ជនជាតិវៀតណាម៣៤នាក់ទៀតពាក់ព័ន្ធបទល្មើសអនឡាញ ត្រូវបានបណ្តេញចេញពីកម្ពុជា

សមត្ថកិច្ចកម្ពុជា កាលពីថ្ងៃទី២ ខែវិច្ឆិកា ម្សិលមិញ បានបន្តបណ្ដេញនូវជនជាតិវៀតណាមចំនួន៣៤នាក់ទៀតចេញពីប្រទេស។ ការអនុវត្តនីតិវិធីបណ្ដេញចេញនេះក្រោយរកឃើញថា អ្នកទាំងនោះបានលួចឆ្លងដែនចូលកម្ពុជាប្រព្រឹត្តអំពើឆបោកតាមអនឡញ។

បើតាមអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ជនជាតិវៀតណាមខាងលើ ត្រូវបានបណ្តេញចេញពីកម្ពុជា តាមច្រកទ្វារព្រំដែនអន្តរជាតិបាវិត ខេត្តស្វាយរៀង ដែលក្នុងចំណោមនោះ មានស្រីចំនួន៣នាក់។

ជនជាតិវៀតណាមដែលបានលួចឆ្លងដែនមកស្នាក់នៅ និងធ្វើការខុសច្បាប់ ក្នុងសកម្មភាពប្រព្រឹត្តបទល្មើស Online Scams នៅកម្ពុជានេះ គឺនាយកដ្ឋានស៊ើបអង្កេត និងអនុវត្តនីតិវិធី បានទទួលពីនាយកដ្ឋានចារកម្ម នៃអគ្គស្នងការដ្ឋាននគរបាលជាតិ។

គួរឱ្យដឹងថា ក្នុងរយៈពេល៩ខែ ឆ្នាំ២០២៥ អាជ្ញាធរ និងកងកម្លាំងមានសមត្ថកិច្ចបានចុះស្រាវជ្រាវ និងបើកប្រតិបត្តិការបង្ក្រាបតាមគោលដៅដែលពាក់ព័ន្ធក្នុងបទល្មើសតាមប្រព័ន្ធបច្ចេកវិទ្យា (Online Scam) ចំនួន៤៨លើក ដោយឃាត់បានមនុស្សចំនួន២ ៩១០នាក់ ក្នុងនោះកសាងសំណុំរឿងបញ្ជូនទៅកាន់តុលាការ១៦៨នាក់ និងអនុវត្តនីតិវិធីបណ្ដេញចេញពីកម្ពុជាចំនួន២ ៧២២នាក់។

បើគិតត្រឹមរយៈពេល៣ថ្ងៃ ចាប់ពីថ្ងៃទី២៧ ដល់ថ្ងៃទី២៩ ខែតុលា ឆ្នាំ២០២៥ថ្មីៗនេះ អគ្គនាយកដ្ឋានអន្តោប្រវេសន៍ បានបណ្ដេញជនជាតិប្រមាណជាង ១៥០នាក់ចេញពីកម្ពុជា ដែលអ្នកទាំងនោះ ត្រូវបានរកឃើញថា លួចប្រព្រឹត្តអំពើឆបោកតាមប្រព័ន្ធអនឡាញ នៅក្នុងប្រទេសកម្ពុជា៕

ដោយ៖ ធឿន វ៉ាន់សុង