ព័ត៌មានជាតិ

សម្ដេច ហ៊ុន សែន ប្រាប់ឧបនាយករដ្ឋមន្ត្រីម៉ាឡេស៊ី ពីទង្វើយោធាថៃចាក់សម្លេងឮខ្លាំងៗរំលោភសិទ្ធិពលរដ្ឋខ្មែរ

បានផុស

៨ ខែ មុន

នៅ

ថ្ងៃអង្គារ ១៤ តុលា ២០២៥

ដោយ

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានប្រាប់ ឧបនាយករដ្ឋមន្ត្រី Ahmad Zahid bin Hamidi រដ្ឋមន្ត្រីក្រសួងអភិវឌ្ឍន៍ជនបទ និងតំបន់ម៉ាឡេស៊ី អំពីហេតុការណ៍យោធាថៃចាក់សម្លេងខ្មោច និងសម្លេងផ្សេងៗតាមធុងបាស់ឮសូរខ្លាំងៗនាពេលរាត្រី រំខានដល់សិទ្ធិរស់នៅរបស់ប្រជាពលរដ្ឋកម្ពុជានៅភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ តាមបណ្ដោយព្រំដែនកម្ពុជា-ថៃ។ នេះបើតាមអ្នកនាំពាក្យព្រឹទ្ធសភា លោក ជា ធីរិទ្ធ ថ្លែងក្រោយជំនួបរវាងសម្ដេចតេជោ និងឧបនាយករដ្ឋមន្ត្រីម៉ាឡេស៊ី បញ្ចប់ទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នា សម្ដេច ហ៊ុន សែន គូសបញ្ជាក់ថា មិនត្រូវការឲ្យប្រទេសណាមួយ សម្ព័ន្ធមិត្ត ឬក៏មិត្តរបស់កម្ពុជាថ្កោលទោសភាគីជម្លោះណាមួយទេ ប៉ុន្តែអ្វីដែលកម្ពុជាចង់បានគឺមិត្តរបស់កម្ពុជា ជួយជំរុញឱ្យថៃ និងកម្ពុជា គោរពបទឈប់បាញ់ដែលកំពុងតែផុយស្រួយឱ្យមានប្រសិទ្ធភាព និងស្វែងរកដំណោះស្រាយ សម្រាប់ស្ដារសន្តិភាព និងទំនាក់ទំនងឡើងវិញ។

គួរឱ្យដឹងថា បន្ទាប់ពីព្យាយាមដេញពលរដ្ឋខ្មែរនៅភូមិព្រៃចាន់ និងភូមិជោគជ័យមិនបានសម្រេច យោធាថៃ និងជនជ្រុលនិយមនៅថៃ បានធ្វើសកម្មភាពចាក់សម្លេងខ្មោច និងសម្លេងផ្សេងទៀតឮសូរខ្លាំង ចាប់តាំងពីយប់ថ្ងៃទី១០ រហូតមកដល់យប់ថ្ងៃទី១៣ ខែតុលា ឆ្នាំ២០២៥ រំខានដល់ពលរដ្ឋកម្ពុជា បើទោះបីជាមានការចុះសង្កេតការណ៍ដោយក្រុមអ្នកអង្កេតការណ៍អន្តរកាល IOT ក៏ដោយ។ តាមរយៈបទសម្ភាសន៍ជាមួយអ្នកសារព័ត៌មានមេគំនិតនៃការចាក់សំឡេងរំខាននេះ កាន់ ចមផ្លាំង ថាការធ្វើបែបនេះគឺដើម្បីដេញពលរដ្ឋខ្មែរដែលកំពុងរស់នៅខុសច្បាប់លើដីថៃ ហើយការចាក់នេះក៏ត្រូវបានរដ្ឋបាលខេត្តស្រះកែវ និងយោធភូមិភាគ១របស់ថៃអនុញ្ញាតផងដែរ។

គណៈកម្មាធិការសិទ្ធិមនុស្សកម្ពុជាកាលពីថ្ងៃទី១១ ខែតុលា បានផ្ញើលិខិតមួយច្បាប់ទៅឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សលោក Volker Turk ដើម្បីរាយការណ៍ពីសកម្មភាពរំលោភសិទ្ធិមនុស្សរបស់ថៃមកលើពលរដ្ឋកម្ពុជា ក៏ដូចជាអញ្ជើញលោក Volker មកមើលដោយផ្ទាល់ផងដែរ។ ស្ថាប័នសិទ្ធិមនុស្សកម្ពុជានេះបានអំពាវនាវដល់ស្ថាប័នសិទ្ធិមនុស្សសហប្រជាជាតិ ធ្វើការស៊ើបអង្កេតជាបន្ទាន់ អំពាវនាវឱ្យបញ្ឈប់គ្រប់សកម្មភាពដែលគំរាមកំហែងផ្លូវចិត្តប្រជាជនកម្ពុជា ធានាការពារនិងការផ្ដល់ជំនួយវេជ្ជសាស្ត្រនិងផ្លូវចិត្តចាំបាច់ដល់ជនរងគ្រោះ និងលើកទឹកចិត្តក្នុងការពង្រឹងកិច្ចសន្ទនាតាមព្រំដែនរវាងកម្ពុជានិងថៃ។

ជុំវិញសកម្មភាពរបស់ថៃ សមាជិកព្រឹទ្ធសភាប្រទេសថៃ លោកស្រី Angkhana Neelapaijit ដាស់តឿនរាជរដ្ឋាភិបាលថៃ ថាគួរតែបានដឹងថារាល់សកម្មភាពទាំងឡាយណា បង្កឱ្យមានអារម្មណ៍ភ័យខ្លាច ឬ ប៉ះពាល់ដល់ផ្លូវចិត្តរបស់ប្រជាជន ទោះបីជាអ្នកស្ថិតក្នុងស្ថានភាពជម្លោះក៏ដោយ ជាពិសេសក្រុមងាយរងគ្រោះ ដែលអាចជាការធ្វើទារុណកម្មផ្លូវចិត្ត ក្រោមអនុសញ្ញាប្រឆាំងទារុណកម្ម និងការប្រព្រឹត្តមកលើខ្លួន ឬទណ្ឌកម្ម ឯទៀតដែលឃោរឃៅ អមនុស្សធម៌ ឬបន្ថោកបន្ទាប (CAT) ដែលប្រទេសថៃជារដ្ឋភាគី។ លោកស្រី បានជំរុញឱ្យក្រសួងការបរទេសរបស់ប្រទេសថៃ ពិនិត្យមើលលើករណីដែលជនល្បីឈ្មោះតាមបណ្តាញសង្គម បានប្រើប្រាស់សំឡេងខ្មោច នៅតាមព្រំដែនថៃចូលទៅក្នុងប្រទេសកម្ពុជា៕

ដោយ៖ ង៉ិល ណារ៉ាត់