមានឋានៈខ្ពស់បែបនេះ។

ការចរចាបានបន្តកាលពីថ្ងៃចន្ទនៅទីក្រុងរមណីយដ្ឋានអេហ្ស៊ីប Sharm el-Sheikh ដោយមានគណៈប្រតិភូមកពីអ៊ីស្រាអែល ក្រុមហាម៉ាស និងតំណាងសហរដ្ឋអាមេរិកចូលរួមដោយប្រយោល។ អ្នកចរចាអ៊ីស្រាអែលលោក Ron Dermer នឹងទៅដល់នាថ្ងៃអង្គារទី៧ខែតុលានេះ ដោយមានការចូលរួមពីបេសកជនរបស់ប្រធានាធិបតីអាមេរិក ដូណាល់ ត្រាំ គឺលោក Steve Witkoff និងលោក Jared Kushner។

លោក ត្រាំ បានជំរុញឲ្យភាគីទាំងអស់«ចាត់វិធានការយ៉ាងលឿន» ឆ្ពោះទៅរកកិច្ចព្រមព្រៀងមួយ ដោយនិយាយថា «ដំណាក់កាលទីមួយ»ពាក់ព័ន្ធនឹងការដោះលែងចំណាប់ខ្មាំងជាថ្នូរនឹងអ្នកទោស គួរតែត្រូវបានបញ្ចប់នៅសប្តាហ៍នេះ។

ការខ្វែងគំនិតគ្នានៅតែមានលើពេលវេលានៃការដកកងកម្លាំងការពារអ៊ីស្រាអែល (IDF) ចេញពីតំបន់ហ្គាហ្សា និងយន្តការសម្រាប់ការរំសាយអាវុធក្រោមផែនការសន្តិភាព ២០ចំណុចរបស់លោក ត្រាំ។ សំណើនេះអំពាវនាវឲ្យហ្កាហ្សាក្លាយជាតំបន់គ្មានយោធាដែលគ្រប់គ្រងដោយកងកម្លាំងស្ថិរភាពអន្តរជាតិ ដែលទំនងជាមានកងទ័ពអារ៉ាប់៕

ដោយ៖ ឈាង