នគរបាលកម្ពុជាទទួលគ្រឿងបរិក្ខារបច្ចេកទេសអក្សរសម្ងាត់ ពីរដ្ឋាភិបាលវៀតណាម

នៅព្រឹកថ្ងៃទី១៩ ខែវិចិ្ឆកា ឆ្នាំ២០២៥នេះ អគ្គស្នងការដ្ឋាននគរបាលជាតិទទួលគ្រឿងបរិក្ខារបច្ចេកទេសអក្សរសម្ងាត់ ជាជំនួយរបស់គណៈអក្សរសម្ងាត់រដ្ឋាភិបាលវៀតណាម ដើម្បីបម្រើឱ្យកិច្ចការជំនាញ។ ពិធីប្រគល់ និងទទួល ធ្វើឡើងរវាងឧត្ដមសេនីយ៍ឯក ស៊ា មុយឡុង ប្រធាននាយកដ្ឋានអក្សរសម្ងាត់ និងតំណាងគណៈអក្សរសម្ងាត់រដ្ឋាភិបាលវៀតណាម ក្រោមវត្តមានឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ។

ឧត្តមសេនីយ៍ឯក ឆាយ គឹមខឿន បានវាយតម្លៃខ្ពស់ចំពោះគណៈប្រតិភូគណៈអក្សរសម្ងាត់រដ្ឋាភិបាលវៀតណាម ដែលបានយកចិត្តទុកដាក់លើកិច្ចសហប្រតិបត្តិការរវាងអគ្គស្នងការដ្ឋាននគរបាលជាតិ និងក្រសួងមហាផ្ទៃ ក៏ដូចជារដ្ឋាភិបាលនៃប្រទេសទាំងពីរ។ ឈរលើកិច្ចសហប្រតិបត្តិការល្អកន្លងមក លោក ថា គណៈអក្សរសម្ងាត់រដ្ឋាភិបាលវៀតណាម និងក្រសួងមហាផ្ទៃកម្ពុជា គឺពិតជាទទួលបានលទ្ធផលផ្លែផ្កាគួរជាទីមោទនៈ។

សម្រាប់ការផ្តល់នូវសម្ភារបច្ចេកទេសពេលនេះ ឧត្តមសេនីយ៍ឯក ឆាយ គីមខឿន បានគូសបញ្ជាក់ថា គឺពិតជាតម្រូវការចាំបាច់ដើម្បីបម្រើឱ្យការងារសន្តិសុខ សុវត្ថិភាព ជាពិសេសជំនាញអក្សរសម្ងាត់ ដើម្បីរក្សាសន្តិសុខ និងការសម្ងាត់របស់ជាតិ។ 

លោកអគ្គស្នងការរង បានអរគុណដល់គណៈអក្សរសម្ងាត់រដ្ឋាភិបាលវៀតណាម ដែលតែងតែផ្តល់នូវសម្ភារបច្ចេកទេសដ៏មានសារៈសំខាន់នេះដល់នាយកដ្ឋានអក្សរសម្ងាត់ នៃអគ្គស្នងការដ្ឋាននគរបាលជាតិ និងសង្ឃឹមថា ភាគីវៀតណាម នឹងបន្តផ្តល់ជូននូវសម្ភារបច្ចេកទេសនេះ ជាមួយការបណ្តុះបណ្តាលកសាងសមត្ថភាពដល់នគរបាលជាតិកម្ពុជាបន្ថែមទៀតផងដែរ៕