មន្ទីរសុខាភិបាល៖ រយៈពេល៦ខែឆ្នាំនេះ ខេត្តសៀមរាប មានករណីជំងឺគ្រុនឈាមជាង ១ពាន់ករណី តែមិនធ្ងន់ធ្ងរទេ

បើតាមមន្ត្រីជំនាញនៃមន្ទីរសុខាភិបាលខេត្តសៀមរាប បានឲ្យដឹងថា រយៈពេល៦ខែ ឆ្នាំ២០២៥នេះ ខេត្តសៀមរាប មានករណីជំងឺគ្រុនឈាម ១,៥៦០ករណី ធៀបនឹងរយៈពេលដូចគ្នាឆ្នាំ២០២៤ កើនឡើងជាង២០០ករណី ដែលកំពុងសម្រាកព្យាបាលនៅខេត្តសៀមរាប ប៉ុន្តែចំនួនករណីនេះមន្ត្រីជំនាញថានៅមិនទាន់ស្ថិតក្នុងកម្រិតធ្ងន់ធ្ងរនៅឡើយ។

មន្ត្រីជំនាញបានឲ្យដឹងទៀតថា ក្នុងចំណោម ១,៥៦០ករណី ដែលកំពុងព្យាបាលខាងលើ មានតែជាង៦០០ករណីប៉ុណ្ណោះដែលជាអ្នកខេត្តសៀមរាប ក្រៅពីនោះជាអ្នកជំងឺដែលមកពីបណ្ដាខេត្តផ្សេងៗ មកទទួលសេវាព្យាបាលជំងឺនៅខេត្តសៀមរាប។ ទោះយ៉ាងណា ករណីនេះក៏បានបង្ហាញពីប្រព័ន្ធសុខាភិបាលដែលកាន់តែមានសមត្ថភាពក្នុងការរកឃើញ និងរាយការណ៍បានត្រឹមត្រូវ ក្នុងការចូលរួមបង្ការនូវហានិភ័យនៃជំងឺនេះ។ មន្ត្រីជំនាញ ក៏បានបញ្ជាក់ថា ក្នុងរយៈពេល៦ខែដូចគ្នានេះ បើគិតប៉ុន្មានឆ្នាំចុងក្រោយនេះ នៅឆ្នាំ២០២៣ មានជិត ២,០០០ករណី និងឆ្នាំ២០២៤ មានជិត ១,៣០០ករណី ខណៈឆ្នាំ២០២៥ មាន១,៥៦០ករណី ។ ដោយឡែកបើគិតរយៈពេល១ឆ្នាំពេញវិញ ឆ្នាំ២០២៣មានចំនួនរហូតជាង១ម៉ឺនករណី ប៉ុន្តែនៅឆ្នាំ២០២៤ បានចុះមកត្រឹមតែជាង៣,៦០០ករណីប៉ុណ្ណោះ ។ ករណីនេះបានបង្ហាញឲ្យឃើញពីការយកចិត្តទុកដាក់ខ្ពស់ក្នុងការបង្ការ ការពារលើសុខុមាលភាពរបស់ប្រជាពលរដ្ឋពីសំណាក់មន្ត្រីជំនាញសុខាភិបាលជុំវិញករណីជំងឺគ្រុនឈាមនេះ។

ស្របពេលជាមួយគ្នានេះ រដ្ឋបាលខេត្តសៀមរាប រួមនឹងមន្ត្រីសុខាភិបាល និងអ្នកពាក់ព័ន្ធ ក៏នៅតែបន្តបើកយុទ្ធនាការ និងចុះផ្សព្វផ្សាយជាប្រចាំ ដោយយកចិត្តទុកដាក់ខ្ពស់លើការជំរុញឲ្យមានការការពារ និង ការកាត់បន្ថយ ឈានទៅរកការលុបបំបាត់ជំងឺគ្រុនឈាមក្នុងសហគមន៍។

រយៈពេលចុងក្រោយនេះ មន្ត្រីជំនាញបានចុះទៅតាមមូលដ្ឋាននានា ដើម្បីដាក់ថ្នាំអាប៊ែត នៅតាមដែនសមត្ថកិច្ចរបស់ខ្លួន និងតាមគោលដៅសំខាន់ៗ ដូចជាភូមិដែលមានហានិភ័យខ្ពស់ជាដើម ។ ជាមួយគ្នានេះ អាជ្ញាធរ និងមន្ត្រីជំនាញ ក៏សូមអំពាវនាវឲ្យប្រជាពលរដ្ឋបន្តបង្កើនការប្រុងប្រយ័ត្ន ចំពោះជម្ងឺគ្រុនឈាម ជាពិសេសនៅក្នុងរដូវភ្លៀងនេះ ត្រូវធ្វើការបំបាត់នូវទីជម្រកសត្វមូសខ្លា និងសម្អាតនៅជំវិញគេហដ្ឋានរបស់ខ្លួន នៅតាមសហគមន៍មូលដ្ឋាន និង សាលារៀនផងដែរ ៕

ដោយ៖ គឿនវេត