មេដឹកនាំកូរ៉េ បង្ហាញក្តីបារម្ភពីជម្លោះកម្ពុជា-ថៃ និងសង្ឃឹមថា ប្រទេសទាំង២អាចដោះស្រាយបានដោយសន្តិវិធី

លោក លី ជេម្យ៉ង់ ប្រធានាធិបតីនៃប្រទេសកូរ៉េខាងត្បូង បានបង្ហាញពីក្តីបារម្ភចំពោះជម្លោះប្រដាប់អាវុធ កម្ពុជា-ថៃ ដែលកើតឡើងថ្មីៗនេះ ហើយលោកក៏សង្ឃឹមថា ​ប្រទេសទាំង២ អាចចូលតុចរចាដោះស្រាយជម្លោះដោយសន្តិវិធី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ធ្វើឡើងនៅថ្ងៃទី ១១ ខែធ្នូ ឆ្នាំ២០២៥ ក្នុងឱកាស លោក ឃួន ផុនរតនៈ ឯកអគ្គរាជទូតកម្ពុជាប្រចាំប្រទេសកូរ៉េ បានចូលជួបប្រគល់សារតាំងជូន លោក លី ជេម្យ៉ង់ ប្រធានាធិបតីនៃសាធារណរដ្ឋកូរ៉េ​ ជាមួយបណ្តាអង្គទូតមកពីប្រទេសចំនួន ៧ ផ្សេងទៀត។

តាមរយៈជំនួបនេះ លោក លី ជេម្យ៉ង់ ប្រធានាធិបតីកូរ៉េ បានសម្តែងនូវក្តីបារម្ភចំពោះជម្លោះប្រដាប់អាវុធ និងភាពតានតឹងរវាងប្រទេសកម្ពុជា និងថៃក្នុងពេលថ្មីៗនេះ ដោយសង្ឃឹមថា ប្រទេសទាំងពីរអាចត្រលប់មកតុចរចា ដោះស្រាយជម្លោះតាមសន្តិវិធីស្របតាមច្បាប់អន្តរជាតិ។ ឆ្លៀតក្នុងឱកាសនេះ ប្រធានាធិបតីកូរ៉េខាងត្បូង ក៏បានអរគុណដល់រដ្ឋាភិបាលកម្ពុជាចំពោះកិច្ចខិតខំប្រឹងប្រែងសហការបានយ៉ាងល្អ ក្នុងការប្រយុទ្ធប្រឆាំងឧក្រិដ្ឋកម្មអនឡាញផងដែរ។

ជាមួយគ្នានេះ លោក ឃួន ផុនរតនៈ ឯកអគ្គរាជទូតបានលើកឡើង ថា កម្ពុជាតែងវាយតម្លៃខ្ពស់ចំពោះទំនាក់ទំនងទ្វេភាគីរវាងប្រទេសកម្ពុជា និងកូរ៉េ លើគ្រប់វិស័យ ដែលបានបម្រើដល់ប្រយោជន៍របស់ប្រជាជននៃប្រទេសទាំងពីរកន្លងមក។ បន្ថែមពីនេះ លោកបានបង្ហាញពីមោទកភាពដែលមានឱកាសមកបំពេញបេសកកម្មក្នុងប្រទេសកូរ៉េ ដែលជាប្រទេសមានសេដ្ឋកិច្ចជឿនលឿន ព្រមទាំងមានប្រវត្តិសាស្ត្រ និងអរិយធម៌ដ៏សម្បូរបែប។ ក្នុងជំនួបខាងលើ ឯកអគ្គរាជទូត បានប្តេជ្ញាចិត្តថានឹងខំប្រឹងប្រែងឱ្យអស់លទ្ធភាពបន្តពង្រឹងទំនាក់ទំនងរវាងប្រទេសទាំងពីរឱ្យកាន់តែរឹងមាំបន្ថែមទៀត៕