មកដឹងពីរបៀបរៀនកាន់តែលឿន និងឆ្លាតជាងមុន

មនុស្សមួយចំនួនមានការចងចាំមិនសូវល្អ ភ្លេចមុខភ្លេចក្រោយ ធ្វើឱ្យការរៀនសូត្ររបស់ពួកគេចាប់មិនសូវបាន ហើយរៀនក៏តាមគេមិនសូវទាន់ និងគិតមិនបានលឿន។ ទោះបីជាយ៉ាងនេះ អ្នកកុំមានអារម្មណ៍អាក្រក់ពេក និងលះបង់ងាយៗ សាកមកអនុវត្តតាមវិធីខាងក្រោមនេះសិន។

១.តស៊ូរៀនអ្វីមួយថ្មីជាគោល

ប្រហែលមនុស្សមួយចំនួនធ្លាប់មានបទពិសោធខ្លះៗហើយ នៅពេលដែលចង់រៀនអ្វីថ្មី ប៉ុន្តែ មិនដឹងថាត្រូវចាប់ផ្តើមពីចំណុចណា? ដំណោះស្រាយនោះ គឺងាយទេ អ្នកត្រូវផ្តោតអារម្មណ៍ខ្លួនឯងឱ្យបានច្រើន ហើយត្រូវសុំប្រឹក្សាយោបល់ពីមិត្តភក្តិ ឬ មនុស្សជុំវិញខ្លួន​ និងសិស្សពូកែ ពីវិធីសាស្ត្រដែលពួកគេធ្លាប់អនុវត្តកន្លងមក។

២.រំលឹកមេរៀនដែលរៀនរួច

កុំធ្វេសប្រហែសឱ្យសោះ ប្រសិនជាអ្នកមិនពូកែចាំ ឬ រៀនខ្សោយ អ្នកមិនគួររំលងវិធីមួយនេះទេ។ រៀនជាមួយគ្រូមិនគ្រប់គ្រាន់ឡើយ ដូច្នេះ អ្នកត្រូវព្យាយាមរំលឹកមេរៀនដោយខ្លួនឯងនៅផ្ទះ ឬ នៅពេលទំនេរ ដើម្បីឱ្យខ្លួនឯងឆាប់ចាំបាន និងយល់ពីខ្លឹមសារមេរៀនបន្ថែមទៀត។ ប្រសិនជាអ្នកមិនធ្វើស្វ័យសិក្សាដោយខ្លួនឯងទេ ច្បាស់ណាស់ អ្នកមិនអាចរៀនពូកែបានឡើយ។

៣.មើលមេរៀនមុនចូលក្នុងថ្នាក់រៀន

សិក្សាក្នុងកម្រិតណាក៏ដូចគ្នាដែរ ប្រសិនជាអ្នកសិក្សាមិនរំលឹកមេរៀនមុនគ្រូទេ អ្នកច្បាស់ជាពិបាកយល់ពីខ្លឹមសារមេរៀនណាស់។ ចំណុចនេះ ចង់ប្រាប់អ្នកថា អ្នកគួរសាកល្បងអានមេរៀន មុនគ្រូបង្រៀន នៅពេលដល់ចំណុចណាដែលមិនយល់អត្ថន័យអ្វីមួយ គឺអាចសួរគ្រូផ្ទាល់បានតែម្តង។ វិធីសាស្រ្តនេះ អាចធ្វើឱ្យអ្នករៀនបានរហ័សជាងមុន។

៤.បង្កើតសំណួរដោយខ្លួនឯង

អ្នកត្រូវរៀនចេះបង្កើតសំណួរ និងមានចម្ងល់ឱ្យច្រើនបំផុត មិនថាក្នុងអត្ថន័យខ្លឹមសារមេរៀន ឬ អ្វីនោះទេ។​ ចេះឆ្ងល់ ហ៊ានសួរ ប្រាកដជាធ្វើឱ្យចំណេះដឹងរបស់អ្នកមានភាពទូលំទូលាយជាងមុន ទទួលបានចំណេះដឹងកាន់តែជ្រៅជ្រះបន្ថែមទៀត។ ភាពក្លាហាននេះ មិនត្រឹមតែជួយឱ្យមានចំណេះដឹងទូលំទូលាយប៉ុណ្ណោះទេ ប៉ុន្តែ ក៏ជួយឱ្យអ្នកសិក្សាមានភាពក្លាហានសម្រាប់ជីវិតប្រចាំថ្ងៃផងដែរ។

៥.ប្រើប្រាស់ខួរក្បាលឌីជីថល

តើអ្នកដឹងទេ ក្រៅពីខួរក្បាលមនុស្ស គឺមានខួរក្បាលមួយទៀតដែលយើងអាចហៅបាន នោះគឺ ខួរក្បាលឌីជីថល។ ខួរក្បាល ឌីជីថល គឺជាកន្លែងដែលយើងអាចកត់ត្រា និងផ្ទុកឯកសារបាន ដែលគេនិយមប្រើក្នុងសម័យបច្ចេកវិទ្យានេះតែម្តង។ ឧបករណ៍ Digital Brain មានដូចជា Airtable, Apple Notes, Evernote, Google Keep និងPocket។ អ្នកអាចពិនិត្យមើលព័ត៌មាននេះនៅលើទូរសព្ទ ថេប្លេត ឬកុំព្យូទ័រយួរដៃរបស់អ្នកបានយ៉ាងងាយស្រួល និងរហ័ស។

មនុស្សទូទៅតែងតែគិតខ្លួនឯងថា “មិនថាខំហាត់ ឬកែប្រែយ៉ាងណាក៏នៅតែរៀនមិនបានល្អដែរ”។ នេះគឺជាគំនិតមួយដែលអ្នកតែងតែគិត ដូច្នេះ អ្នកគួរផ្លាស់ប្តូរគំនិតនេះឡើងវិញ រួចព្យាយាមរកវិធីសាស្ត្រណាដែលរៀនប្រកបដោយប្រសិទ្ធភាព ដើម្បីឆ្ពោះទៅរកភាពជោគជ័យ។ ការរៀនសូត្រពិតជាមានសារសំខាន់ណាស់សម្រាប់មនុស្សម្នាក់ៗ ការរៀនសូត្រក៏គ្មានអាយុ និងដែនកំណត់បញ្ចប់ដែរ។ ដូច្នេះ អ្នកសិក្សា គួរយកចិត្តទុកដាក់រៀនសូត្រឱ្យបានល្អ ដើម្បីឱ្យជីវិតមានភាពល្អប្រសើរ ជោគជ័យក្នុងជីវិត៕

ដោយ៖ អុន ស្រីមាន