ក្រសួងវប្បធម៌ ចូលរួមរំលែកទុក្ខគ្រួសារ លោក ម៉ៅ អាយុទ្ធ

ភ្នំពេញ៖ ក្រសួងវប្បធម៌ និងវិចិត្រសិល្បៈ នៅថ្ងៃទី១៦ ខែមេសា ឆ្នាំ២០២១នេះ បានផ្ញើសារចូលរួមរំលែកទុក្ខ ចំពោះលោកស្រី សូ សាម៉ូនី ព្រមទាំងគ្រួសាររបស់ លោក ម៉ៅ អាយុទ្ធ។

សូមជម្រាបថា លោក ម៉ៅ អាយុទ្ធ រដ្ឋលេខាធិការក្រសួងព័ត៌មាន បានទទួលមរណភាព នៅមន្ទីរពេទ្យមិត្តភាពខ្មែរសូវៀត នៅវេលាម៉ោងប្រមាណ៦ល្ងាចថ្ងៃទី១៥ ខែមេសា ឆ្នាំ២០២១នេះ ដោយសារជំងឺកូវីដ-១៩។

លោក ម៉ៅ អាយុទ្ធ ដែលមានអាយុ៧៧ឆ្នាំ រស់នៅភូមិ០៧ សង្កាត់បឹងរាំង ខណ្ឌដូនពេញ បានបានឆ្លងកូវីដ១៩ ហើយបានចូលសម្រាកនៅមន្ទីរពេទ្យមិត្តភាពខ្មែរសូវៀត កាលពីថ្ងៃទី៥ ខែមេសា ឆ្នាំ២០២១។

ស្នាដៃភាពយន្តសំខាន់ៗរបស់លោកម៉ៅ អាយុទ្ធ មានស្នាដៃវណ្ណកម្មភាពយន្តខ្មែរមានដូចជា រឿង ទឹករាំផ្ការាំ បិទភ្នែកហែកទ្រូ ចិត្តចងចាំ ឆ្អឹងអណ្តែត ជើងមេឃដាច់ស្រយាល សម្ដីចុងក្រោយ នេសាទក្រពើ ហ្លួងព្រះស្តេចកន និងខ្សែភាពយន្តប្រចាំ ស.វ “កូនប្រុស ក្រោមពន្លឺចន្ទ” ដែលលោកកំពុងតែដឹកនាំថត៕

អត្ថបទ៖ ច័ន្ទ វីរៈ