គិត​ត្រឹម​ថ្ងៃទី ២២ ខែធ្នូ ខេត្តក្រចេះទទួល​ជន​ភៀស​​សឹកសរុប ៧៦៩ ​គ្រួសារពី​សង្រ្គាមឈ្លាន​ពាន​ពីកងទ័ពថៃ

ជនភៀសសឹកជាច្រើនរយគ្រួសារ បានជម្លៀសខ្លូនចេញពីតំបន់សមរភូមិក្តៅនៃសង្គ្រាមឈ្លានពានទឹកដី ដែលបង្កឡើងពីសំណាក់ប្រទេសសៀម មកលើប្រទេសកម្ពុជា បានមកដល់ភូមិសាស្ត្រខេត្តក្រចេះ និង​បាន​ទទួលការគិតគូរយកចិត្តទុក​ដាក់​ខ្ពស់ចំពោះសុខសុវត្ថិភាព និងការរស់នៅប្រចាំថ្ងៃ។

បើតាមអាជ្ញាធរខេត្តក្រចេះ គិតត្រឹមថ្ងៃទី ២២ ខែធ្នូ ឆ្នាំ២០២៥ អាជ្ញាធរខេត្តទទួលបានជនភៀសសឹកសរុបចំនួន ៧៦៩ គ្រួសារ ស្មើនឹង ១៩១៦នាក់ ស្រី ៩៦០នាក់ កំពុងស្នាក់នៅជាមួយសាច់ញាតិ​ក្នុងស្រុកក្រុងទាំង ៧ ក្នុងខេត្តក្រចេះ។

ក្នុងនោះ ក្នុងក្រចេះមានចំនួន ៣៣គ្រួសារ ស្មើ ១១២នាក់ ស្រី ៧៣នាក់។ ស្រុកឆ្លូង មានចំនួន ១៧៨គ្រួសារ ស្មើ ៤៨៥នាក់ ស្រី ២៥៥នាក់។ ស្រុកចិត្របុរី មានចំនួន ៧៨គ្រួសារ ស្មើ២២២នាក់ ស្រី ១៣២នាក់។ ស្រុក​​ព្រែកប្រសព្វ មានចំនួន ២០២គ្រួសារ ស្មើ ៥៥៤នាក់ ស្រី ២៧១នាក់។ ស្រុកសំបូរ មានចំនួន ៤២គ្រួសារ ស្មើ ១៣០នាក់ ស្រី ៦៣នាក់។ ស្រុកស្នួល មានចំនួន ២១៧គ្រួសារ ស្មើ ៣៤០នាក់ ស្រី ១២៩នាក់។ ស្រុក​អូរគ្រៀងសែនជ័យ មានចំនួន ១៩គ្រួសារ ស្មើ ៧៤នាក់ ស្រី ៣៧នាក់។

លោក ម៉ែន វណ្ណា នាយករដ្ឋបាលខេត្តក្រចេះបានឱ្យកម្ពុជាថ្មីដឹងនៅថ្ងៃនេះថា ពលរដ្ឋជនភៀសសឹកដែលបានមកដល់ទឹកដីនៃភូមិសាស្ត្រខេត្តក្រចេះ ត្រូវបានថ្នាក់ដឹងនាំខេត្តយកចិត្តទុកដាក់ខ្ពស់បំផុតចំពោះសុខសុវត្ថិភាពក្នុងការធ្វើដំណើរ សុខភាព ការហូបចុក ទាំងការស្នាក់នៅ និង​បាន​ឧបត្ថម្ភជាស្បៀង គ្រឿង​ឧបភោគបរិភោគ សម្តារៈប្រើប្រាស់ និងថវិកាមួយចំនួនដល់ពួកគាត់និងតែងតែចុះជួបសួរសុខទុក្ខផងដែរ។

លោកបានបញ្ជាក់ថា ជនភៀសសឹកដែលបានមកដល់ខេត្តក្រចេះនេះ បានទៅ​ស្នាក់នៅផ្ទះសាច់ញាតិ៕

អត្ថបទ៖ ប្រុញ វិធិន