ព័ត៌មានជាតិ

ប្រកួតកម្មវិធីបញ្ញវន្តឌីជីថលថ្នាក់វិទ្យាល័យ ជយលាភីមានឱកាសទៅទស្សនកិច្ចនៅក្រៅប្រទេស

បានផុស

៣ years មុន

នៅ

ថ្ងៃព្រហស្បតិ៍ ៨ មិថុនា ២០២៣

ដោយ

ការប្រកួតកម្មវិធីបញ្ញវន្តឌីជីថល សម្រាប់សិស្សថ្នាក់វិទ្យាល័យចាប់ពីថ្នាក់ទី១០-១២ គឺត្រូវបានរៀបចំឡើង ទៅតាមរាជធានី-ខេត្ត ទាំង៦ ក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការពិតណាស់ បញ្ញវន្តឌីជីថលជាកម្មវិធីអប់រំកម្សាន្ត នឹងផ្ដល់ឱកាសដល់សិស្សវិទ្យាល័យទូទាំងប្រទេស ចូលរួមប្រកួតប្រជែងបញ្ចេញសមត្ថភាពរៀងៗខ្លួន។

ជាក់ស្តែង ក្រសួងប្រៃសណីយ៍ និងទូរគមនាគមន៍ បានឱ្យដឹងទៀតថា ចំពោះ រាជធានី-ខេត្ត ទាំង៦ ដែលនឹងត្រូវបើករៀបចំការប្រកួតនៅតាមទីតាំងនីមួយៗ ដូចជា រាជធានីភ្នំពេញ ខេត្តកណ្ដាល ខេត្តតាកែវ ខេត្តសៀមរាប ខេត្តបាត់ដំបង និងខេត្តកំពង់ចាមជាដើម។

សម្រាប់ការប្រកួតនេះ សិស្សនឹងទទួលបានជយលាភីទៅតាមលំដាប់ថ្នាក់នីមួយៗ។ ដោយជយលាភីលេខ១ ទទួលបានទឹកប្រាក់ ១៥លានរៀល, ជយលាភីលេខ២ ទទួលបានទឹកប្រាក់ ១០លានរៀល, និងជយលាភីលេខ៣ ទទួលបានទឹកប្រាក់ ៥លានរៀល ព្រមទាំងទទួលបានអាហារូបករណ៍សិក្សាថ្នាក់បរិញ្ញាបត្រ និងឱកាសទៅទស្សនកិច្ចសិក្សាជាមួយក្រុមហ៊ុនបច្ចេកវិទ្យានៅក្រៅប្រទេស។ ដោយឡែក ចំពោះអ្នកដែលបានជាប់ត្រឹមជយលាភីលេខ៤ ដល់លេខ ២០ នឹងទទួលបានកុំព្យូទ័រយួរដៃ ១គ្រឿង និងប្រាក់ឧបត្ថម្ភបន្ថែម។

ដូច្នេះ សម្រាប់សិស្សដែលស្រលាញ់ខាងជំនាញបច្ចេកវិទ្យាឌីជីថល នេះជាឱកាសដ៏អស្ចារ្យមួយនៅក្នុងការបញ្ចេញសមត្ថភាព ដោយសិស្សអាចដាក់ពាក្យតាមរយៈលីង https://forms.gle/37Hd5nrSAQU4bFCp6 ឱ្យបានមុនថ្ងៃទី១៩ ខែមិថុនា ខាងមុខនេះ។

គួរជម្រាបថា បញ្ញវន្តឌីជីថលបង្កើតឡើងដោយក្រសួងប្រៃសណីយ៍ និងទូរគមនាគមន៍ ហើយគាំទ្រដោយក្រសួងអប់រំ យុវជន និងកីឡា ដែលផ្ដល់ឱកាសដល់សិស្សានុសិស្សកំពុងសិក្សាថ្នាក់វិទ្យាល័យទូទាំងប្រទេសកម្ពុជាចូលរួមប្រកួតប្រជែងចំណេះដឹង បង្ហាញពីភាពច្នៃប្រឌិត និងសមត្ថភាពដោះស្រាយបញ្ហា ទៅលើប្រធានបទអំពីបច្ចេកវិទ្យាឌីជីថល៕