ព័ត៌មានជាតិ

គណៈកម្មការជំនាញរដ្ឋសភាជួបតំណាងព្រឹទ្ធសភា ជជែកលើសេចក្តីស្នើវិសោធនកម្មច្បាប់បោះឆ្នោតព្រឹទ្ធសភា

បានផុស

៥ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

លោក អង្គ វង្ស វឌ្ឍានា ប្រធានគណៈកម្មការនីតិកម្ម និងយុត្តិធម៌ នៃរដ្ឋសភា ដឹកនាំអន្តរគណៈកម្មការជំនាញរបស់រដ្ឋសភា ជួបប្រជុំជាមួយតំណាងព្រឹទ្ធសភា នាព្រឹកថ្ងៃទី១១ ខែធ្នូ ឆ្នាំ២០២៥ ដើម្បីពិនិត្យ និងពិភាក្សាលើសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។

កិច្ចប្រជុំនេះ គឺធ្វើឡើងបន្ទាប់ពីរដ្ឋសភាបានទទួលសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ពីព្រឹទ្ធសភា ដែលមានលោកបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាតំណាងសមាជិកព្រឹទ្ធសភាហត្ថលេខីចំនួន៥៣រូប តាមរយៈលិខិតចុះថ្ងៃទី១៣ ខែវិច្ឆិកា ឆ្នាំ២០២៥។

តាមលោក អង្គ វង្ស វឌ្ឍានា យោងការសម្រេចរបស់គណៈកម្មាធិការអចិន្ត្រៃយ៍រដ្ឋសភាប្រជុំថ្ងៃទី២០ ខែវិច្ឆិកា ឆ្នាំ២០២៥ បានប្រគល់ភារកិច្ចជូនគណៈកម្មការនីតិកម្ម និងយុត្តិធម៌ (គណៈកម្មការទី៦) និងគណ:កម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន (គណៈកម្មការទី៤) សិក្សាស្រាវជ្រាវ។

សម្រាប់កិច្ចប្រជុំថ្ងៃនេះ លោក អង្គ វង្ស វឌ្ឍានា ថា គណៈកម្មការជំនាញរបស់រដ្ឋសភា ចង់បានការបំភ្លឺបន្ថែមពីតំណាងសមាជិកព្រឹទ្ធសភា ដែលជាហត្ថលេខីលើសេចក្តីស្នើច្បាប់នេះ។

លោកបណ្ឌិត ធន់ វឌ្ឍនា បានគូសបញ្ជាក់ទៅកាន់គណៈកម្មការជំនាញរដ្ឋសភា ថា សេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងព្រឹទ្ធសភា មានគោលបំណងឆ្លុះបញ្ចាំងពីការទទួលខុសត្រូវរបស់អង្គនីតិប្បញ្ញត្តិ ក្នុងការអភិវឌ្ឍច្បាប់ឱ្យកាន់តែប្រសើរថែមទៀត ដើម្បីធានាសិទ្ធ និងសេរីភាពរបស់ប្រជាពលរដ្ឋ។ កិច្ចប្រជុំនេះ ក៏តំណាងព្រឹទ្ធសភាបានបកស្រាយរាល់ចម្ងល់របស់គណៈកម្មការរដ្ឋសភាផងដែរ។

លោក អង្គ វង្ស វឌ្ឍានា បានអរគុណដល់តំណាងព្រឹទ្ធសភា ដែលបានខិតខំយកចិត្តទុកដាក់តាក់តែងនូវសេចក្តីស្នើច្បាប់ខាងលើ និងបានមកពន្យល់លើខ្លឹមសារសំខាន់ៗនៃសេចក្ដីស្នើច្បាប់ ក៏ដូចជាបកស្រាយរាល់ចម្ងល់របស់គណៈកម្មការ រហូតទទួលបានការឯកភាពយល់ព្រមទាំងស្រុងពីអន្តរគណ:កម្មការនៃរដ្ឋសភា។

លោក អង្គ វង្ស វឌ្ឍានា បញ្ជាក់ថា លោកនឹងធ្វើរបាយការណ៍ជូនគណៈកម្មាធិការអចិន្ត្រៃយ៍នៃរដ្ឋសភា ដើម្បីសម្រេចដាក់បញ្ចូលសេចក្ដីស្នើច្បាប់នេះនៅក្នុងរបៀបវារ:នៃសម័យប្រជុំរដ្ឋសភា នាពេលខាងមុខ៕