ហេតុផល​មិន​គួរ​ញ៉ាំ​បបរ​ពេល​ព្រឹក និង​អាហារ​ដែលគួរ​ចៀសវាង​

អាហារពេលព្រឹកគឺជាអាហារដ៏សំខាន់សម្រាប់រាងកាយ ដូច្នេះអាហារល្អតែងតែជាអាទិភាពកំពូល។ ទោះជាយ៉ាងណាក៏ដោយ អ្វីដែលត្រូវញ៉ាំសម្រាប់អាហារពេលព្រឹកក៏ជាអ្វីដែលត្រូវចងចាំផងដែរ ដើម្បីបង្កើនប្រសិទ្ធភាពសម្រាប់សុខភាព។

ហេតុអ្វីបានជាអ្នកមិនគួរញ៉ាំបបរនៅពេលព្រឹក?

កាលពីមុន មនុស្សជាច្រើនតែងតែជ្រើសរើសទទួលទានបបរជាអាហារពេលព្រឹក ព្រោះវាមានលក្ខណៈសាមញ្ញក្នុងការរៀបចំ និងងាយស្រួលក្នុងការទទួលទាន។ ទោះជាយ៉ាងណាក៏ដោយ បបរពិតជាមិនមែនជាជម្រើសដ៏ល្អសម្រាប់អាហារពេលព្រឹកនោះទេ ដោយសារហេតុផលសំខាន់ៗដូចខាងក្រោមនេះ៖

-បបរត្រូវបានផ្សំឡើងជាចម្បងនៃកាបូអ៊ីដ្រាត ដែលជារឿយៗខ្វះប្រូតេអ៊ីន និងជាតិសរសៃ។ ជាអាហារសំខាន់បំផុតប្រចាំថ្ងៃ អាហារពេលព្រឹកត្រូវការផ្តល់ថាមពល និងសារធាតុចិញ្ចឹមគ្រប់គ្រាន់សម្រាប់រាងកាយ ដើម្បីរក្សាសកម្មភាពពេញមួយថ្ងៃ។ ទោះជាយ៉ាងណាក៏ដោយ បបរមានតម្លៃអាហារូបត្ថម្ភទាប ហើយមិនអាចបំពេញតម្រូវការអាហារូបត្ថម្ភចម្រុះរបស់រាងកាយបានទេ។

-បបរមានសន្ទស្សន៍ glycemic ខ្ពស់ដែលអាចនាំឲ្យមានការឡើងចុះជាតិស្ករក្នុងឈាមយ៉ាងងាយស្រួល។ ការទទួលទានបបរជាអាហារចម្បងក្នុងរយៈពេលយូរអាចបង្កើនហានិភ័យនៃជំងឺរ៉ាំរ៉ៃដូចជាជំងឺទឹកនោមផ្អែម។

ដូច្នេះហើយ ថ្វីដ្បិតតែបបរមានភាពងាយស្រួលក្នុងការរំលាយក៏ដោយ វាមិនស័ក្តិសមជាអាហារចម្បងសម្រាប់អាហារពេលព្រឹកនោះទេ។ ជំនួសឲ្យបបរ យើងអាចជ្រើសរើសអាហារសម្បូរប្រូតេអ៊ីនដូចជា ស៊ុត ទឹកដោះគោ តៅហ៊ូ ហើយផ្សំវាជាមួយផ្លែឈើ និងបន្លែដែលសម្បូរទៅដោយជាតិសរសៃ និងវីតាមីនដូចជា នំបុ័ងស្រូវសាលីទាំងមូល oats ផ្លែប៉ោម ចេក។

ប្រសិនបើអ្នកនៅតែចង់ញ៉ាំបបរសម្រាប់អាហារពេលព្រឹក អ្នកគួរតែបន្ថែមអាហារដែលសំបូរទៅដោយប្រូតេអ៊ីនដូចជា សាច់ ស៊ុត ត្រី បង្គា ផ្សិត និងបន្លែ និងផ្លែឈើសមស្រប។ អាហារពេលព្រឹកដ៏ល្អគួរតែសម្បូរទៅដោយប្រូតេអ៊ីន ខ្លាញ់គ្រប់គ្រាន់ និងបន្លែបៃតង មិនមែនម្សៅច្រើនទេ។

អាហារដែលគួរចៀសវាងសម្រាប់អាហារពេលព្រឹក

អាហារពេលព្រឹកដែលមានជីវជាតិនឹងមិនត្រឹមតែផ្តល់ថាមពល និងអាហារូបត្ថម្ភគ្រប់គ្រាន់សម្រាប់រាងកាយប៉ុណ្ណោះទេ ប៉ុន្តែថែមទាំងជួយរក្សាលំនឹងកម្រិតជាតិស្ករក្នុងឈាម ចៀសវាងការឃ្លានខ្លាំងពេក ឬញ៉ាំច្រើនពេក។

យោងតាមអ្នកជំនាញ ខាងក្រោមនេះគឺជាអាហារដែលគួរចៀសវាងសម្រាប់អាហារពេលព្រឹក ដើម្បីធានាបាននូវសុខភាពល្អ៖

