ព័ត៌មានជាតិ

កម្ពុជាច្រានចោលការចោទប្រកាន់របស់ទាហានថៃពីបញ្ហាមីន និងដាស់តឿនកុំឱ្យដើរចូលចម្ការមីនទៀត

បានផុស

៧ ខែ មុន

នៅ

ថ្ងៃអង្គារ ១១ វិច្ឆិកា ២០២៥

ដោយ

អ្នកនាំពាក្យក្រសួងការពារជាតិលោកស្រី ម៉ាលី សុជាតា បានបញ្ជាក់ថាករណីទាហានជាន់មីនផ្ទុះកាលពីថ្ងៃទី១០ ខែវិច្ឆិកា គឺបានជាន់លើមីនចាស់ ក្នុងចម្ការមីនដែលបន្សល់ទុកពីសង្គ្រាមស៊ីវិលរបស់កម្ពុជា លោកស្រីបានអំពាវនាវដល់ទាហានថៃបញ្ឈប់ការដើរចូលចម្ការមីនតទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីប្រកាសព័ត៌មាននៅថ្ងៃទី១១ ខែវិច្ឆិកា ឆ្នាំ២០២៥នេះ លោកស្រី ម៉ាលី សុជាតា បានបញ្ជាក់ថា ចាប់តាំងពីកម្ពុជាក្លាយជារដ្ឋភាគីនៃអនុសញ្ញាអូតាវ៉ាមកកម្ពុជាមិនដែលដាក់មីនថ្មីគំរាមកំហែងដល់សន្តិសុខ និងសុវត្ថិភាពរបស់មនុស្សជាតិនោះឡើយ។ លោកស្រីក៏បានបញ្ជាក់ផងដែរថាករណីដែលទាហានថៃដើរជាន់មីនផ្ទុះបណ្ដាលឱ្យរបួស២នាក់(ដាច់ជើងម្នាក់)កាលពីថ្ងៃទី១០ ខែវិច្ឆិកានោះគឺដោយសារទាហានថៃដើរចូលចម្ការមីនដែលបន្សល់ទុកតាំងពីសម័យសង្គ្រាមនៅកម្ពុជាមកម្លេះ។

លោកស្រីបញ្ជាក់ថា៖ «ក្រសួងការពារជាតិអំពាវនាវឱ្យភាគីថៃចៀសវៀងការដើរល្បាតចូលក្នុងតំបន់ចម្ការមីនចាស់ៗ ជាពិសេសតំបន់ដែលត្រូវបានអន្តរជាតិទទួលស្គាល់ថាជាចម្ការមីនដែលជាសំណល់ពីសង្គ្រាម ដើម្បីចៀសវាងគ្រោះថ្នាក់ដោយសារការផ្ទុះមីនចាស់ទាំងនេះ ដែលអាចបង្កឱ្យមានភាពតានតឹងដោយមិនចាំបាច់»។

បើតាមអ្នកនាំពាក្យ ក្រោយឧបទ្ទវហេតុថ្ងៃទី១០ ខែវិច្ឆិកា យោធភូមិភាគទី៤កម្ពុជា និងយោធាថៃបានទំនាក់ទំនងគ្នាហើយគិតមកដល់ពេលនេះសភាពការណ៍មានភាពស្ងប់ស្ងាត់មិនតានតឹងនោះទេ។

គួរឱ្យដឹងផងដែរថាកាលពីព្រឹកថ្ងៃទី១០ ខែវិច្ឆិកា តាមការចុះផ្សាយរបស់សារព័ត៌មានរបស់ថៃចុះផ្សាយថាមានករណីផ្ទុះមីនប្រឆាំងមនុស្សនៅតំបន់ Huai Ta Maria ខេត្តស៊ីសាកេត ដែលធ្វើឱ្យទាហានថៃ២នាក់រងរបួស (ម្នាក់ដាច់កជើង)។ ទោះជាយ៉ាងណាក៏មានសេចក្ដីរាយការណ៍ថាកន្លែងដែលទាហានថៃជាន់មីននោះស្ថិតក្នុងតំបន់វាលឥន្ទ្រីយ៍ ព្រំដែនកម្ពុជាថៃ ជាការដើរជាន់មីនចាស់ នៅពេលដែលពួកគេដើរចូលមកក្នុងតំបន់ដែលជាអតីតសមរភូមិចាស់ក្នុងសង្គ្រាមស៊ីវិល ដែលសម្បូរដោយគ្រាប់មីន។