៥ ចំណុចសំខាន់ៗត្រូវដឹងអំពីវ៉ាក់សាំងស៊ីណូវ៉ាក់ (Sinovac)

កាលពីថ្ងៃទី ១ ខែមិថុនា ឆ្នាំ ២០២១ អង្គការសុខភាពពិភពលោក (WHO) បានអនុម័ត វ៉ាក់សាំងស៊ីណូវ៉ាក់ (Sinovac) សម្រាប់ការប្រើប្រាស់ជាបន្ទាន់។ នេះមានន័យថា វ៉ាក់សាំងស៊ីណូវ៉ាក់ត្រូវបានគេវាយតម្លៃដោយបានបំពេញតាមស្តង់ដារអន្តរជាតិ សុវត្ថិភាព ប្រសិទ្ធភាព និងផលិតកម្ម។

ខាងក្រោមជាចំណុចសំខាន់ៗចំនួន ៥ ដែលគួរដឹងអំពីវ៉ាក់សាំងនេះ៖

១. ប្រើវីរុសអសកម្មដើម្បីផលិត

អ្នកប្រហែលជាបានស្គាល់វ៉ាក់សាំង Pfizer-BioNTech និង Moderna ដែលប្រើ “បច្ចេកវិទ្យា mRNA” ជាបច្ចេកវិទ្យាថ្មីដើម្បីអភិវឌ្ឍវ៉ាក់សាំង។

សម្រាប់ ស៊ីណូវ៉ាក់ បច្ចេកវិទ្យាដែលចូលរួមក្នុងការបង្កើតវ៉ាក់សាំងនេះគឺខុសគ្នាពីវ៉ាក់សាំងទាំងពីរខាងលើ។ វាប្រើសំណុំភាគល្អិតនៃវីរុសអសកម្មដើម្បីបង្កឱ្យប្រព័ន្ធភាពស៊ាំរបស់រាងកាយឆ្លើយតបប្រឆាំងទៅនឹងវីរុស។ មិនមែនជារឿងថ្មីទេសម្រាប់វិធីសាស្ត្រប្រើវីរុសអសកម្មនេះ ព្រោះគេធ្លាប់ប្រើវាជាងមួយសតវត្សរ៍ហើយ! បច្ចេកវិទ្យានេះត្រូវបានប្រើអភិវឌ្ឍវ៉ាក់សាំងល្បីៗ ជាច្រើនដូចជា វ៉ាក់សាំងជំងឺរលាកថ្លើមប្រភេទ A ប្រភេទ B  វ៉ាក់សាំងផ្តាសាយ និងវ៉ាក់សាំង HPV ។

២. អត្រាប្រសិទ្ធភាពវ៉ាក់សាំងស៊ីណូវ៉ាក់មានប្រហែលនឹងវ៉ាក់សាំងផ្តាសាយទូទៅ

ការសិក្សាកន្លងមកបង្ហាញថា ប្រសិទ្ធភាពរបស់ស៊ីណូវ៉ាក់អាចការពារការចម្លងពី ៥១ ទៅ ៨០ ភាគរយសម្រាប់អ្នកដែលបានចាក់គ្រប់ពីរដូស។ ទោះបីប្រសិទ្ធភាពរបស់វាអាចហាក់ដូចជាទាបជាងវ៉ាក់សាំងកូវីដ-១៩ផ្សេងទៀត តែអត្រាប្រសិទ្ធភាពនេះក៏មិនខុសគ្នានឹងវ៉ាក់សាំងផ្តាសាយប៉ុន្មានដែរ។ យោងតាមមជ្ឈមណ្ឌលគ្រប់គ្រងនិងបង្ការជំងឺឆ្លង (CDC) សហរដ្ឋអាមេរិកនិយាយថា សូម្បីវ៉ាក់សាំងផ្តាសាយទូទៅក៏មានអត្រាប្រសិទ្ធភាពចន្លោះពី ៤០ ទៅ ៦០ ភាគរយ ដែលនេះមានន័យថា វ៉ាក់សាំងស៊ីណូវ៉ាក់ មានប្រសិទ្ធភាពប្រហែលទៅនឹងវ៉ាក់សាំងផ្តាសាយ។

