គិតត្រឹម​ព្រឹក​ម៉ោង ១០ ម្សិលមិញ​​នេះ អាជីវករ​ផ្សារ​អូរឫស្សី​ឆ្លងកូវីដ​កើន​ដល់ ៣៤៥ នាក់

អនុគណៈកម្មការ​ស្រាវជ្រាវ​កូវីដ ១៩ បាន​បង្ហាញទិន្នន័យ​ចំនួន​អ្នក​ឆ្លង​កូវីដ​ពាក់ព័ន្ធ​អាជីករ​ផ្សារ​អូរឫស្សី​គិត​ត្រឹម​ព្រឹក​ម៉ោង ១០ ម្សិលមិញនេះ អ្នក​ឆ្លង​សរុប​កើនឡើង​ដល់ ៣៤៥ នាក់។

ស្ថានភាព​ការ​រាលដាលកូវីដ ១៩ នៅរាជធានីកាន់តែ​​ធ្ងន់ធ្ងរ ក្រោយ​ផ្ទុះឆ្លង​តគ្នា​នៅរោងចក្រឌីនហាន់ និង​នៅលើ​អាជីករ​ផ្សារ​អូរឫស្សី ​មានអ្នក​ឆ្លង​ជិត ១ ពាន់​នាក់។

រដ្ឋបាល​ក្រុង​ភ្នំពេញបានប្រកាសបិទ​ខ្ទប់ (Lockdown) ផ្នែក​ខ្លះ​នៃ​ខណ្ឌ​ចំនួន ៣ គឺ​ខណ្ឌមានជ័យ សែនសុខ និង​ខណ្ឌ​ពោធិ៍សែនជ័យ ដើម្បី​កុំ​ឲ្យ​ស្ថានភាព​ការរាលដាលកាន់តែអាក្រក់។

តំណាង​អង្គការសុខភាពពិភពលោក (WHO) ប្រចាំកម្ពុជាបានព្រមានពីគ្រោះមហន្តរាយ ដែលនឹងកើតឡើង ប្រសិនបើពលរដ្ឋទាំងអស់ មិនរួមគ្នាចូលរួមសកម្មភាពដោយ​ការទទួលខុសត្រូវ។

លោក ស្រី លី អៃឡាន តំណាងអង្គការសុខភាពពិភពលោកប្រចាំ​ប្រទេស​កម្ពុជាមានប្រសាសន៍ថា ប្រទេសកម្ពុជាកំពុង​ឈរនៅមាត់ជ្រោះនៃសោកនាដកម្ម បើសិនប្រជាពលរដ្ឋមិន​អនុវត្ត​ទង្វើដោយទទួលខុសត្រូវ។ បើ​សិន​មិន​អាចបញ្ឈប់ការ​ឆ្លង​រាលដាល​យ៉ាងអាក្រក់បំផុតនោះទេ ប្រព័ន្ធសុខាភិបាលរបស់ប្រទេសកម្ពុជាស្ថិតក្នុងហានិភ័ខ្ពស់ដែលត្រូវមានបន្ទុកធ្ងន់ធ្ងរ ដែលអាចនឹងមានផលវិបាកមហន្តរាយដ៏ធំ។

លោកស្រីថ្លែង​ក្រើន​រំលឹក​ថា ប្រទេសកម្ពុជាស្ថិតនៅលើផ្លូវបំបែក គ្រប់គ្នា​ត្រូវតែរួមគ្នាតែមួយឆ្ពោះទៅរកគោលដៅរួមមួយ ​បើសិនជាមិនអាចគ្រប់គ្រងបានទេ ផលវិបាកទាំងនេះនឹងក្លាយជាមហន្តរាយ។

លោក​ស្រី​បានណែនាំ​ថា ​ការអនុវត្តពេញលេញប្រកបដោយប្រសិទ្ធិភាព នៃវិធានការសុខភាពសាធារណៈទាំងអស់រួមបញ្ចូលគ្នា មានសារៈសំខាន់ខ្លាំងក្នុងការទប់ស្កាត់ការឆ្លងរាលនៃវិរុស ហើយពលរដ្ឋម្នាក់ៗ ត្រូវចូលរួមចំណែករបស់ខ្លួនក្នុងការអនុវត្ត៕

អត្ថបទ៖ ប៊ុណ្ណារ៉ា