ក្រសួងសុខាភិបាល រៀបចំកិច្ចប្រជុំពង្រឹងប្រសិទ្ធភាពការងារ កាត់បន្ថយអត្រាមរណមាតា និងទារក

មន្រ្តីក្រសួងសុខាភិបាល​ និងសមាជិកមកពី គណៈកម្មការពិនិត្យមរណភាពមាតា និងទារកជុំវិញកំណើត និងការឆ្លើយ​តប​ថ្នាក់​ជាតិ(MPDSR) បានរៀបចំកិច្ចពិសេសមួយ ដើម្បីពង្រឹងប្រសិទ្ធភាពការងារ សំដៅកាត់បន្ថយអត្រាមរណមាតា និងទារក​ ព្រមទាំងជំរុញកំណើត។ កិច្ចប្រជុំនេះ ធ្វើឡើងកាលពីចុងខែ តុលា ឆ្នាំ ២០២៥ ក្នុងគោលបំណងនៃកិច្ចប្រជុំនេះ គឺដើម្បីពង្រឹងប្រសិទ្ធភាពការអនុវត្តការងារ ពិនិត្យមរណភាពមាតា និង​ទារក ជុំវិញកំណើតនិងការឆ្លើយតប ស្វែងយល់ពីមូលហេតុដែលនាំឱ្យ​មាន​ការយឺតយ៉ាវទាំង៣ លើកកម្ពស់គុណភាពពាក់ព័ន្ធការយឺតយ៉ាវទាំង៣ និងរៀបចំផែនការលើកកម្ពស់​គុណភាពសេវា​សម្ពពកាន់​តែមាន​ប្រសិទ្ធភាពខ្ពស់។

លោកស្រី អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានគណៈកម្មការ MPDSR ជាតិ បានបញ្ជាក់ពីភាពជោគជ័យការងារ MPDSR រួមមាន គណនេយ្យភាព ការទុកចិត្ត ឬការមិនស្តីបន្ទោសគ្នា និងកិច្ចសហការណ៍រវាងបុគ្គលិកសុខាភិបាលទាំងអស់ដែលពាក់ព័ន្ធរួមមានថ្នាក់ដឹកនាំរបស់មន្ទីរពេទ្យ ផ្នែកសម្ភព ផ្នែកប្រពោធនកម្មទារក ផ្នែកសង្គ្រោះបន្ទាន់ ផ្នែកថ្នាំសណ្តំ និងផ្នែកកែលម្អរគុណភាពរបស់មន្ទីរពេទ្យ។

យ៉ាងណាមិញ លោកស្រីបានបន្តក្រើនរំលឹកដល់សមាជិក MPDSR ជាតិទាំងអស់ អនុវត្តឱ្យបានខ្ជាប់ខ្ជួននូវភារកិច្ចមួយចំនួន ដូចជាត្រូវរៀបចំរបាយការណ៍ករណីមរណភាពមាតា និងទារកមក កាន់តែសុក្រឹត ប្រកបដោយគរុកោសល្យ ត្រូវខិតខំស្វែងយល់ពីករណីអសកម្មនានា ជាពិសេសការយឺតយ៉ាវទាំង៣ដំណាក់កាល ត្រូវពិនិត្យនិងវិភាគរៀបចំផែនការកែលម្អចំណុចអសកម្មទាំងនោះ ត្រូវតាមដានការអនុវត្តផែនការប្រកបដោយប្រសិទ្ធភាពខ្ពស់ និងមន្ទីរពេទ្យជាតិត្រូវបន្តជួយដល់មន្ទីរពេទ្យថ្នាក់ក្រោមជាតិ ដែលជាមន្ទីរពេទ្យសម្ព័ន្ធមេត្រីលើផ្នែកបច្ចេកទេស។

ជាមួយគ្នានេះ លោក កុយ វ៉ាន់នី រដ្ឋលេខាធិការក្រសួងសុខាភិបាល ទទួលបន្ទុកគុណភាពសេវាមន្ទីរពេទ្យក៏បានលើកបង្ហាញពីការគាំទ្រ និងបន្តជំរុញការអនុវត្តន៍ភារៈកិច្ច របស់គណៈកម្មការ MPDSR ជាតិ ដែលបាន និងកំពុង​បំពេញកិច្ចការរបស់ខ្លួនយ៉ាងសកម្មហ្មត់ចត់ត្រឹមត្រូវ មានការទទួលខុសត្រូវខ្ពស់ក្នុងការវិភាគ លើករណីអសកម្ម​នានា ជាពិសេសការយឺតយ៉ាវទាំង៣ដំណាក់កាល និងយកមកជាការចងក្រងបណ្តុះបណ្តាលជាបន្តបន្ទាប់។

លោកបញ្ជាក់ថា ទស្សនវិជ្ជានៃការងារ MPDSR គឺសែ្វងរកចំណុច​អសកម្ម​​នានាជាយថាហេតុ ជាពិសេសការយឺតយ៉ាវទាំង៣ដំណាក់កាល ដោយសំដៅចងក្រងជាបទពិសោធន៍យកមកចៀសវាង (ផលអវិជ្ជមាន ដែលបានកើតមានឡើង) ដែលជាការ​ជួយបច្ចេកទេសពាក់ព័ន្ធ និងវិទ្យាសាស្រ្តការពារសុខភាពមាតា និង​ទារកជុំវិញកំណើត។ 

គួរបញ្ជាក់ថា កិច្ចប្រជុំខាងលើធ្វើឡើងក្នុងគោលបំណងដើម្បីពង្រឹងប្រសិទ្ធភាពការអនុវត្តការងារ ពិនិត្យមរណភាពមាតា និងទារក ជុំវិញកំណើតនិងការឆ្លើយតប ស្វែងយល់ពីមូលហេតុដែលនាំឱ្យមានការយឺតយ៉ាវទាំង៣ លើកកម្ពស់គុណភាពពាក់ព័ន្ធការយឺតយ៉ាវទាំង៣ និងរៀបចំផែនការលើកកម្ពស់គុណភាពសេវាសម្ភពកាន់តែមានប្រសិទ្ធភាពខ្ពស់ ពិសេសឈានទៅសម្រេចគោលដៅពី១៥៤នាក់ លើ១សែនកំណើតរស់នៅឆ្នាំ២០២២ មកត្រឹម៧០នាក់លើ១សែនកំណើតរស់នាឆ្នាំ២០២៣០ខាងមុខ៕

អត្ថបទ៖សំអឿន