ព្រឹត្តិការណ៍ប្រវត្តិសាស្រ្ត កើតឡើងចំថ្ងៃ ៨ ឧសភា

ពីមួយថ្ងៃទៅមួយថ្ងៃ មានរឿងច្រើនរាប់មិនអស់ បានកើតឡើងទូទាំងពិភពលោក ហើយរឿងខ្លះត្រូវបានគេចាត់ទុកថាជាព្រឹត្តិការណ៍ប្រវត្តិសាស្រ្តទៀតផង។

ចុះតើអ្នកដឹងទេ នៅថ្ងៃទី៨ខែឧសភា មានព្រឹត្តិការណ៍ប្រវត្តិសាស្រ្តអ្វីខ្លះ ត្រូវបានគេកត់ត្រាទុក? តោះទៅមើលជាមួយ កម្ពុជាថ្មី ទាំងអស់គ្នា!

ឆ្នាំ២០១២ – វិចិត្រករអាមេរិក Maurice Sendak

វិចិត្រករជនជាតិអាមេរិកឈ្មោះ Maurice Sendak ដែលល្បីល្បាញដោយសារការគូររូប សៀវភៅកុមារ បានស្លាប់នៅអាយុ៨៣ឆ្នាំ។

ឆ្នាំ ១៩៨០ – ជំងឺអុតស្វាយ

បន្ទាប់ពីកម្មវិធីចាក់វ៉ាក់សាំងជាសកល អង្គការសុខភាពពិភពលោកបានប្រកាសជាផ្លូវការថា ជំងឺអុតស្វាយត្រូវបានលុបបំបាត់។

ឆ្នាំ ១៩៥០ – សាកសពក្នុងភក់

ប៉ូលិសនៅទីក្រុង Silkeborg ប្រទេសដាណឺម៉ាក ត្រូវបានជូនដំណឹងអំពីការរកឃើញសាកសពនៅក្នុងវាលភក់។ វាត្រូវបានគេបង្ហាញថា ជាសាកសពក្នុងភក់ដែលត្រូវបានថែរក្សាយ៉ាងអស្ចារ្យ ហើយគេឲ្យឈ្មោះថា Tollund Man។

ឆ្នាំ ១៩៤៥- សង្គ្រាមលោកលើកទីពីរនៅអឺរ៉ុប បានបញ្ចប់

បន្ទាប់ពីការចុះចាញ់ដោយគ្មានលក្ខខណ្ឌរបស់អាល្លឺម៉ង់ សង្គ្រាមលោកលើកទី ២ នៅអឺរ៉ុបបានបញ្ចប់ជាផ្លូវការ នៅពាក់កណ្តាលអធ្រាត្រថ្ងៃនេះក្នុងឆ្នាំ ១៩៤៥ ថ្វីបើសង្រ្គាមនៅប៉ាស៊ីហ្វិក បានបន្តរហូតដល់ជប៉ុនចុះចាញ់ក្នុងខែកញ្ញាក៏ដោយ។

ឆ្នាំ ១៩៤២ – នាវាផ្ទុកយន្តហោះអាមេរិក

នៅក្នុងសមរភូមិ Coral Sea, នាវា USS Lexington បានក្លាយជានាវាផ្ទុកយន្តហោះអាមេរិកដំបូងគេ ដែលត្រូវបានបាញ់ពន្លិចក្នុងសង្គ្រាមលោកលើកទីពីរ។

ឆ្នាំ ១៩០២ – ផ្ទុះភ្នំភ្លើង Pelée

ភ្នំភ្លើង Pelée នៅលើកោះ Martinique បានផ្ទុះឡើង ដោយបំផ្លាញកំពង់ផែ Saint-Pierre និង សម្លាប់មនុស្សប្រហែល ៣០ ០០០នាក់ ពោលគឺស្មើនឹង១៥ភាគរយនៃចំនួនប្រជាជនសរុបរបស់កោះនេះ។

ឆ្នាំ ១៨៨៦ – កូកា-កូឡា

ឱសថការីអាមេរិក លោក John S. Pemberton បានបង្កើត កូកា-កូឡា ជាភេសជ្ជៈត្រូវបានលោកហៅពីដំបូងថាជា ថ្នាំប៉ូវកម្លាំងព្យាបាលជំងឺ។

ឆ្នាំ ១៨៨៤ – ប្រធានាធិបតីអាមេរិកលោក Harry S. Truman

លោក Harry S. Truman ជាប្រធានាធិបតីទី ៣៣ របស់សហរដ្ឋអាមេរិក បានកើតនៅទីក្រុង Lamar នៃរដ្ឋ Missouri។

ឆ្នាំ ១៨៤៦ – ការប៉ះទង្គិចគ្នាលើកដំបូងនៃសង្គ្រាមម៉ិកស៊ិក-អាមេរិក

កងទ័ពអាមេរិកក្រោមការដឹកនាំរបស់ Zachary Taylor បានកម្ចាត់កងកម្លាំងម៉ិកស៊ិកក្រោមការដឹកនាំរបស់ឧត្តមសេនីយ៍ Mariano Arista ក្នុងសមរភូមិ Palo Alto ដែលជាការប៉ះទង្គិចគ្នាលើកដំបូងនៃសង្គ្រាមម៉ិកស៊ិក-អាមេរិក (១៨៤៦-១៨៤៨)។

ឆ្នាំ ១៧៣៧ – ប្រវត្តិវិទូអង់គ្លេស

ប្រវត្តិវិទូអង់គ្លេសលោក Edward Gibbon ដែលល្បីល្បាញដោយសារសៀវភៅ The History of the Decline and Fall of the Roman Empire បានចាប់កំណើតនៅសង្កាត់ Putney នៃតំបន់ Surrey៕

ប្រែសម្រួល៖ Vann Vann

ចុចអាន៖ ព្រឹត្តិការណ៍ប្រវត្តិសាស្រ្ត កើតឡើងចំថ្ងៃ ៦ ឧសភា