ព័ត៌មានជាតិ

ផ្លែដូងក្លាយជាទីពេញនិយម ភ្ញៀវទេសចរបរទេសមកកម្សាន្តនៅរមណីយដ្ឋានភ្នំសំពៅ

បានផុស

៦ ខែ មុន

នៅ

ថ្ងៃពុធ ១២ វិច្ឆិកា ២០២៥

ដោយ

ផ្លែដូងបានក្លាយជាទីពេញនិយម សម្រាប់ទេសចរបរទេសមកកម្សាន្តរមណីយដ្ឋានភ្នំសំពៅ ខណៈតំបន់ទេសចរណ៍ធម្មជាតិនិងប្រវត្តិសាស្រ្តនេះ បានក្លាយជាគោលដៅទេសចរដ៏ទាក់ទាញបំផុតក្នុងខេត្តបាត់ដំបង។

អ្នកស្រី ស្រី អៀង រស់នៅភូមិសំណាញ់ ឃុំភ្នំសំពៅ ស្រុកបាណន់ ខេត្តបាត់ដំបង បានឲ្យដឹងថា អ្នកស្រីបានរស់នៅទីនេះតាំងពីឆ្នាំ១៩៧៩ មកម៉្លេះ ហើយនៅលើដីភូមិអ្នកស្រីមានបន្សល់ដើមដូងចំនួន ៥០ ដើម ដែលបច្ចុប្បន្នក្រុមគ្រួសារអ្នកស្រីបានរកចំណូលបន្ទាប់បន្សំពីផ្លែដូងនេះគ្រាន់បានទ្រទ្រង់ជីវភាពគ្រួសារបានមួយផ្នែក ខណះជនបរទេសចូលចិត្តទឹកដូងស្ទើរគ្រប់គ្នា រួមទាំងភ្ញៀវទេសចរក្នុងស្រុកផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់អ្នកស្រី ស្រី អៀន រាល់ថ្ងៃបានផ្លែដូងហ្នឹងហើយ គ្រាន់បានចំណូលបន្ទាប់បន្សំរាល់ថ្ងៃ។ បើមានគេមកទិញ គឺលក់លើដើមបានតម្លៃ ១ ០០០ រៀលក្នុងមួយផ្លែ ដែលក្នុងមួយខែអ្នកស្រីប្រមូលផលម្តងប្រមូលម្តងបានជាង ១០០ ផ្លែ។

ចំណូលពីការលក់ផ្លែដូងនេះ បើទោះបីមិនបានច្រើនតែក៏ជួយដោះស្រាយជីវភាពបានមួយចំណែកផងដែរ។ អ្នកស្រី ស្រី អៀន បន្ថែម។

ការកើនឡើងនៃចំនួនភ្ញៀវទេសចរអន្តរជាតិ ដែលបានមកទស្សនាកម្សាន្តរមណីយដ្ឋានភ្នំសំពៅជាបន្តបន្ទាប់ ក្រោយពីតំបន់នេះបានកែច្នៃយ៉ាងប្រណិតសម្រាប់ទាក់ទាញភ្ញៀវទេសចរ ដើម្បីរង់ចាំពេលវេលាទស្សនាហ្វូងទ័ពសត្វប្រចៀវចេញពីរូង។

មន្រ្តីមន្ទីរទេសចរណ៍ខេត្តបាត់ដំបងបានឲ្យដឹងថា ក្រោយមានកំណើនទេសចរមកកម្សាន្តបានធ្វើឲ្យប្រជាពលរដ្ឋអាចរកចំណូល តាមរយះការលក់ដូរអាហារសម្រន់គ្រប់ប្រភេទ និងផលិតផលកសិកម្មក្នុងតំបន់ដែលក្នុងនោះតាមការសង្កេតគឺជនបរទេសចូលចិត្តផឹកទឹកដូងច្រើនជាងគេ ដើម្បីកំដរពេលវេលាសម្រាប់ទស្សនាហ្វូងសត្ប្រចៀវ។

លោក ហម អរុណ អនុប្រធានមន្ទីរទេសចរណ៍ខេត្តបាត់ដំបងបានឲ្យដឹងថា បច្ចុប្បន្នរមណីយដ្ឋានភ្នំសំពៅចាប់តាំងពីមានការកែច្នៃមានភ្ញៀវបរទេសមកលេងកម្សាន្តជាបន្តបន្ទាប់ ហើយភ្ញៀវក្នុងស្រុកក៏កើនឡើងច្រើនដែរ។

លោកថា ក្នុងរយះពេលចុងក្រោយនេះ រមណីយដ្ឋានភ្នំសំពៅបានទាញកំណើនភ្ញៀវទាំងក្នុងស្រុកនិងក្រៅស្រុក។ រាល់ល្ងាចគឺតែងតែកកស្ទះភ្ញៀវធ្វើដំណើរចេញចូល។ បើគិតត្រឹមរយះពេល ៣ ថ្ងៃនៃពិធីបុណ្យអុំទូក ទាញចំនួនភ្ញៀវអន្តរជាតិបានជាង ១០០ នាក់ និងភ្ញៀវក្នុងស្រុកបានចំនួន ៤ ០០០ នាក់់ ខណះរាល់ថ្ងៃក៏មកច្រើនមិនលោះថ្ងៃនោះទេ។

បើតាមមន្រ្តីទេសចរណ៍រូបនេះ តំបន់រមណីយដ្ឋានភ្នំសំពៅនៅតែបន្តអភិវឌ្ឍបន្ថែមទៀត ដើម្បីឆ្លើយតបនិងត្រៀមទទួលកំណើនភ្ញៀវទេសចរមកកម្សាន្ត៕

អត្ថបទ÷សៅ សារិទ្ធ