គណៈអភិបាលខេត្តក្រចេះ នាំយកអំណោយជូនដល់​វីរកងទ័ពនៅសមរភូមិមុខ និង​ពលរដ្ឋ​ភៀស​​សឹកខេត្តព្រះវិហារ

ថ្នាក់ដឹកនាំខេត្តក្រចេះ បាននាំយកអំណោយគ្រឿងឧបភោគបរិភោគ សម្ភារប្រើប្រាស់ និងថវិកា ជូនដល់វីរៈកងទ័ពនៅ​សមរភូមិមុខ និងប្រជាជនភៀសសឹក ខេត្តព្រះវិហារ ដែលជាអំណោយបងប្អូនសប្បុរសជន និងប្រជាពលរដ្ឋរស់នៅខេត្តក្រចេះ។

លោក ដួង ពៅ អភិបាលរងខេត្ត តំណាងលោក វ៉ា ថន អភិបាលខេត្តក្រចេះ បានដឹកនាំក្រុមការងារខេត្ត នាំយកអំណោយជាស្បៀងអាហារ គ្រឿងឧបភោគ បរិភោគ និងសម្ភារប្រើប្រាស់ផ្សេងៗ ព្រមទាំងថវិកា ដែលបានមកពីការចូលរួមបរិច្ចាគរបស់មន្រ្តីរាជការ ក្រុមហ៊ុន សហគ្រាស ព្រះសង្ឃ និងបងប្អូនប្រជាពលរដ្ឋនៅខេត្តក្រចេះ ប្រគល់ជូនដល់វីរកងទ័ពនៅសមរភូមិមុខ ដែលកំពុងការពារបូរណភាពដែនដីកម្ពុជា និងប្រជាជនភៀសសឹក នៅខេត្តព្រះវិហារ ដោយមានកិច្ចស្វាគមន៍យ៉ាងកក់ក្តៅពីលោក គឹម រិទ្ធី អភិបាលខេត្តព្រះវិហារ នាចុងសប្តាហ៍កន្លងទៅ។

នៅក្នុងដំណើរដឹកជញ្ជូនសម្ភារៈស្បៀងជូនដល់វីរកងទ័ព និងជនភៀសសឹក នៅខេត្តព្រះវិហារ លោក ដួង ពៅ អភិបាល​រងខេត្តក្រចេះបានឱ្យដឹងថា រាជរដ្ឋាភិបាល ចាប់តាំងពីការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភា រហូតបន្តមក សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានតម្កល់សុខសន្តិភាព ស្ថិរភាព និងសេចក្តីសុខរបស់ប្រជាជនជាចម្បង និងមិនឱ្យប្រជាជនណាម្នាក់បាត់បង់ជីវិត ដោយសារការខ្វះខាតស្បៀងឡើយ ទោះបីសភាពការណ៍តាមបន្ទាត់ព្រំដែនមិនទាន់ស្ងប់ស្ងាត់ក្តី ប៉ុន្តែក្នុងនាមរដ្ខបាលខេត្ត បានគោតសរសើរ នូវភាពអង់អាចក្លាហានរបស់កងទ័ពជួរមុខ ក្នុងការពារបូរណភាពទឹកដី ប្រឆាំងសត្រូវឈ្លានពាន មកលើដែនអធិបតេយ្យភាពកម្ពុជា។

លោកបន្តថា ក្នុងនាមរដ្ឋបាលខេត្តក្រចេះ សូមគោរពថ្លែងអំណរគុណនូវទឹកចិត្តដ៏សប្បុរសធម៌របស់សប្បុរសជនទាំងអស់ចំពោះការចូលរួមបរិច្ចាគ អំណោយជូនដល់រដ្ឋបាលខេត្តក្រចេះ និងនៅតែមានជាបន្តបន្ទាប់ ដើម្បីឧបត្ថម្ភជូនវីរកងទ័ពជួរមុខ និងប្រជាពលរដ្ឋភៀសសឹក របស់យើងក្នុងស្នារតី «ខ្មែរសាមគ្គី ខ្មែរឈ្នះ ខ្មែរជួយខ្មែរ ជួយគ្នាក្នុងគ្រាអាសន្ន ខឿនការពារជាតិរបស់ប្រជាជននៅតែបន្ដ ដរាបណាការគំរាមកំហែងនៅតែមាន»៕

អត្ថបទ៖ ប្រុញ វិធិន