ព័ត៌មានជាតិ

អាជ្ញាធរសង្កាត់ផ្សារដេប៉ូទី ១ ឈូសឆាយស្ថាបនាផ្លូវ ៣ ខ្សែ សម្រួលការធ្វើដំណើរប្រជាពលរដ្ឋ

បានផុស

៨ ខែ មុន

នៅ

ថ្ងៃចន្ទ ២៧ តុលា ២០២៥

ដោយ

ផ្លូវចំនួន ៣ ខ្សែ ក្នុងមូលដ្ឋានសង្កាត់ផ្សារដេប៉ូទី ១ ចាប់ផ្ដើមឈូសឆាយស្ថាបនាឡើងវិញ ដើម្បីសម្រួលដល់ការធ្វើដំណើររបស់ប្រជាពលរដ្ឋប្រើប្រាស់ប្រចាំថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងការដ្ឋានកំពុងដំណើរការស្ថាបនាផ្លូវថ្មីនេះ មានចំនួន ៣ ខ្សែ គឺ ផ្លូវ ២៣៧ កែង ១៦២ , ផ្លូវ ២២៣ កែង ១៥៦ , និងផ្លូវ ២២៩ កែង ១៦២ ស្ថិតក្នុងមូលដ្ឋានសង្កាត់ផ្សារដេប៉ូទី ១ ខណ្ឌទួលគោក រាជធានីភ្នំពេញ ដោយក្នុង ១ ផ្លូវ មានប្រវែង ១៣៦ ម៉ែត្រ សរុបទាំង ៣ ផ្លូវ ប្រវែងជាង ៤០០ ម៉ែត្រ។

លោក កក្កដា ជាប្រជាពលរដ្ឋរស់នៅតំបន់ខាងលើ បានសាទរយ៉ាងខ្លាំង ក្រោយឃើញអាជ្ញាធរខណ្ឌយកចិត្តទុកដាក់ពីសុខទុក្ខប្រជាពលរដ្ឋ ជាពិសេសនោះគឺផ្លូវសម្រាប់ធ្វើដំណើរប្រចាំថ្ងៃតែម្ដង។ លោក ថា ពីពេលនេះទៅលែងមានជង្ហុកពិបាកធ្វើដំណើរទៀតហើយ។ ងាយស្រួលក្នុងការធ្វើដំណើរ មិនដូចពីមុនមានជង្ហុកធ្វើឲ្យរំខានដល់ការធ្វើដំណើរ។

លោកស្រី ពៅ សាម៉ោច ចៅសង្កាត់ផ្សារដេប៉ូទី ១ ប្រាប់ឲ្យកម្ពុជាថ្មីដឹងថា ដើម្បីសម្រួលដល់ការធ្វើដំណើររបស់ប្រជាពលរដ្ឋ អាជ្ញាធរសង្កាត់ បានប្រើប្រាស់ថវិកាអភិវឌ្ឍន៍សង្កាត់ឆ្នាំ ២០២៥ ដើម្បីស្ថាបនាផ្លូវខូចៗ ក្នុងមូលដ្ឋានឡើងវិញ ដោយធ្វើការអ៊ុតកៅស៊ូឡើងវិញនៅតាមបណ្ដោយផ្លូវចំនួន ៣ ខ្សែ ក្នុងមូលដ្ឋានសង្កាត់។

លោកស្រី ក៏បានសំណូមពរដល់ប្រជាពលរដ្ឋរស់នៅក្នុងមូលដ្ឋាន សូមមេត្តាចូលរួមទាំងអស់គ្នា កុំរំលោភលើចំណែកផ្លូវសាធារណៈ និងធ្វើការវេចខ្ចប់សំរាមទុកដាក់ឲ្យបានត្រឹមត្រូវ ជៀសវាងការហូរចូលប្រព័ន្ធលូបង្កជាការជន់លិច។

គួររំលឹកផងដែរថា កន្លងមក កំណាត់ផ្លូវលេខ ២៣៧ ប្រជាពលរដ្ឋបានត្អូញត្អែរពីការរំខានក្នុងការធ្វើដំណើរ ដោយជង្ហុកទាំងនេះ តែងបង្កគ្រោះថ្នាក់ដល់អ្នកធ្វើដំណើរមើលមិនឃើញ ជាពិសេសនៅពេលយប់តែម្ដង៕

អត្ថបទ ៖ ម៉េង