ព័ត៌មានជាតិ

ក្រៅពីខេត្តពោធិ៍សាត់ និងកំពង់ធំ អាជ្ញាធរខេត្តកំពង់ចាមកំពុងដំឡើងបង្គោលភ្លើងបំភ្លឺតាមផ្លូវជាតិគ្រោងឲ្យរួចរាល់នៅឆ្នាំ ២០២៦

បានផុស

៧ ខែ មុន

នៅ

ថ្ងៃអង្គារ ២៣ ធ្នូ ២០២៥

ដោយ

អាជ្ញាធរខេត្តកំពង់ចាម បានកំពុងអនុវត្តការងារដំឡើងបង្គោលភ្លើងបំភ្លឺតាមផ្លូវជាតិលេខ ៦ និងលេខ ៧ ហើយដែលតាមផែនការនឹងជំរុញឲ្យរួចរាល់នៅឆ្នាំ ២០២៦។

លោក ស្រី សុភ័ក្រ្ត អភិបាលរងខេត្តកំពង់ចាម និងជាអ្នកនាំពាក្យរដ្ឋបាលខេត្តកំពង់ចាមបានប្រាប់កម្ពុជាថ្មីតាមទូរសព្ទនៅព្រឹកនេះថា ការងារបានចាប់ផ្ដើមអនុវត្តបណ្តើរៗចាប់ពីស្រុកបាធាយព្រំប្រទល់ខេត្តកណ្ដាលដល់រង្វង់មូលស្គន់តាមផ្លូវជាតិលេខ ៦ និងចាប់ពីរង្វង់មូលស្គន់ដល់ស្រុកតាំងគោកព្រំប្រទល់ខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«តាមផែនការរបស់ថ្នាក់ដឹកនាំខេត្តនឹងជំរុញឲ្យចប់រួចរាល់ក្នុងឆ្នាំ ២០២៦»។ នេះបើតាមលោក ស្រី សុភ័ក្រ្ត។

ពាក់ព័ន្ធប្រភពថវិកាសម្រាប់ការអនុវត្តការងារនេះ លោក ស្រី សុភ័ក្រ្ត បានបញ្ជាក់ថា មួយផ្នែកគឺបានមកពីកញ្ចប់ថវិការដ្ឋ និងក៏មានការចូលរួមចំណែកពីសប្បុរសជនមួយចំនួនផងដែរ។

ក្រៅពីរៀបចំដំឡើងបង្គោលភ្លើងបំភ្លឺតាមផ្លូវជាតិលេខ ៦ ក្នុងភូមិសាស្ត្រខេត្តកំពង់ចាម អាជ្ញាធរខេត្តក៏គ្រោងរៀបចំនៅតាមផ្លូវជាតិលេខ ៧ ដែលកំពុងស្ថាបនាពង្រីកពីរង្វង់មូលស្គន់ដល់ក្រុងកំពង់ចាម ខណៈកំណាត់ផ្លូវជាតិមួយខ្សែនេះកំពុងចាក់ក្រាលកៅស៊ូនឹងរួចរាល់នៅមុនពិធីចូលឆ្នាំខ្មែរ។

សរុបមកគម្រោងនេះត្រូវបានធ្វើឡើងជាជំហានៗទៅតាមកញ្ចប់ថវិកាដែលមាន ដើម្បីលើកកម្ពស់សោភ័ណភាព និងសុវត្ថិភាពក្នុងការធ្វើដំណើរក្នុងខេត្តកំពង់ចាម។ លោក ស្រី សុភ័ក្រ្ត បន្ថែម។

តាមបណ្តាខេត្តមួយចំនួន អាជ្ញាធរបានកំពុងបើកយុទ្ធនាការរៀបចំដំឡើងបង្គោលភ្លើងបំភ្លឺតាមផ្លូវជាតិ ដើម្បីសម្រួលដល់ការធ្វើដំណើរ និងលើកកម្ពស់មុខមាត់ខេត្ត។

