KPT+

គោលការណ៍ “៥/២៥” របស់មហាសេដ្ឋី Warren Buffett គួរពិចារណាសម្រាប់គោលដៅជីវិត

បានផុស

១ year មុន

នៅ

ថ្ងៃចន្ទ ១២ កុម្ភៈ ២០២៤

ដោយ

លោក Warren Edward Buffett ប្រិយមិត្តខ្លះប្រាកដជាបានស្គាល់លោក និងខ្លះមិនទាន់ស្គាល់ ។ លោកជាមហាសេដ្ឋីអាមេរិក ដែលមានជំនួញក្នុងដៃជាច្រើន ពិសេសលោកជាប្រធានសាជីវកម្ម Berkshire Hathaway ដែលក្តោបក្តាប់ភាគហ៊ុនក្នុងក្រុមហ៊ុនស្ទើរតែគ្រប់វិស័យនៅអាមេរិក។ ដោយឡែកក៏មានមេរៀនជាចំណុចមួយចំនួនដែលលោកបានចែករំលែកសម្រាប់ជាបទពិសោធឆ្ពោះទៅភាពជោគជ័យផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលការណ៍របស់លោក Warren Buffett ដែលគេស្គាល់ថា “៥/២៥” ជាវិធីជំហានដើម្បីសម្គាល់មើលនិងផ្តោតលើគោលដៅជាអាទិភាពក្នុងជីវិត។ ដោយសារអ្នកនឹងទទួលបាននូវអ្វីដែលអ្នកយកចិត្តទុកដាក់ ប្រឹងប្រែងធ្វើ ដូចនេះគោលការណ៍ ៥/២៥ ដែលមហាសេដ្ឋី Buffett ពន្យល់ទៅពីឡុតរបស់គាត់គឺលោក Mike Flint ទទួលបានភាពល្បីល្បាញជាខ្លាំង។

លោកក៏ធ្លាប់លើកឡើងដែរថាគោលដៅច្រើនពេកនឹងនាំទៅបរាជ័យទៅវិញ ព្រោះថា អ្នកមិនច្បាស់គោលដៅសំខាន់របស់អ្នក និងពុំអាចគ្រប់គ្រងពេលវេលាបានល្អនោះឡើយ ។ ជំនួសឲ្យការមានគោលដៅច្រើនពុំច្បាស់លាស់ គោលការណ៍របស់មហាសេដ្ឋីរូបនេះក៏អាចជាការពិចារណារបស់ប្រិយមិត្តអ្នកអានបានផងដែរ៖

១. សរសេរចេញគោលដៅ ២៥ ដែលអ្នកប៉ងធ្វើ

សួរខ្លួនអ្នកអំពីអ្វីដែលចង់សម្រេចបាននៅថ្ងៃអនាគត។ ២៥ ចំណុចគឺមិនច្រើនពេក និងមិនតិចពេក ហើយក៏ពុំបាច់គ្រប់២៥ ចំណុចក៏បាន ។ សរសេរចេញនូវគោលបំណងទាំងនោះលើក្រដាសជាគោលដៅជីវិត ជាកិច្ចការងារ និងជាក្តីស្រមៃផ្ទាល់ដែលអ្នកចង់ធ្វើដូចជា៖ បន្តអនុបណ្ឌិត ក្លាយជាថៅកែអាជីវកម្ម ចេះកីឡាច្រើន មានជំនាញ ២ ច្បាស់លាស់ លេងឧបករណ៍តន្ត្រី ចេះភាសា មានគ្រួសារដ៏មានសុភមង្គល ជូនអ្នកមានគុណទៅដំណើរកម្សាន្តក្រៅប្រទេស មានចំការផ្ទាល់ខ្លួនជាដើម ។

២. រើសអាទិភាពគោលដៅ ៥ ដែលអ្នកគិតថាសំខាន់ជាងគេបំផុត

គោលដៅវែង ដែលបានសរសេរចេញ ប្រាកដជាមានរឿងសំខាន់បំផុតក្នុងជីវិតដែលអ្នកចង់ធ្វើ ហោចណាស់ក៏មាន ៥ ដែលអ្នកគិតថាសំខាន់ណាស់ក្នុងមួយជីវិតនេះឲ្យបានចេញជារូបរាង ឯផ្សេងៗទៀតជារឿងបន្ទាប់បន្សំ ។ គូសរង្វង់លើ ៥គោលដៅសំខាន់នោះ ដែលជាអាទិភាពសំខាន់បំផុត ។

៣. ក្រៅរឿង ៥ សំខាន់នោះចំណុចផ្សេងគូសចោលកុំស្តាយ

ដំណាក់កាលនេះជាពេលបំភ្លេចរាល់គោលដៅបន្ទាប់បន្សំដែលអ្នកគូសចេញ។ អ្វីដែលសំខាន់នោះគឺ៥ចំណុច ដែលអ្នកគួរធ្វើឲ្យបាន គួរផ្តោត អាចសម្រេចបាន។ ដូច្នេះ ៥ ចំណុច អ្នកនឹងមិនមានពេលគិតខ្វល់លើគោលដៅផ្សេងច្រើនពេក ហើយវាក៏ជាផលរំខានដល់អ្នកទៅវិញទេ ។ ខ្លួនអ្នកផ្ទាល់អាចសម្គាល់ថា ធ្វើរឿងច្រើនក្នុងពេលតែមួយ ពុំសូវគុណភាពល្អទេ ហើយក៏មិនអាចសម្រេចគោលដៅច្រើនបានទាំងស្រុងដែរ។ ផ្ទុយមកវិញ មានផ្តោតលើរឿងសំខាន់ៗ យកចិត្តទុកដាក់កាន់តែល្អនោះគោលដៅអ្នកលេចរូបរាងបានយ៉ាងប្រាកដ ដូចដែលលោក Warren Buffett លើកឡើង គ្មានការផ្តោតលើគោលដៅជាក់លាក់ ក៏គ្មានការជោគជ័យដែរ៕