មន្ត្រីជំនាញសុខាភិបាលបង្ហាញវិធីសាស្ត្រ៤យ៉ាងការពារសុខភាពចៀសផុតពីជំងឺធ្ងន់ធ្ងរ

មន្ត្រីជំនាញក្រសួងសុខាភិបាលបានបង្ហាញពីវិធីសាស្ត្រចំនួន៤ដើម្បីការពារ និងថែរក្សាសុខភាពឱ្យបានល្អប្រសើរ​ចៀសផុតពីជំងឺលើសសម្ពាធឈាម ជំងឺទឹកនោមផ្អែមនិងជំងឺបេះដូងជាដើមដែលកំពុងកើតមានទៅលើពលរដ្ឋកម្ពុជាគួរឱ្យព្រួយបារម្ភ។

លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលបានឱ្យដឹងថា វិធីសាស្ត្រចំនួន៤ដែលអាចការពារសុខភាពបានល្អ និងកុំឱ្យឆ្លងជំងឺមិនឆ្លងធ្ងន់ធ្ងររួមមានទី១កុំពិសារប្រៃពេក ផ្អែមពេក កុំពិសារខ្លាញ់ពេក និងត្រូវឧស្សាហ៍ហាត់ប្រាណឱ្យបានទៀតទាត់ និងជាប្រចាំយ៉ាងហោចណាស់ឱ្យបាន៣០នាទីទៅ១ម៉ោងដែរពេលទំនេរពីការងារ។

ការណែនាំនេះដោយមានការព្រួយបារម្ភថា បច្ចុប្បន្នការកើនឡើងនៃជំងឺមិនឆ្លងកំពុងវាយលុកខ្លាំងជាងជំងឺឆ្លងទៅទៀតនៅប្រទេសកម្ពុជាដែលធ្វើឱ្យប៉ះពាល់ដល់សុខភាពសាធារណៈដូចជាជំងឺលើសសម្ពាធឈាម ជំងឺទឹកនោមផ្អែមនិងជំងឺបេះដូងជាដើម។ព្រោះជំងឺឆ្លងយើងមើលឃើញភ្លាមៗហើយអាចទប់ស្កាត់បានទាន់ពេលវេលា។ ដោយឡែកជំងឺមិនឆ្លងវិញជាជំងឺស្ងៀមស្ងាត់យើងមិនដឹងខ្លួនជាមុនទេ។

លោកស្រីបានបន្តថា «បើអ្នកពិសារគ្រឿងស្រវឹងច្រើនវានឹងវិវត្តន៍ទៅជាក្រិនថ្លើមហើយយូរៗទៅវាទៅជាជំងឺមហារីកថ្លើម អ្នកខ្លះមានជំងឺលើសសម្ពាធឈាម ទឹកនោមផ្អែមនិងជំងឺបេះដូងឬជំងឺគាំងបេះដូងធ្វើឱ្យពិការខ្លួនអស់មួយជីវិតទៀតផង»។

លោកស្រីបានបន្ថែមទៀតថា «យើងត្រូវចូលរួមគិតទាំងអស់គ្នាហើយការងារសុខភាពនេះវាមិនមែនជាកម្មសិទ្ធិផ្តាច់មុខសម្រាប់វិស័យសុខាភិបាលនោះទេការងារនេះវាទាមទារឱ្យមាការចូលរួមពីបុគ្គលរៀងៗខ្លួនគ្មានគ្រូពេទ្យណាដែលល្អជាងខ្លួនេងនោះទេចាប់តាំងពីដឹងក្តីមករហូតមកដល់ធំគឺមានតែខ្លួនឯងទេដែលចេះគិតគូរនិងជាអ្នកដឹកនាំក្នុងការថែទាំសុខភាពរបស់ខ្លួនវិវត្តន៍ទៅល្អឬមិនល្អនោះ»។

លោកស្រីបានបញ្ជាក់ថាបន្ថែមពីនេះទៀតត្រូវធ្វើអនាម័យខ្លួនប្រាណ និងដៃឱ្យបានស្អាតព្រោះថាការធ្វើអនាម័យដៃនេះមានសារសំខាន់នាស់លក្នុងការការពារជំងឺផ្សេងៗពីព្រោះថាក្នុង១ថ្ងៃៗដៃរបស់យើងមិនដឹងជាបានប៉ះពាល់អ្វីខ្លះនោះទេហើយក៏មិនដឹងថាមានមេរោគអ្វីដែលបានទុំជាប់នឹងដៃដែរ។

ដូចនេះមានតែឧស្សាហ៍លាងដៃជាមួយទឹក និងសាប៊ូ ជែលឬអាកុលទេទើបអាចសំលាប់មេរោគដែលនៅទុំជាប់ដៃបានហើយបើមិនសំអាតទេមេរោគទាំងនោះនឹងចម្លងចូលក្នុងខ្លួនរបស់យើងបានយ៉ាងងាយតារយៈការយលដៃទៅប៉ះនឹងត្រចៀក ច្រមុះ ភ្នែកមាត់និងសក់ក្បាល៕

អត្ថបទ៖ សំអឿន