នៅក្នុងភូមិសាស្រ្តខេត្តពោធិ៍សាត់ អាជ្ញាធរខេត្តបានកំពុងអនុវត្តការតម្លើងបង្គោលភ្លើងបំភ្លឺនៅលើកំណាត់ផ្លូវជាតិលេខ ៥ ប្រវែងជាង ៩០ គីឡូម៉ែត្រចាប់ពីព្រំប្រទល់ខេត្តកំពង់ឆ្នាំងដល់ខេត្តបាត់ដំបង ហើយដែលគ្រោងឱ្យរួចរាល់ទាំងស្រុងមុនពិធីបុណ្យចូលឆ្នាំខ្មែរខាងមុខ។ នេះបើតាមលោក ខូយ រីដា អភិបាលខេត្តពោធិ៍សាត់ ក្នុងឱកាសចុះត្រួតពិនិត្យកន្លែងក្រុមការងារធ្វើការដំឡើងបង្គោលភ្លើងបំភ្លឺផ្លូវសាធារណៈនៅបរិវេណសាលាខេត្ត។

លោក ខូយ រីដា បានបញ្ជាក់ថា ដំណាក់កាលទី១ ចាប់ពីចំណុចនិមិត្តសញ្ញារដ្ឋបាលខេត្ត រូបលោកឧកញ៉ាឃ្លាំងមឿងជិះសេះខាងកើតផ្តិលតាមផ្លូវជាតិលេខ៥ រហូតដល់ទីរួមស្រុកក្រគរបានបញ្ចប់រួចរាល់ ខណៈដំណាក់កាលទី២ ពីក្រុងពោធិ៍សាត់ឆ្ពោះទៅកាន់ទីរួមស្រុកបាកាន និងដំណាក់កាលទី៣ ពីទីរួមស្រុកក្រគរទៅព្រំប្រទល់ខេត្តកំពង់ឆ្នាំង បានកំពុងដំណើរការបន្តទៅតាមផែនការ។

លោកអភិបាលខេត្តបានចាត់ទុកការអនុវត្តកិច្ចការនេះ មានសារៈសំខាន់ណាស់សម្រាប់ការកាត់បន្ថយគ្រោះថ្នាក់ចរាចរណ៍ ដោយធានាបាននូវសន្តិសុខ សុវត្ថិភាព និងភាពងាយស្រួល ក្នុងការធ្វើដំណើរជូនបងប្អូនប្រជាពលរដ្ឋ នាពេលយប់។

ដោយឡែកខេត្តកំពង់ធំ អាជ្ញាធរខេត្តបានបង្ហាញពីវឌ្ឍនភាពនៃការរៀបចំបង្គោលភ្លើងបំភ្លឺតាមផ្លូវជាតិលេខ ៦ ដែលមកដល់ពេលនេះសម្រេចបានប្រមាណ ៨០ ទៅ ៩០%។

ឆ្លើយតបការសាកសួររបស់កម្ពុជាថ្មី លោក អ៊ុន បុត្ត អភិបាលរងខេត្តកំពង់ធំបានគូសបញ្ជាក់ថា ការងារនេះនៅបន្តិចបន្តួចទៀតដូចជានៅស្រុកស្ទោង និងស្រុកប្រាសាទបល្ល័ង្ក។

បើតាមលោក អ៊ុន បុត្ត គោលដៅរបស់អាជ្ញាធរខេត្តមិនត្រឹមតែអនុវត្តតាមបណ្ដោយផ្លូវជាតិប៉ុណ្ណោះទេ តែថែមទាំងគ្រោងរៀបចំនៅតាមទាំងទីប្រជុំជន តាមដងផ្លូវបេតុង និងនៅតាមបណ្តាសង្កាត់នានានៅក្នុងក្រុងស្ទឹងសែនទៀតផង៕