ថៃ​​បញ្ជាក់​​ពី​​ ការ​​សង្ស័យ​​ជំងឺ​​អុត​​ស្វា​៣​ករណី​ តាម​ពិត​​​គឺ​​ជំងឺ​​ពង​បែក

នាយកដ្ឋាន​គ្រប់​គ្រង​ជំងឺ (DDC) របស់​ប្រទេស​ថៃ​បាន​ធ្វើ​ការ​បញ្ជាក់​ថា​ មានការ​សង្ស័យ​​ជំងឺ​អុត​ស្វា​៣​ករណី​ តាម​ពិត​គឺ​ជា​ជំងឺ​ពង​បែក (ហ៊ើភិស ឬHerpes)។

លោក​វេជ្ជបណ្ឌិត​ Opas Karnkawinpong អគ្គនាយក DDC កាល​ពី​ថ្ងៃ​អាទិត្យ​បាន​និយាយ​ថា លទ្ធផល​នៃ​ការ​ធ្វើ​ពិសោធ​របស់​នាយកដ្ឋាន​វិទ្យាសាស្ត្រ​សុខាភិបាល និង មជ្ឈមណ្ឌលវិទ្យាសាស្ត្រសុខាភិបាលស្តីពី​ការ​លេច​ឡើង​ជំងឺឆ្លងរបស់​កាកបាទក្រហមថៃនៅ​សាកល​វិទ្យាល័យ Chulalongkorn ​បាន​បញ្ជាក់​ថា ករណី​សង្ស័យ​ទាំង​៣​នោះ​មិន​មែន​ជា​ជំងឺ​អុត​ស្វា​ឡើយ។ រហូត​ដល់​ពេល​​នេះ មិន​មាន​ការ​ឆ្លង​ជំងឺ​អុត​ស្វា​ត្រូវ​បាន​រក​ឃើញ​ក្នុង​ប្រទេស​ទេ។

មនុស្ស​៣​នាក់​​ដែល​សង្ស័យ​​ឆ្លង​ជំងឺ​អុត​ស្វាកំពុង​សម្រាក​ព្យាបាល​នៅ​​វិទ្យាស្ថាន​ជំងឺ​ឆ្លង Bamrasnaradura។ ការិយាល័យ​ជំងឺ​រាត​ត្បាត​របស់ DDC នឹង​ធ្វើ​ការ​បញ្ជាក់​ដល់​អ្នក​សារព័ត៌មាន​ជុំ​វិញ​បញ្ហា​នេះ​នៅ​ល្ងាច ថ្ងៃ​ចន្ទ ទី​៣០ ខែ​ឧសភា​នេះ។

លោក​វេជ្ជបណ្ឌិត Opas ​បាន​និយាយ​ថា នរណា​ម្នាក់​ដែល​មាន​ករណី​ស្រដៀង​នឹង​ជំងឺ​អុត​ស្វាត្រូវ​​ធ្វើ​តេស្ត និង​ពិនិត្យ​រក​ជំងឺ។ វិធាន​ការ​ទប់​ស្កាត់​សុខភាព​សាធារណៈ​នៅ​អាកាស​យានដ្ឋាននឹង​ដាក់​បញ្ចូល​ទាំង​នីតិវិធី​​ត្រួត​ពិនិត្យ​កម្រិត​ខ្ពស់​ផង​ដែរ។

លោក​បានបន្ថែម​ថា ជាធម្មតាអ្នកជំងឺកើតជំងឺ​អុត​ស្វា​​អាចជាសះស្បើយក្នុងរយៈពេល ២​ទៅ​៤សប្តាហ៍ ប្រសិនបើពួកគេមិនវិវត្តទៅជាជំងឺអន្តរកម្មដូចជា រលាកខួរក្បាល រលាកសួត​ជា​ដើម៕