អាហារចៀន

អាហារបំពង ដូចជា នំប៉ោង នំចៀន និងនំដូណាត់ មានប្រជាប្រិយភាពដោយសារភាពស្រួយ និងឆ្ងាញ់របស់វា។ ទោះជាយ៉ាងណាក៏ដោយ អាហារទាំងនេះអាចបង្កគ្រោះថ្នាក់ដល់សុខភាពជាច្រើន។ ក្នុងអំឡុងពេលនៃការចៀន អាស៊ីតខ្លាញ់នៅក្នុងអាហារត្រូវបានកត់សុីនៅសីតុណ្ហភាពខ្ពស់ បង្កើតបានជាសមាសធាតុបង្កគ្រោះថ្នាក់ជាច្រើនដូចជា អាស៊ីតអាគ្រីឡាមីត និងអាស៊ីតអាគ្រីលីក។ ការទទួលទានសមាសធាតុទាំងនេះក្នុងរយៈពេលយូរអាចបង្កគ្រោះថ្នាក់ដល់រាងកាយ។

លើសពីនេះ អាហារចៀនមានកាឡូរីច្រើន ដែលអាចនាំឲ្យថាមពលលើសបានយ៉ាងងាយ ដោយហេតុនេះបង្កបញ្ហាដូចជាធាត់ និងខ្លាញ់ក្នុងឈាមខ្ពស់។ ដូច្នេះ ព្យាយាម​ចៀសវាង​អាហារ​ចៀន​ជា​អាហារ​ពេលព្រឹក ហើយ​ជ្រើសរើស​វិធី​ចម្អិន​ដែល​ល្អ​សម្រាប់​សុខភាព​ដូចជា ចំហុយ ស្ងោរ និង​ដុតនំ។

អាហារដែលមានជាតិស្ករ

អាហារដែលមានជាតិស្ករខ្ពស់ដូចជា នំបុ័ងផ្អែម នំខេក និងនំប៊ីសស្ទីន ក៏ជាអាហារពេលព្រឹកដ៏ពេញនិយមផងដែរ។ ថ្វីដ្បិតតែវាងាយស្រួលញ៉ាំក៏ដោយ ប៉ុន្តែការទទួលទានជាប្រចាំរយៈពេលវែងអាចបង្កគ្រោះថ្នាក់ដល់សុខភាព។ អាហារដែលមានជាតិស្ករខ្ពស់អាចបណ្តាលឲ្យកម្រិតជាតិស្ករក្នុងឈាមកើនឡើងយ៉ាងឆាប់រហ័ស ដែលជំរុញឲ្យមានការបញ្ចេញអាំងស៊ុយលីន។ ការប្រើប្រាស់រយៈពេលយូរអាចនាំឲ្យមានភាពធន់នឹងអាំងស៊ុយលីន និងបង្កើនហានិភ័យនៃជំងឺទឹកនោមផ្អែម។

លើសពីនេះ អាហារដែលមានជាតិស្ករខ្ពស់អាចប៉ះពាល់ដល់តុល្យភាពមេតាបូលីសក្នុងរាងកាយ ដែលនាំឲ្យមានការប្រមូលផ្តុំជាតិខ្លាញ់ និងធាត់។ ដូច្នេះហើយ យើងគួរតែព្យាយាមចៀសវាងការទទួលទានអាហារដែលមានជាតិស្ករច្រើន ហើយជ្រើសរើសអាហារដែលមានជាតិស្ករតិច ឬគ្មានជាតិស្ករ ជាជម្រើសសម្រាប់អាហារពេលព្រឹក។

សាច់កែច្នៃ

សាច់កែច្នៃដូចជា Ham និង bacon តែងតែលេចឡើងនៅលើតុអាហារពេលព្រឹក ដោយសារតែភាពងាយស្រួលរបស់វា។ ប៉ុន្តែ សាច់កែច្នៃទាំងនេះមានផ្ទុកជាតិខ្លាញ់ អំបិល និងសារធាតុបន្ថែមខ្ពស់ ដែលអាចបង្កគ្រោះថ្នាក់ដល់រាងកាយ ប្រសិនបើទទួលទានក្នុងរយៈពេលយូរ។

សារធាតុបន្ថែមនៅក្នុងសាច់កែច្នៃដូចជា nitrates អាចត្រូវបានបំប្លែងទៅជាសារធាតុបង្កមហារីកនៅក្នុងខ្លួនមនុស្ស។ លើស​ពី​នេះ​ទៅ​ទៀត របប​អាហារ​ដែល​មាន​ជាតិ​ប្រៃ​ខ្ពស់​គឺ​ជា​ការ​រួម​ចំណែក​យ៉ាង​សំខាន់​ដល់​ជំងឺ​សរសៃឈាម​បេះដូង​ដូច​ជា​ជំងឺ​លើស​ឈាម​ជាដើម។ ដូច្នេះសម្រាប់អាហារពេលព្រឹក យើងគួរតែកំណត់ការទទួលទានសាច់កែច្នៃរបស់យើង ហើយជ្រើសរើសប្រភពសាច់ដែលមានសុខភាពល្អ និងវិធីចម្អិនអាហារ៕

អត្ថបទ៖ សាង ស្រីល័ក្ខ

ចុចអាន៖តើមានអ្វីកើតឡើងចំពោះរាងកាយ បើអ្នកផឹកទឹកក្រូចរៀងរាល់ព្រឹក?