ជនជាតិវៀតណាមក្នុងបទល្មើសឆបោកតាមអនឡាញ ត្រូវបានកម្ពុជាបន្តបណ្ដេញចេញពីប្រទេស

ជនជាតិវៀតណាមចំនួន៥៩នាក់ ដែលលួចឆ្លងដែនចូលកម្ពុជាប្រព្រឹត្តអំពើឆបោកតាមអនឡញ ត្រូវបានបណ្តេញចេញពីកម្ពុជា តាមច្រកទ្វារព្រំដែនអន្តរជាតិព្រែកចាក ខេត្តកំពត។ នេះបើតាមអគ្គនាយកដ្ឋានអន្តោប្រវេសន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមអគ្គនាយកដ្ឋានអន្តោប្រវេសន៍ ជនវៀតណាមខាងលើ គឺនាយកដ្ឋានស៊ើបអង្កេត និងអនុវត្តនីតិវិធី ទទួលបានពីស្នងការដ្ឋាននគរបាលខេត្តកំពត ដែលក្នុងនោះមានស្រីចំនួន១៤នាក់​ ក្រោយរកឃើញថា អ្នកទាំងនោះលួចស្នាក់នៅ និងធ្វើការខុសច្បាប់ ដោយគ្មានលិខិតឆ្លងដែន និងប្រព្រឹត្តបទល្មើសឆបោកតាមប្រព័ន្ធអ៊ីនធឺណេត (Online Scam)។

ការអនុវត្តនីតិវិធីបណ្ដេញចេញ បានឡើងតាមកាលពីថ្ងៃទី២៩ ខែតុលា ឆ្នាំ២០២៥ តាមប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ខេត្តកំពត ដោយមានការណែនាំពីប្រមុខក្រសួងមហាផ្ទៃ។

គួរឱ្យដឹងថា កាលពីថ្ងៃទី២៧ ខែតុលា ឆ្នាំ២០២៥ សមត្ថកិច្ចកម្ពុជា ក៏បានបណ្ដេញនូវជនជាតិវៀតណាមចំនួន ៦៣នាក់ចេញពីប្រទេសដែរ ក្រោយរកឃើញពាក់ព័ន្ធក្នុងបទល្មើស Online Scam។ ខណៈកាលថ្ងៃទី២៨ ខែតុលា ក៏មានការបណ្ដេញចេញជនជាតិវៀតណាម៣០នាក់តាមច្រកទ្វារព្រំដែនអន្តរជាតិព្រៃវល្លិ៍ ខេត្តស្វាយរៀង ពាក់ព័ន្ធករណី Online Scams និងករណីប្រើប្រាស់គ្រឿងញៀន៕