កម្ពុជា និងរវ៉ាន់ដា លើកលែងទិដ្ឋាការសម្រាប់លិខិតឆ្លងដែនការទូត និងផ្លូវការ

ក្នុងដំណើរទស្សនកិច្ចនៅប្រទេសរវ៉ាន់ដា រដ្ឋមន្ត្រីការបរទេសកម្ពុជា លោក ប្រាក់ សុខុន បានជួបពិភាក្សាការងារជាមួយសមភាគីរបស់លោក គឺរដ្ឋមន្ត្រីការបរទេសរវ៉ាន់ដា ដោយភាគីទាំងពីរបានជជែកពីការជំរុញថែមទៀតនូវកិច្ចសហប្រតិបត្តិការរវាងប្រទេសទាំងពីរ។ ក្នុងនោះ ភាគីទាំងពីរ បានចុះកិច្ចព្រមព្រៀងលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ។

អមជាមួយកិច្ចព្រមព្រៀងលើកលែងទិដ្ឋាការ លោក ប្រាក់ សុខុន រដ្ឋមន្ត្រីការបរទេសកម្ពុជា និងលោក Olivier Jean Patrick Nduhungirehe រដ្ឋមន្ត្រីការបរទេសរវ៉ាន់ដា បានចុះហត្ថលេខាលើអនុស្សរណៈនៃការយោគយល់ស្តីពីការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសទាំងពីរផងដែរ។ នេះបើតាមក្រសួងការបរទេសកម្ពុជា។

ការចុះហត្ថលេខាលើឯកសារទាំងពីរខាងលើ ត្រូវបានក្រសួងការបរទេស ចាត់ទុកថា ជាជំហានដ៏សំខាន់ឆ្ពោះទៅពង្រឹងមិត្តភាព និងកិច្ចសហប្រតិបត្តិការរវាងកម្ពុជា និងរវ៉ាន់ដា។

ជំនួបទ្វេភាគីដែលធ្វើឡើងកាលពីថ្ងៃទី១៨ ខែវិច្ឆិកា ក្នុងទីក្រុងគីហ្គាលី ភាគីទាំងពីរក៏បានពិភាក្សាក្នុងការរិះរកមធ្យោបាយ ដើម្បីជំរុញកិច្ចសហប្រតិបត្តិការរវាងប្រទេសទាំងពីរបន្ថែមទៀត ជាពិសេសនោះទៅលើវិស័យនយោបាយ សេដ្ឋកិច្ច និងវប្បធម៌៕