មន្ត្រីជាន់ខ្ពស់៖ កម្មវិធីគន្លងអប់រំថ្មី នឹងជួយកសាង​មូលធនមនុស្សកម្ពុជាឲ្យក្លាយជាកម្លាំង​ពលកម្មស្នូលរបស់ប្រទេសជាតិ

មន្ត្រីជាន់ខ្ពស់នៃក្រសួងអប់រំ យុវជន និងកីឡា បានអះអាងថា កម្មវិធីគន្លងអប់រំថ្មីដែលបានដាក់អនុវត្តនៅឆ្នាំសិក្សាថ្មីនេះនៅកម្រិតមធ្យមសិក្សាទុតិយភូមិចាប់ពីថ្នាក់ទី១០-១២ នឹងកសាងមូលធនមនុស្សកម្ពុជាឱ្យក្លាយជាកម្លាំងពលកម្មស្នូលរបស់ប្រទេសជាតិ។

នៅក្នុងកិច្ចប្រជុំពិនិត្យ និងពិភាក្សាចុងក្រោយ លើសេចក្ដីណែនាំរួមស្ដីពីការអនុវត្តគន្លងអប់រំថ្មីនៅកម្ពុជា រវាងក្រសួងអប់រំ យុវជន និងកីឡា និងក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី១៨វិច្ឆិកា ដោយមានការចូលរួមពីលោក ជា កុសល រដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ុង បូរាត រដ្ឋលេខាធិការក្រសួងអប់រំយុវជននិងកីឡា និងជានាយកខុទ្ទកាល័យបានបន្តថា ការរៀបចំឡើងវិញនូវគន្លងអប់រំថ្មី នៅកម្រិតមធ្យមសិក្សាទុតិយភូមិ (ថ្នាក់ទី១០-១២) ដើម្បីបើកច្រកដល់អ្នកសិក្សា ឱ្យមានជម្រើសកាន់តែច្រើនក្នុងការសម្រេចចិត្តរៀបចំផែនការសិក្សា ជ្រើសរើសផ្លូវសិក្សា និងផែនការអាជីព សមស្របតាមលក្ខណៈ សម្បត្តិផ្ទាល់ខ្លួន ឧបនិស្ស័យ សមត្ថភាពពីកំណើត និងចំណូលចិត្តរបស់បុគ្គលម្នាក់ៗ ក្នុងន័យសម្រួចការកសាងមូលធនមនុស្សកម្ពុជាឱ្យក្លាយជាកម្លាំងពលកម្មស្នូលរបស់ប្រទេសជាតិ។

លោកបានបន្តទៀតថា ក្នុងឆ្នាំសិក្សា២០២៥-២០២៦ នេះ ក្រសួងអប់រំ យុវជន និងកីឡា ដាក់ឱ្យអនុវត្តគន្លងអប់រំថ្មី នៅកម្រិតមធ្យមសិក្សាទុតិយភូមិ (ថ្នាក់ទី១០-១២) នៅតាមគ្រឹះស្ថានសិក្សាចំនួន ៤៩ នៅតាមតំបន់សក្ដានុពលនៃរាជធានី-ខេត្ត មួយចំនួន។

គួរបញ្ជាក់ថា អង្គប្រជុំបានពិភាក្សាដោយពិនិត្យលើខ្លឹមសារ សេចក្តីណែនាំរួមការអនុវត្តគន្លងអប់រំថ្មីនៅកម្ពុជា និងកំណត់តួនាទីភារកិច្ចទទួលខុសត្រូវរបស់ក្រសួងអប់រំ យុវជន និងកីឡា និងក្រសួងការងារបណ្តុះបណ្តាលនិងវិជ្ជាជីវៈ លើការអនុវត្តគន្លងអប់រំថ្មីនេះ។ ជាទិសដៅបន្ត គឺក្រសួងអប់រំ យុវជន និងកីឡា និងក្រសួងការងារ និងបណ្ដុះបណ្ដាលវិជ្ជាជីវៈ នឹងបង្កើតគណៈកម្មការដើម្បីរៀបចំផែនការសកម្មភាពការងារបន្តដូចជា ការតម្រង់ទិសលើការអនុវត្តគន្លងអប់រំថ្មី ការរៀបចំកម្មវិធីសិក្សា សៀវភៅសិក្សា ការប្រើប្រាស់ធនធានគ្រូបង្រៀន និងតម្រូវសម្ភារៈគាំទ្រលើការបង្រៀន និងរៀន៕

អត្ថបទ៖ សំអឿន