សិង្ហបុរី មានអ្នកឆ្លងជំងឺអុតស្វា ក្នុងសហគមន៍ លើកដំបូង

ក្រសួងសុខាភិបាលសិង្ហបុរី បានបញ្ជាក់ពីករណីក្នុងសហគមន៍លើកដំបូង នៃការឆ្លងជំងឺស្វានៅ។

អ្នកជំងឺជា​ជនជាតិ​ម៉ាឡេស៊ី ភេទ​ប្រុស អាយុ​៤៥​ឆ្នាំ ស្នាក់នៅ​ប្រទេស​សិង្ហ​បុរី​។ ក្រសួង​និយាយ​ថា បុរសរូបនេះ ​បាន​ធ្វើ​តេស្ត​វិជ្ជមាន​ចំពោះ​ជំងឺ​ស្វា​កាលពី​ថ្ងៃ​ពុធ ៦ ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្នគាត់ទទួលការព្យាបាល នៅមជ្ឈមណ្ឌលជាតិសម្រាប់ជំងឺឆ្លង (NCID) ហើយស្ថានភាពរបស់គាត់ មិនជាបញ្ហាអ្វីនោះទេ។

បុរស​រូប​នេះ ​មិន​ជាប់​ពាក់ព័ន្ធ​នឹង​ករណី​នាំ​ចូល ​ដែល​ក្រសួងប្រកាស​ នៅ​ថ្ងៃ​ទី ២១ ខែ​មិថុនា​ឡើយ។

គាត់បានកើតដំបៅស្បែកផ្នែកខាងក្រោមពោះ លើកដំបូងនៅថ្ងៃទី ៣០ ខែមិថុនា ហើយក្រោយមក មានអាការអស់កម្លាំង និងហើមកូនកណ្តុរនៅថ្ងៃទី ២ ខែកក្កដា។

រួចមក គាត់បានកើតគ្រុនក្តៅ និងឈឺបំពង់កនៅថ្ងៃទី ៤ ខែកក្កដា ហើយបានទៅមន្ទីរពេទ្យ រួចក៏ត្រូវបានគេធ្វើតេស្ត។

ទោះលទ្ធផលតេស្តអវិជ្ជមានក៏ដោយ គាត់ត្រូវបានបញ្ជូនទៅ NCID នៅថ្ងៃទី ៦ ខែកក្កដា ជាកន្លែងដែលគាត់ត្រូវបានគេធ្វើតេស្តវិជ្ជមាន និងដាក់ឲ្យនៅដាច់ដោយឡែក សម្រាប់ការវាយតម្លៃបន្ថែមទៀត។

គិតត្រឹមថ្ងៃព្រហស្បតិ៍នេះ ទំនាក់ទំនងជិតស្និទ្ធបីនាក់ ត្រូវបានកំណត់អត្តសញ្ញាណ។

អ្នកដែលមានទំនាក់ទំនងជិតស្និទ្ធទាំងអស់ នឹងត្រូវបានដាក់ឲ្យនៅដាច់ដោយឡែក រយៈពេល ២១ ថ្ងៃ ខណៈការតាមដានទំនាក់ទំនងផ្សេងទៀតកំពុងបន្ត៕

ប្រែសម្រួល៖ Vann Vann

ប្រភព៖ CNA

ចុចអាន៖ WHO ថា ជំងឺអុតស្វា មិនទាន់ជាភាពអាសន្នសុខភាពសកលទេ