ក្រសួងសុខាភិបាល ពង្រឹងទប់ស្កាត់ជំងឺឆ្លង ពិសេស Mpox តាមអាកាសយានដ្ឋានអន្តរជាតិ

មន្ត្រីក្រសួងសុខាភិបាល នៅថ្ងៃ ទី២៧ ខែសីហា ឆ្នាំ២០២៤ នេះ បានពង្រឹងវិធានការទប់ស្កាត់ជំងឺឆ្លង ដោយចុះត្រួតពិនិត្យតាមច្រកចេញចូលអន្តរជាតិ តាមបណ្ដាអាកាសយានដ្ឋានធំៗក្នុងប្រទេស ដើម្បីបង្ការទប់ស្កាត់ការហូរចូលអ្នកជំងឺឆ្លងនានា ពិសេសជំងឺ Mpox។

លោក​ ​ក្រស​ សារ៉ាត់ ទីប្រឹក្សាក្រសួង​ និងជានាយកមន្ទីរសុខាភិបាល និងក្រុមការងារប្រយុទ្ធនឹងជំងឺឆ្លង សហការជាមួយ មន្ត្រីគ្រប់គ្រងអាកាយានដ្ឋានអន្តរជាតិអង្គរ​ ខេត្តសៀមរាប បានទៅពិនិត្យកន្លែងច្រកចេញចូលនៅព្រលានយន្តហោះអន្តរជាតិ ជាពិសេសបានពិនិត្យម៉ាស៊ីនកំដៅទាំង ៣ គ្រឿងដែលមាននៅច្រកចូលព្រលាន និងបានធ្វើការណែនាំមន្រ្តី ប្រចាំការយកចិត្តទុកដាក់បញ្ហាជំងឺឆ្លងនានា ជាពិសេសជំងឺឆ្លងថ្មីអឹមផក​។

ចំណែក លោកស្រី​ លឹម​ សាមាន​ ទីប្រឹក្សាក្រសួង​ និងជានាយកមន្ទីរសុខាភិបាល និងក្រុមការងារប្រយុទ្ធនឹងជំងឺឆ្លង សហការជាមួយ ប្រធាន​គ្រប់គ្រងអាកាយានដ្ឋានអន្តរជាតិកោងកេង ខេត្តព្រះសីហនុ បានទៅពិនិត្យកន្លែងច្រកចេញចូលនៅព្រលានយន្តហោះអន្តរជាតិ ជាពិសេសបានពិនិត្យម៉ាស៊ីនកំដៅ ទាំង ២ គ្រឿងដែលមាននៅច្រកចូលព្រលាន នឹងបានធ្វើការណែនាំមន្រ្តី ប្រចាំការយកចិត្តទុកដាក់បញ្ហាជំងឺឆ្លងនានា ជាពិសេសជំងឺឆ្លងថ្មីអឹមផក​ ដែលក្រសួងសុខាភិបាលបានជូនដំណឹង។

គិតត្រឹមថ្ងៃទី២៦ ខែសីហា​ ឆ្នាំ២០២៤​ នេះ​ នាយកដ្ឋានប្រយុទ្ធនឹងជំងឺឆ្លង CDC​ មិនទាន់រកឃេីញករណីជំងឺ​ អឹមផក​ (mpox) ប្រភេទថ្មី​ Clad 1b ដែលជាមេរោគឆ្លងខ្លាំងនៅឡេីយទេ​។ នាយកដ្ឋានកំពុងតាមដានយ៉ាងសកម្មតាមព្រំដែន​ ចេញ-ចូល​ ទាំងអស់​ និងទូទាំងផ្ទៃប្រទេស​។ សូមបងប្អូនរាយការណ៍ជាបន្ទាន់មកលេខ​ ១១៥​ បេីជួបករណីសង្ស័យ​ អឹមផក​។ ចាប់ពីឆ្នាំ២០២៣​ ដល់​ឆ្នាំ២០២៤​ នាយកដ្ឋានធ្លាប់បានរកឃេីញជំងឺអឹមផកប្រភេទចាស់​ (Clade 2) ចំនួន ២០ ​ករណី​ សុទ្ធតែភេទប្រុស​ និងបានព្យាបាលពីសំណាក់គ្រូពេទ្យជំនាញជាសះស្បេីយទាំងអស់​។

