សុខភាព

មន្ត្រីជំនាញសុខាភិបាល ៖ ការលាងសម្អាតដៃឱ្យបានត្រឹមត្រូវអាចកាត់បន្ថយ ការចម្លងរោគផ្សេងៗ រហូតដល់ទៅ ៧០%

បានផុស

១ year មុន

នៅ

ថ្ងៃពុធ ៣០ មេសា ២០២៥

ដោយ

មន្ត្រីជំនាញសុខាភិបាល បានឱ្យដឹងថា ការលាងសម្អាតដៃឱ្យបានត្រឹមត្រូវវាពិតជាមានសារសំខាន់ណាស់ព្រោះវាអាចកាត់បន្ថយការចម្លងរោគផ្សេងៗ រហូតដល់ទៅ ៧០% ជួយលើកស្ទួយជីវភាពគ្រួសារកាន់តែរីកចម្រើនថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងទិវាលាងដៃក្រោមប្រធានបទការលាងដៃសង្គ្រោះជីវិតដែលរៀបចំឡើងដោយមន្ទីរពេទ្យកុមារជាតិសហការជាមួយអង្គការកយកា នៅព្រឹកថ្ងៃទី ៣០ មេសានេះ លោកវេជ្ជបណ្ឌិត ញឹប អង្គាបុស្ស ប្រធានមន្ទីរពេទ្យកុមារជាតិ បានមានប្រសាសន៍ថា ការលាងដៃជាវិធីមួយសាមញ្ញ តែជាវិធីមួយចាំបាច់សម្រាប់មនុស្សគ្រប់ៗ គ្នា ហើយការលាងសម្អាតដៃឱ្យបានត្រឹមត្រូវវាពិតជាមានសារសំខាន់ណាស់ ព្រោះវាអាចកាត់បន្ថយការចម្លងរោគផ្សេងៗ រហូតដល់ទៅ ៧០% ពិសេសនៅក្នុងមន្ទីរពេទ្យដែលត្រូវការចាំបាច់នូវការសម្អាតអនាម័យ និងបរិស្ថានស្អាត រួមទាំងលាងសម្អាតដៃ។

លោកវេជ្ជបណ្ឌិត បានបន្តថា ការលាងដៃនេះមិនមែនធ្វើតែនៅមន្ទីរពេទ្យទេ ពោលគឺត្រូវធ្វើនៅតាមផ្ទះ និងទីសាធារណៈផ្សេងៗ ព្រោះថាមេរោគមិនមែនមានតែនៅក្នុងមន្ទីរពេទ្យទេ គឺមានគ្រប់ទីកន្លែងដែលមិនស្អាត និងមិនមានអនាម័យ។

លោកវេជ្ជបណ្ឌិត បានបន្តទៀតថា «បច្ចុប្បន្ននេះនរណាក៏បានលាងដៃដែរ តែមានមនុស្សមួយចំនួនលាងដៃមិនបានត្រឹមត្រូវបណ្តាលឱ្យឆ្លងរោគផ្សេងៗ មកពីលាងមិនស្អាតនេះ។ ដូចនេះការប្រារព្ធពិធីនេះ ដើម្បីបង្ហាញពីរបៀបលាងសម្អាតដៃដល់មាតាបិតា កុមារ និងកុមារដែលបាននាំកូនមកពិគ្រោះជំងឺ ឬសម្រាកនៅមន្ទីរពេទ្យឱ្យបានយល់ដឹង ដើម្បីធ្វើឱ្យការលាងដៃបានស្អាតល្អ និងបន្តផ្សព្វផ្សាយទៅសមាជិកក្រុមគ្រួសារនៅផ្ទះ ឬសហគមន៍កាត់បន្ថយការឆ្លងជំងឺផ្សេងៗ»។

លោកវេជ្ជបណ្ឌិតបានបន្ថែមថា «ដៃរបស់យើងតែងតែប៉ះពាល់ទៅនឹងវត្ថុផ្សេងៗ ហើយមានភ្ជាប់មេរោគចូលទៅក្នុងខ្លួនយើង ហើយមេរោគទាំងនោះ នឹងបន្តទៅចម្លងដល់អ្នកផ្សេងទៀតនៅពេលដែលយើងមិនបានលាងសម្អាតដៃឱ្យបានត្រឹមត្រូវទេនោះ»។

លោកវេជ្ជបណ្ឌិត បានអំពាវនាវដល់ប្រជាពលរដ្ឋ ត្រូវបន្តអនុវត្តវិធានការ ៣ រួមមាន ការរស់នៅស្អាត ហូបស្អាត និងផឹកស្អាត ឱ្យបានខ្ជាប់ខ្ជួន ជួយបន្ថយការឆ្លងមេរោគ ធ្វើឱ្យសុខភាពល្អ កាត់បន្ថយការចំណាយក្នុងការព្យាបាលជំងឺ និងអាចប្រកបរបរចិញ្ចឹមជីវិតបានកាន់តែប្រសើរ ព្រមទាំងធ្វើឱ្យជីវភាពគ្រួសារកាន់តែរីកចម្រើន។

លោកស្រី Shin Jung yeon (ស៊ីន ជុង យ៉ន) អនុប្រធានតំណាងការិយាល័យ កយកា ប្រចាំនៅកម្ពុជា សង្ឃឹមថា មន្ទីរពេទ្យកុមារជាតិ នឹងក្លាយជាមន្ទីរពេទ្យគំរូមួយដែលចូលរួមយ៉ាងសកម្មក្នុងការលាងដៃ ហើយសង្ឃឹមថា កុមារកម្ពុជា នឹងយល់ពីសារសំខាន់ នៃការលាងដៃ ដើម្បីការពារការឆ្លងមេរោគផ្សេងៗ និងការពារជីវិត។