រកឃើញដាវអាយុកាលជិត ២ ០០០ ឆ្នាំ នៅប្រទេស អ៊ីស្រាអែល

ក្រុមអ្នកស្រាវជ្រាវជនជាតិអ៊ីស្រាអែលរកឃើញកន្លែងលាក់ដាវរ៉ូម៉ាំងចំនួន ៤ អាយុកាល ១ ៩០០ ឆ្នាំ នៅក្នុងរូងភ្នំដែលមើលពីលើសមុទ្រមរណៈ ។

បុរាណវិទូលោកបណ្ឌិត Asaf Gayer នៃសាកលវិទ្យាល័យ Ariel ព្រមទាំងភូគព្ភវិទូ Boaz Langford នៃសាកលវិទ្យាល័យ Hebrew និងអ្នកថតរូប Shai Halevi ថ្មីៗនេះ បានទៅរូងភ្នំ ក្នុងគោលបំណងថតរូបពហុទស្សន៍ ដើម្បីបំបែកផ្នែកនៃសិលាចារឹកដែលមើលមិនឃើញដោយភ្នែកទទេ ។

ខណៈពេលដែលនៅផ្នែកខាងលើនៃរូងភ្នំ លោកវេជ្ជបណ្ឌិត Gayer បានប្រទះឃើញលំពែង ដែលត្រូវបានរក្សាទុកយ៉ាងល្អនៅក្នុងប្រហោងតូចចង្អៀតមួយ និងស្រោមដាវឈើ​​ក្បែរ​នោះដែរ ។ អ្នកបុរាណវិទូជឿជាក់ថា ដាវត្រូវបានលាក់ដោយពួកឧទ្ទាម Judean បន្ទាប់ពីកងទ័ពរ៉ូម៉ាំងចាប់ពួកគេ ។

ដាវទាំងបីដែលនៅមានក្នុងស្រោមឈើ ត្រូវបានកំណត់អត្តសញ្ញាណជា ដាវរ៉ូម៉ាំង រីឯអាវុធខ្លីទី ៤ ត្រូវបានកំណត់ថាជាកាំបិតចាក់មានប្រហោងនៅគូទ ។

នាយកអាជ្ញាធរវត្ថុបុរាណរបស់អ៊ីស្រាអែលបានឲ្យដឹងថា អាកាសធាតុវាលខ្សាច់ស្ងួតនៅជុំវិញសមុទ្រមរណៈបានជួយរក្សាទ្រង់ទ្រាយវត្ថុបុរាណទាំងនោះ ៕

ប្រែសម្រួល៖ វារី
ប្រភព៖ BBC

ចុចអាន៖ រកឃើញវត្ថុកម្រធ្វើពីកែវ ក្នុងខ្មោចកប៉ាល់ក្រោមសមុទ្រមេឌីទែរ៉ាណេ (មានវីដេអូ)