ស្នងការរងខេត្តកំពត ប្រឈមជាប់ពន្ធនាគារ​ ១០ ឆ្នាំទៅ ២០ ឆ្នាំ​ ពាក់ព័ន្ធគ្រឿងញៀន

យោងតាមការបញ្ជាក់របស់លោក គុជ គឹមឡុង អ្នកនាំពាក្យអយ្យការ បានឲ្យដឹងនៅថ្ងៃទី១២ខែមេសាឆ្នាំ២០២១នេះ ក្រោយពីសាកសួរជនសង្ស័យទាំង៣នាក់នេះចប់សព្វគ្រប់ លោក សេង គឹមឡាក់ ព្រះរាជអាជ្ញារង សម្រេចចោទប្រកាន់ពីបទរក្សាទុក ដឹកជញ្ជូនដោយខុសច្បាប់នូវសារធាតុញៀន និងបទសម្អាតប្រាក់ តាមមាត្រា៤០ និង មាត្រា៧២នៃច្បាប់ស្តីពីការត្រួតពិនិត្យគ្រឿងញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យទាំង៣នាក់ ត្រូវបានកម្លាំងសមត្ថកិច្ចចាប់ខ្លួនកាលពីយប់ថ្ងៃទី៦ ខែមេសា ឆ្នាំ២០២១ នៅចំណុចចំណតរថយន្តផ្សារខាលែនឌែលម៉ល ស្ថិតក្នុងសង្កាត់ស្រះចក ខណ្ឌ ដូនពេញ រាជធានីភ្នំពេញ ដោយកម្លាំងមន្ទីរប្រឆាំងគ្រឿងញៀន។

យោងតាមរបាយការណ៍របស់មន្ទីរប្រឆាំងគ្រឿងញៀន ជនសង្ស័យទាំងបីនាក់ ១.ឈ្មោះ អ៊ឹម ឈួន ភេទប្រុស អាយុ ៥១ឆ្នាំ (អាវក្រហម) ជាស្នងការរងនគរបាលខេត្តកំពត ទទួលផែនអគ្គិភ័យ និងអាវុធជាតិផ្ទុះ ២.ឈ្មោះ ហុង គា ភេទប្រុសអាយុ៦១ឆ្នាំ ៣.ឈ្មោះ កែវ ទិត្យមេសា ភេទប្រុសអាយុ២១ឆ្នាំ។

សមត្ថកិច្ចបានឲ្យដឹងបន្តថា ការឈានដល់បង្ក្រាបនិងចាប់ខ្លួនជនសង្ស័យទាំងបីនាក់ខាងលើនេះ គឺកម្លាំងជំនាញបានចាប់ដកហូតបានវត្ថុតាងសារធាតុញៀន ប្រភេទមេតាំហ្វេតាមីនមានទម្ងន់ ១៧៣៨.៣៣ ក្រាម ។

យោងតាម(ចំណុច៤)មាត្រា៤០បទរក្សាទុក ដឹកជញ្ជូន ឬជួញដូរដោយខុសច្បាប់ (នៃច្បាប់ស្តីពីការត្រួតពិនិត្យគ្រឿងញឿន )អាចប្រឈមនឹងត្រូវផ្តន្ទាទោសដាក់ពន្ធនាគារពី១០ឆ្នាំទៅ២០ឆ្នាំ និងពិន័យជាប្រាក់ពី២០លានរៀលទៅ៤០លានរៀលនិងមាត្រា៧២អាចប្រឈមពីទោសពី៥ឆ្នាំទៅ១០ឆ្នាំ(ប្រសិនតុលាការរកឃើញកំហុស)៕