ក្រោយជាសះស្បើយពីកូវីដ-១៩ អ្នកជំងឺអាចប្រឈមនឹងរោគសញ្ញាពិបាកទាំងនេះ

ក្រោយជាសះស្បើយពីកូវីដ-១៩ អ្នកជំងឺជាងពាក់កណ្ដាលអាចបន្តរោគសញ្ញារយៈពេលវែង រហូតដល់ ៦ខែ ឬលើសពីនេះ អាស្រ័យតាមលក្ខខណ្ឌសុខភាពរបស់ពួកគេម្នាក់ៗ។

មនុស្សក្នុងចំណោមនោះ ពួកគេមិនត្រឹមតែប្រឈមនឹងបញ្ហាសុខភាពផ្លូវកាយប៉ុណ្ណោះទេ ថែមទាំងមានវិបត្តិផ្លូវចិត្ត រយៈពេលយូរ យ៉ាងហោច ៦ខែ បន្ទាប់ពីចេញពីមន្ទីរពេទ្យ។

អ្នកនិពន្ធអត្ថបទសិក្សា លោក Paddy Ssentongo និងជាជំនួយការសាស្ត្រាចារ្យស្រាវជ្រាវពីមជ្ឈមណ្ឌលប្រព័ន្ធប្រសាទនៅ សាកលវិទ្យាល័យ Park រដ្ឋ Pennsylvania សហរដ្ឋអាមេរិក មានប្រសាសន៍ថា អ្នកជាសះស្បើយ មិនមែនជាភ្លាម រួចក៏ចប់នោះទេ ពួកគេត្រូវប្រឈមនឹងបញ្ហាផ្លូវចិត្ត ដើម្បីប្រយុទ្ធគ្នាជាមួយកូវីដ-១៩ រយៈពេលវែងបន្ថែមទៀត។

ការស្រាវជ្រាវដែលបានធ្វើទៅលើមនុស្សជាង ២៥ ម៉ឺននាក់ កំលុងខែធ្នូ ឆ្នាំ ២០១៩ រហូតដល់ខែមីនា ឆ្នាំ ២០២១ បានរកឃើញថា អ្នកជំងឺភាគច្រើន (៧៩%) មានវិបត្តិហិរញ្ញវត្ថុ បន្ទាប់ពីសម្រាកព្យាបាលមួយេរយៈ។

ទិន្នន័យសិក្សាបញ្ជាក់ទៀតថា មនុស្សជាងពាក់កណ្តាល ក្រោយចេញពីពេទ្យ មានការស្រកទម្ងន់ អស់កម្លាំង ក្តៅខ្លួន ឬឈឺខ្លួនប្រាណ ខណៈអ្នកខ្លះទៀត មានបញ្ហាក្នុងការចល័តចុះឡើង ហើយស្ទើរតែ១ភាគ៤មានការលំបាកក្នុងការផ្តោតអារម្មណ៍។

ក្រៅពីនោះ អ្នកជំងឺខ្លះមានជំងឺថប់បារម្ភទូទៅ។ ចំណែកសល់ខ្លះទៀត មានបញ្ហាដកដង្ហើម ហើយជិត ១ភាគ៥ មានបញ្ហាជ្រុះសក់ ឬឡើងកន្ទួលលើស្បែក។

មិនទាន់អស់នៅឡើយ អ្នកជំងឺមួយចំនួនក៏ប្រឈមនឹងការឈឺទ្រូង ឬញ័រទ្រូង និងប្រឈមជំងឺបេះដូង ឈឺពោះ ខ្វះចំណង់អាហារ រាក និងក្អួតផងដែរ។

យ៉ាងណាមិញ អ្នកជំងឺមិនសុទ្ធតែមានគ្រប់រោគសញ្ញាទាំងអស់នេះឡើយ ហើយក្នុងចំណោមនោះ មានខ្លះបន្តចេញអាការតែមួយខែឬពីរខែប៉ុណ្ណោះ។

ការរកឃើញនេះត្រូវបានបោះពុម្ពផ្សាយតាមអ៊ីនធើណេត នៅក្នុងទស្សនាវដ្ដី JAMA Network Open៕

ប្រែសម្រួល៖ សន្យា

ប្រភព៖ UPI

ចុចអាន៖ អ្នកជាសះស្បើយពីកូវីដ មានហានិភ័យខ្ពស់នៃការដាច់សរសៃឈាមខួរក្បាលនិង គាំងបេះដូង មួយឆ្នាំក្រោយ

ចុចអាន៖ អ្នកជាសះស្បើយពី ដែលតា មានអង់ទីគ័រការពារបានល្អដូចចាក់វ៉ាក់សាំងពីរដូស