៣. វ៉ាក់សាំងស៊ីណូវ៉ាក់ជួយរារាំងការចូលសម្រាកក្នុងមន្ទីរពេទ្យ ១០០ ភាគរយ

យោងតាមអង្គការសុខភាពពិភពលោកអះអាងថា ថ្នាំបង្ការកូវីដ-១៩ ស៊ីណូវ៉ាក់ត្រូវបានណែនាំឱ្យប្រើប្រាស់ចំពោះមនុស្សពេញវ័យដែលមានអាយុចាប់ពី ១៨ ឆ្នាំឡើងទៅ តាមរយៈការចាក់ពីរដង ក្នុងគម្លាតរយៈពេលពី ២ ទៅ ៤ សប្តាហ៍។ ក្នុងនោះការសិក្សាបង្ហាញថា ក្រោយចាក់វ៉ាក់សាំងស៊ីណូវ៉ាក់បានពីរលើករួចរាល់អាចរារាំងមិនឱ្យមានអ្នកជំងឺកូវីដ-១៩ចូលសម្រាកនៅមន្ទីរពេទ្យ ១០០ ភាគរយ ។ នេះមានន័យថា ចាក់វ៉ាក់សាំងបានពេញលេញមានប្រសិទ្ធភាពក្នុងការការពាររោគសញ្ញា COVID-19 ធ្ងន់ធ្ងរ ព្រមទាំងការពារការចូលមន្ទីរពេទ្យបានផងដែរ។

៤. ស៊ីណូវ៉ាក់បានអនុម័តឱ្យប្រើប្រាស់នៅក្នុង ២៥ ប្រទេសទូទាំងពិភពលោក

វ៉ាក់សាំង Sinovac បច្ចុប្បន្នត្រូវបានអនុម័តនិងប្រើប្រាស់នៅតាមបណ្តាប្រទេសជាច្រើននៅលើពិភពលោកដូចជា ប្រទេសចិន ឥណ្ឌូណេស៊ី សិង្ហបុរី កម្ពុជា ថៃ អាមេរិកខាងត្បូង និងប្រទេសជាច្រើនទៀត។ យោងតាមអង្គការសុខភាពពិភពលោក វ៉ាក់សាំងស៊ីណូវ៉ាក់ នឹងផ្ដល់ជូនកាន់តែច្រើនលានដូសទៀត ជាពិសេសសម្រាប់ប្រទេសកំពុងអភិវឌ្ឍន៍។

៥. ងាយស្រួលរក្សាទុក

វ៉ាក់សាំងប្រើបច្ចេកវិទ្យា mRNA ដូចជា Pfizer-BioNTech និង Moderna ពិបាកក្នុងការទុកដាក់។ វាតម្រូវឱ្យរក្សាទុកនៅសីតុណ្ហភាពបង្កកខ្លាំងក្រោមសូន្យអង្សាសេ ដែលនេះក្លាយជាបញ្ហាប្រឈមសម្រាប់ប្រទេសមួយចំនួន។ ផ្ទុយទៅវិញ វ៉ាក់សាំងស៊ីណូវ៉ាក់មានអត្ថប្រយោជន៍សំខាន់មួយគឺភាពងាយស្រួលក្នុងការទុកដាក់។

វ៉ាក់សាំង Sinovac អាចរក្សាទុកក្នុងសីតុណ្ហភាពទូទឹកកកស្តង់ដារពី ២ ទៅ ៨ អង្សាសេ។ សីតុណ្ហភាពប៉ុណ្ណេះមានប្រយោជន៍ខ្លាំងសម្រាប់ប្រទេសកំពុងអភិវឌ្ឍន៍ជាច្រើនដែលមិនស្ថិតនៅក្នុងសីតុណ្ហភាពត្រជាក់ខ្លាំង។ ហើយនេះក៏ធ្វើឱ្យវ៉ាក់សាំងស៊ីណូវ៉ាក់មានភាពងាយស្រួលក្នុងការដឹកជញ្ជូន និងកាន់តែងាយស្រួលសម្រាប់ការប្រើប្រាស់ផងដែរ៕

ប្រែសម្រួល៖ សន្យា

ប្រភព៖ rafflesmedicalgroup

ចុចអាន៖ ស្រាយចម្ងល់ ករណីចាក់វ៉ាក់សាំងការពារកូវីដ-១៩ប្រភេទខុសគ្នា

ចុចអាន៖ លម្អិតអំពីវ៉ាក់សាំង Sinovac ដែលទទួលស្គាល់ដោយ WHO