ហូបប៉ះគីង្គក់ពុល ត្រូវដឹងពីរោគសញ្ញា និងវិធីសាស្ត្រជួយសង្រ្គោះអ្នកជំងឺទាន់ពេលវេលា

ការស្លាប់ដោយហូបសាច់គីង្គក់ ត្រូវបានគេរាយការណ៍ជាញឹកញាប់ រៀងរាល់ឆ្នាំ។ ដោយសារតែគីង្គក់ ជាសត្វឆាប់បញ្ចេញក្រពេញទឹករំអិល ជាពិសេស នៅលើស្បែករបស់វា។

គ្រោះថ្នាក់​នៃ​ជាតិ​ពុលពីសត្វ​គីង្គក់

​វេជ្ជបណ្ឌិត Suthimon Thamtecho មកពី​មន្ទីរពេទ្យ Chulalongkorn បាន​និយាយ​ថា ​គីង្គក់​មានផ្ទុកជាតិពុល digitaloids ដែល​មាន​ឥទ្ធិពល​ខ្លាំង​លើដំណើរការ​នៃ​បេះដូង និង​ប្រព័ន្ធ​ប្រសាទ។ ខណៈ​ពេល​ដែល​មនុស្ស​បរិភោគ​សាច់​គីង្គក់ ស្បែក ​និង​ពង​របស់​វា។

អ្នកជំងឺភាគច្រើន ទទួលរងការពុលដោយការ​បរិភោគ​ស្បែក ឈាម សាច់សត្វ ឬពងគីង្គក់ ។ ដោយសារ​ជាតិ​ពុល​មាន​ភាព​ធន់​នឹង​កម្ដៅ ដែល​មិន​ងាយ​ចេញពីស្បែកឡើយ។

រោគសញ្ញា​ប្រសិន​បើ​ពុល​គីង្គក់

រោគសញ្ញានៃការពុលគីង្គក់ ជាធម្មតាកើតឡើងក្នុងរយៈ​ពេល​មួយ​ម៉ោង​ បន្ទាប់​ពី​ការ​ទទួលទាន ភាព​ធ្ងន់ធ្ងរ​របស់​វា​អាស្រ័យ​ទៅ​លើ​បរិមាណ​ជាតិ​ពុល​ដែល​ទទួល​បានដូចជា ៖

-ចេញ​ទឹកមាត់ច្រើនខុសពីធម្មតា
-ក្អួតចង្អោរខ្លាំង វិលមុខធីងធោងពិបាកក្នុងខ្លួន
-ឈឺពោះ រាគ​ស្ទើរខ្សោះខ្លួនជាដើម។

ប្រសិនបើរោគសញ្ញាមានសភាពធ្ងន់ធ្ងរខ្លាំង នោះអ្នកជំងឺនឹង​មានរោគសញ្ញាប្រព័ន្ធប្រសាទដូចជា ច្របូកច្របល់ ភ្លេចភ្លាំង ​ប្រកាច់​ឬ​បាត់បង់​ស្មារតី ជាពិសេសថែមទាំងមានរោគសញ្ញានៃប្រព័ន្ធឈាមរត់​ដូចជា arrhythmia ដែលអាច​បណ្តាល​ឲ្យ​បរាជ័យ នៃ​ប្រព័ន្ធ​ឈាមរត់ក្នុងខ្លួនមិនខាន។

ការ​ព្យាបាល​អ្នក​ជំងឺ​ដែល​មាន​ជាតិពុល​ពី​គីង្គក់

សាស្ត្រាចារ្យ Satriya Trakulsrichai នៃនាយកដ្ឋានវេជ្ជសាស្ត្រសង្គ្រោះបន្ទាន់ នៃមន្ទីរពេទ្យ Ramathibodi បាន​និយាយ​ថា ប្រសិនបើអ្នកជំងឺបានហូប​សាច់គីង្គក់​ដោយចៃដន្យ ហើយមាន​រោគ​សញ្ញា​មិន​ប្រក្រតី។ សូម​ប្រញាប់រុះរាន់ទៅ​ជួប​គ្រូពេទ្យ​ ឲ្យ​បាន​ឆាប់​តាម​ដែល​អាច​ធ្វើទៅបាន ។ ដើម្បី​ឆាប់​ទទួល​ការ​ព្យាបាល​ដ៏​ត្រឹមត្រូវ​ ចៀសវាងព្យាបាលខ្លួនឯង ​នាំ​មាន​គ្រោះថ្នាក់​ធ្ងន់​ដល់​សុខភាព៕​

ប្រែសម្រួល៖ សាង ស្រីល័ក្ខ

ចុចអាន៖គីមឈី មានប្រយោជន៍មែនពិត តែក៏មានគុណវិបត្តិធ្ងន់ បើហូបលើសកម្រិតខ្លាំង

ចុចអាន៖ជប់ខ្យល់ ជាវិធីព្យាបាលបែបបុរាណ តើជួយអីបានខ្លះ?