គួរបញ្ជាក់ថា នាយកដ្ឋានប្រយុទ្ធនឹងជំងឺឆ្លង CDC បានឱ្យដឹងថា ជំងឺអឹមផក ឆ្លងតាមរយៈការរួមភេទគ្រប់ទម្រង់ ជាមួយអ្នកជំងឺនេះ និងការប៉ះពាល់ដោយផ្ទាល់នឹងកន្លែងមានដំបៅ ទឹកមាត់ តំណក់តូចៗតាមផ្លូវដង្ហើមរបស់អ្នកជំងឺ និងឆ្លងតាមរយៈការប្រើប្រាស់សម្ភារដែលប្រឡាក់ប្រឡូកជាមួយនឹងវីរុសអុតស្វា រួមមាន សម្លៀកបំពាក់ ពូក កន្សែង ឬសម្ភារ ស្លាបព្រា ចាន កែវទឹក។ល។ វីរុសអុតស្វា ឆ្លងពីម្តាយទៅកូនតាមរយៈទងសុក ក្នុងអំឡុងពេល ឬក្រោយពេលសម្រាលតាមរយៈការប៉ះពាល់ផ្ទាល់ បើស្ត្រីមានផ្ទៃពោះ ឬឪពុកម្តាយមានជំងឺអឹមផក។

ចំណែកវិធានការបង្ការការចម្លងជំងឺអឹមផក​​ (Mpox) គឺត្រូវប្រើប្រាស់ស្រោមអនាម័យរាល់ពេលរួមភេទ និងចៀសវាងមានដៃគូរួមភេទច្រើន។ ចៀសវាងប៉ះពាល់ជាមួយអ្នកដែលមានចេញរោគសញ្ញាជំងឺអឹមផក និងការប៉ះផ្ទាល់ជាមួយតំណក់ទឹកចេញពីផ្លូវដង្ហើម ឬសារធាតុរាវតាមមាត់របស់អ្នកជំងឺអឹមផក។ ហាមប៉ះពាល់ជាមួយសម្លៀកបំពាក់ កម្រាលពូក ខ្នើយ ឬកន្លែងពោះគោ ឬចាន ស្លាបព្រា ឬពែង ឬផ្ទៃនៃទីតាំង ដែលអ្នកមានជំងឺអឹមផកប្រើប្រាស់។ ត្រូវលាងសម្អាតដៃជាមួយទឹក និងសាប៊ូ ជែលលាងដៃ ឬអាល់កុលលាងដៃ។

ចំពោះបុគ្គលដែលសង្ស័យ ឬបញ្ជាក់ថា មានជំងឺអឹមផក ត្រូវតែដាក់ឱ្យនៅដាច់ដោយឡែករហូតដល់ក្រមរជ្រុះអស់ និងទទួលលទ្ធអវិជ្ជមានវីរុសអុតស្វា។ ចំណែក បុគ្គលដែលផ្តល់ការថែទាំអ្នកជំងឺអឹមផកត្រូវការពារខ្លួនដោយពាក់ម៉ាស លាងដៃពេលប៉ះពាល់ជាមួយអ្នកជំងឺ។ រីឯបុគ្គលដែលមានរោគសញ្ញាដូចជា កន្ទួលរមាស់ជាមួយពងទឹកនៅលើមុខ បាតដៃ ជើង ដងខ្លួន ភ្នែក មាត់ ឬប្រដាប់ភេទ គ្រុនក្តៅ ហើមកូនកណ្តុរ ឈឺក្បាល ឈឺសាច់ដុំ និងឈឺចង្កេះ អស់កម្លាំង សូមប្រញ៉ាប់ទៅមណ្ឌលសុខភាព ឬមន្ទីរពេទ្យដែលនៅជិតលោកអ្នកបំផុត។

គួរឱ្យដឹងដែរថា ចាប់ពីឆ្នាំ២០២៣​ ដល់​ឆ្នាំ២០២៤​ នាយកដ្ឋានប្រយុទ្ធនឹងជំងឺឆ្លង CDC ធ្លាប់បានរកឃើញជំងឺអឹមផកប្រភេទចាស់​ (Clade 2) ចំនួន ២០​ករណី​ សុទ្ធតែភេទប្រុស​ និងបានព្យាបាលពីសំណាក់គ្រូពេទ្យជំនាញជាសះស្បើយទាំងអស់​៕

អត្ថបទ៖ ច័ន្ទ វីរៈ