មនុញ្ញផលនៃបេះដូងមនុស្សធម៌សម្ដេចតេជោកាលពី៥ឆ្នាំមុន៖ នាវា WESTERDAMនាំភ្ងៀវជិត២ពាន់នាក់ចូលចតនៅកម្ពុជាម្ដងទៀត

នាវាទេសចរណ៍ឈ្មោះ WESTERDAM  ដែលប្រទេស និងកោះចំនួន៥បដិសេធមិនឱ្យចូលចតព្រោះខ្លាចឆ្លងកូវីដ១៩ ប៉ុន្តែកម្ពុជាបើកបេះដូងមនុស្សធម៌ឱ្យចូលចតកាលពីឆ្នាំ២០២០នោះ នាព្រឹកថ្ងៃទី១៨ ខែវិច្ឆិកា ឆ្នាំ២០២៥ នេះ បាននាំភ្ញៀវទេសចរជិត២ពាន់នាក់ ភាគច្រើនសញ្ជាតិអាមេរិក​ អូស្រ្តាលី និងកាណាដា  ចូលចតនៅកំពង់ផែស្វយ័តក្រុងព្រះសីហនុកម្ពុជាជាថ្មីម្ដងទៀត ដែលជាការចូលចតរយៈពេល៣ឆ្នាំជាប់ៗគ្នា ចាប់ពីឆ្នាំ២០២៣មក។

បើតាមកំពង់ផែស្វយ័តក្រុងព្រះសីហនុ នាវាទេសចរណ៍ ឈ្មោះ WESTERDAM សញ្ជាតិ HOLLAND បាននាំភ្ញៀវទេសចរណ៍សរុបចំនួន ១,៨៥០ នាក់ ក្នុងស្រ្តី៩៩២ នាក់ មកពីមាន ៤៣ សញ្ជាតិ ចូលចតនៅវេលាម៉ោង ៦:២០ព្រឹក  ប្រកបដោយសុវត្ថិភាព ក្នុងគោលបំណងមកទស្សនាកម្ពុជារយៈពេល ១ ថ្ងៃ។

គួររំលឹកឡើងវិញថា កាលពីឆ្នាំ២០២០ ក្នុងពេលដែលវិបត្តិកូវីដ១៩ រាតត្បាតជាសកល នាវា Westerdam កំពុងរសាត់អណ្ដែតនៅលើផ្ទៃសមុទ្រ បានព្យាយាមសុំចូលចតក្នុងដែនសមុទ្ររបស់ប្រទេសជាច្រើន ក៏ប៉ុន្តែត្រូវបានថ្នាក់ដឹកនាំប្រទេសទាំងនោះបដិសេដមិនឱ្យចូលចតឡើយ។ ខុសពីថ្នាក់ដឹកនាំប្រទេសដទៃ ថ្នាក់ដឹកនាំកម្ពុជា គឺសម្ដេចតេជោ  ហ៊ុន សែន បានបើកបេះដូងមនុស្សធម៌ឱ្យនាវា Westerdam ចូលចតដោយមិនខ្លាចឆ្លងមេរោគកូវីដ១៩ឡើយ ព្រោះគិតដល់អាយុជីវិតអ្នកដំណើរលើនាវា ហើយពេលនោះសម្ដេចតេជោ ក៏បានអញ្ជើញទទួលនាវា Westerdam ដោយផ្ទាល់។​

នាកាលណោះ ម្ចាស់នាវាទេសចរណ៍ Westerdam  លើកឡើងថា គុណបំណាច់របស់សម្ដេច ហ៊ុន សែន នាយករដ្ឋមន្ត្រីកម្ពុជាចំពោះការអនុញ្ញាតឱ្យនាវារបស់លោកចូលចត និងសម្រួលដល់ភ្ញៀវទេសចររបស់លោកឱ្យចាកចេញទៅកាន់ ប្រទេសរបស់ពួកគេនេះ ធ្វើឱ្យរូបលោកចងចាំមិនអាចបំភ្លេចបានឡើយ ហើយសន្យាថានាវានេះនឹងវិលត្រឡប់មកប្រទេសកម្ពុជាជាថ្មីម្តងទៀតនៅពេលណាមួយ។

បន្ទាប់មកនៅខែធ្នូ ឆ្នាំ២០២៣ នាវា Westerdam   បានត្រឡប់មកចូលចតនៅកម្ពុជាដូចការសន្យា ដោយបានដឹកភ្ញៀវទេសចរជាង១៥០០នាក់ មកពី៤៣សញ្ជាតិ។ នៅឆ្នាំ២០២៤ នាវានេះ ក៏បានចូលចតម្ដងទៀត ដោយបាននាំយកភ្ញៀវទេសចរណ៍ចំនួន១,៨៧៣នាក់ ភាគច្រើនជាជនជាតិអាមេរិក៕

ដោយ៖ ង៉ិល ណារ៉ាត់